[Drinni]

Agim Ceku: Kosova do ta shpalle vete pavaresine nese keshilli i Sigurimit nuk ka konsensus per kete gje


Data e Publikimit: 10/11/2006

Autori i Lajmit:
L.M

Kosova e dëshiron vendimin e Këshillit të Sigurimit, por nuk përjashton shpalljen e pavarësisë nëse atje s’ka konsensus Aktuale
Kryeministri Agim Çeku tha sot se mënyra më e mirë për pavarësimin e Kosovës është njohja me rezolutë të Këshillit të Sigurimit të OKB-së. Pas takimit me shefin e UNMIK-ut, Joakim Ryker, ai nuk e përjashtoi shpalljen e pavarësisë nëse në Këshillin e Sigurimit nuk arrihet konsensus. “Nga takimi i nesërm i Grupit të Kontaktit nuk pres ndonjë vendim për shtyrjen apo mosshtyrjen, sepse kjo varet nga zgjedhjet në Serbi”, tha Çeku. Ai dhe Ryker kanë biseduar edhe për grevën e punëtorëve të shëndetësisë, për fazën e tranzicionit politik, dhe për buxhetin e vitit 2007.
“Nuk ka zgjidhje tjetër përveç pavarësisë, dhe në këtë përcaktim nuk jemi vetëm”, tha sot kryeministri Çeku, duke përsëritur se Kosova do ta shpallë pavarësinë në rast se nuk do të arrihej konsensus në Këshillin e Sigurimit. “Ky nuk është kërcënim. Ne këtë e shohim si mundësi. Kosova gjithsesi do të jetë shtet i pavarur. Tani është duke u diskutuar koha dhe mënyra. Ne natyrisht se e preferojmë që kjo të njihet me rezolutë të Këshillit të Sigurimit e cila do të kishte përkrahje gjithëpërfshirëse”, tha Çeku. Kurse, për takimin e nesërm të Grupit të Kontaktit me kryenegociatorin Marti Ahtisari, Çeku tha se nuk pret të merret ndonjë vendim në lidhje me shtyrjen eventuale të afatit. Sipas tij, vendimi për shtyrjen apo mos- shtyrjen do të varet nga data e shpalljes së zgjedhjeve në Serbi, dhe ai nuk pret se deri nesër nuk do të ketë një datë të tillë. “Pra, do të jetë një diskutim i hapur i anëtarëve të GK-së me Ahtisarin në lidhje me pakon e tij, në lidhje me dinamikën e procesit, por nuk pres ndonjë vendim për shtyrjen apo mosshtyrjen” tha kryeministri Çeku. Ndërkaq, shefi i UNMIK-ut, Ryker shprehu bindjen se do të ruhet dinamika e procesit.”Nuk pres ndonjë rezultat spektakular nga takimi i Grupit të Kontaktit. Mendoj se të gjithë në këtë mekanizëm, si dhe i dërguari i posaçëm Ahtisari, në të cilin kemi besim të plotë, do të punojnë për ruajtjen e dinamikës në procesin e statusit”, tha Ryker. Çeku dhe Ryker kanë diskutuar edhe për grevën e punëtorëve të Qendrës Klinike Universitare. “Besoj se grevistët do t’i kuptojnë mundësitë e qeverisë dhe do t’i japin fund grevës”, tha Çeku, duke folur për angazhimin e kabinetit të tij që vitin e ardhshëm shëndetësia të jetë në gjendje më të mirë. “Për vitin e ardhshëm kemi paraparë një shtesë në buxhetin e shëndetësisë për të treguar se është prioritet i qeverisë. Vetëm për barëra kemi alokuar 9 milion euro për vitin 2007, derisa në 2006 kemi pasur vetëm 6 milionë” njoftoi kryeministri. Nga ana tjetër, Ryker e cilësoi lajm të mirë hartimin e buxhetit për vitin e ardhshëm dhe zhvillimet në fushën e ekonomisë. “Kosova nuk është një vrimë e zezë në rajon, por ka kapacitete për zhvillim ekonomik”, tha kryeadministratori Ryker.