[Albanian eX|PerT]

Sa qesharake dhe neveritshme

"Kadares duhet ti kerkojne falje"!!? Po Renatos?? Hetusi i asaj kohe tani na del edhe si shpetimtari, sa turp dhe sa po lexojme c'do dite ku tani e kemi besdi te hapim edhe kompiutrin. marre nga tirana Observer

INTERVISTA/Flet ish-hetuesi i çështjes, Riza Hicka

"Kadare më kërkoi lirimin e Renato Rrapit"


Roland QAFOKU, Dorina TOPOLLAJ
Në median e Tiranës ka shpërthyer këto ditë një histori që e ka trazuar jo pak mendjen e shqiptarëve. Janulla Rrapi, nëna e Renato Rrapit, nga SHBA-ja ku jeton prej disa vitesh ka lëshuar një lumë akuzash për shkrimtarin e madh Ismail Kadare, lidhur me historinë e lidhjes së djalit të saj Renato me vajzën e tij Gresa. Por ndërsa alibitë janë alibi dhe versionet, versione, në ndihmë të zbardhjes së kësaj historie na vjen një personazh krejt, krejt i veçantë. Quhet Riza Hicka dhe është hetuesi i asaj dosjeje që ka plasur në media pas 25 vjetësh. Juristit që hetoi dosjen në fjalë i kujtohet shumë mirë ajo ngjarje e vitit 1981. Në atë kohë nuk ishte e rrallë për një hetues të kishte të bënte me keqbërës apo gjithëfarësoj. Por të kishte në një çështje të madhin Kadare, patjetër që ishte më shumë se e rrallë. I kujtohet edhe detaji më i hollë. Si filloi ajo, kush denoncoi, çfarë akuze dhe pranimi i saj nga Renato Rrapi, dhe si vendosi ta pushojë çështjen. Por i habitur me versionin e ri që vjen pas dy dekadash e gjysmë, Hicka hedh në tavolinë një fakt shumë kokëfortë: "Kadare më ka kërkuar mua me shkrim që ta liroja Renato Rrapin", thotë ish-hetuesi. Një fakt që nuk kërkon shumë komente. Madje, juristi i njohur kërkon të zbardhet publikisht dhe të bëhet publike e gjitha dosja që ka hetuar në atë kohë. "Jo vetëm fjalët e mia, por edhe fletët e asaj dosjeje do të vërtetojnë se Kadare nuk ka më të voglin implikim dhe dashakeqësi ndaj atij djali", shton Hicka. Në një intervistë ekskluzive për gazetën "Tirana Observer", Riza Hicka rikthen edhe një herë ngjarjen në fjalë. Përse e caktuan atë për të hetuar këtë çështje. Si e gjeti të shkatërruar derën e apartamentit të Kadaresë. Arrestimi i Renatos dhe çfarë i tha në hetuesi kur e mori në pyetje. Dhe në fund, lirimi pas këmbënguljes së Kadaresë. Një intervistë që hedh dritë më shumë për një ngjarje që po përflitet shumë.
Sipas informacioneve tona, ju zoti Hicka keni qenë hetues i çështjes së Renato Rrapit, një personazh që në fillim të viteve '81 ka pasur një çështje penale. Në median e sotme, e ëma e tij, Janulla, tregon historinë sipas variantit të saj. Ç'mund të na konfirmoni ju pasi keni qenë hetues i kësaj çështjeje?
Gjatë gjithë këtyre ditëve kam lexuar shkrime të tilla nga shumë personazhe, që në atë kohë edhe kanë drejtuar, dhe ju them, se këto janë fakte që s'mund t'i mohojë asnjeri, se duke qenë hetues që mbuloja rajonin e tretë, kam qenë hetuesi i parë që kam kontaktuar dhe jam marrë me këtë çështje. Ngjarja ka ndodhur, mos gaboj, në vitet '81-82. Më kujtohet mirë se s'ka qenë unifikuar Hetuesia, s'ka qenë krijuar Hetuesia e Përgjithshme. S'e mbaj mend ekzaktësisht datën, pasi ajo ishte çështje rutinë në atë kohë edhe pse lidhej me zotin Kadare, por më vonë u bë bujë më shumë, sepse si duket veprimet e kundërligjshme të kryera nga nënë e bir vazhduan dhe më vonë, dhe i hetuan edhe hetues të tjerë.
Kush jua caktoi çështjen?
Mua më ka thirrur kryetari i Hetuesisë së asaj kohe, i ndjeri Koço Josifi, i cili më tha se duhet të veja të bëja një këqyrje në banesën e Kadaresë, pasi i ishte goditur dera e shtëpisë. Nuk e mbaj mend ditën, se kanë kaluar shumë vite, por më kujtohet se kam vajtur me gjithë ekspertët dhe kemi bërë këqyrjen e derës, e cila ishte shumë e dëmtuar.
Në ç'formë ishte dëmtuar?
Ato dyer që të gjithë i mbajmë mend se si ishin atëherë, ishin me kompensata dhe ishin të çara me goditje të forta. Mbaj mend, se dera kishte vrima të mëdha. Ekspertët me ç'e mbaj mend unë, atëherë e përcaktuan se vrimat ishin bërë me gur.
Bëhet fjalë, në shtëpinë e Kadaresë te Pallati i Shkrimtarëve?
Banesa që ka pasur Kadareja, pallati ku rri sot Dritëro Agolli. E mbaj mend, se ka qenë një kat më poshtë Dritëroit, i bie kati i tretë më duket.
Me kë kontaktuat aty?
Aty kam gjetur zotin Kadare, motrën e tij dhe duhet të ketë qenë para orës 14:00, para se të mbaronte orari zyrtar i punës.
Çfarë biseduat me Kadarenë në ato momente?
Më kujtohet se ishte shumë i shqetësuar. Të thuash të vërtetën, në atë kohë s'kishe kurajën të godisje derën e Kadaresë, jo se përfaqësonte Kadareja një figurë politike të madhe, por se ishte një figurë shoqërore, një nga shkrimtarët më të mëdhenj që ishte njohur dhe në botën jashtë, dhe pa i hyrë me themel këtyre gjërave, unë mendoja se shteti e mbronte në atë kohë. Kisha një mendim, që s'besoj se e kisha vetëm unë, por cilido nëpunës i asaj kohe mendonte se ky njeri me gjithë këto cilësi duhej të mbrohej nga shteti. Më pas e kuptova që kishte gjëra të tjera, që unë dua t'i them kur të vijë momenti. Kadareja nuk mbrohej nga shteti, por sulmohej ashpër nga segmente të caktuara të shtetit.
Pse sipas jush, Kadareja sulmohej në atë kohë?
Unë s'dua të hyj në thellësi, të analizoj gjërat. Por, ama di që kishte njerëz të niveleve të ulëta në administratë, që kishin kurajë dhe e shanin në mënyrën më të ashpër në atë kohë kur Kadare ishte idhull për të gjithë shqiptarët. S'e kuptoj pse e bënin atë dhe nga kush ndiheshin të mbrojtur.
Kur u ndalua Renato?
Unë mbaj mend se po atë ditë ne kemi bërë ndalimin e Renatos.
Sa vjeç ishte Renato?
Mos gaboj, ishte student në universitet, në vit të parë, në mos gaboj. Por jam i sigurt që ai ishte në moshë që të merrte përgjegjësinë penale.

vazhdon