[pokeri]

O miku im Guri...

-Puna e këtyre dy kolosëve të kulturës shqiptare nuk është "sfidë" për ne të vegjlit. Është punë Titanësh, fërkim i figurave ëmblematike të kohës. Prandaj nuk është aspak e thjeshtë "të përjashtosh njërin e ta përqafosh tjetrin", sepse në këtë mënyrë do të mund të "përjashtonim" vetëm vetën tonë.
Çfarë dua të them!
Në intervistën e Ismail Kadaresë dhënë RTK para 3-4 ditësh veç tjerash ai e tha këtë:
-Shqiptarët janë Evropian edhe si mysliman, katolik, ortodoks, protestant, budistë, ateistë etj. Feja nuk është një "element" përcaktues se je apo nuk je Evropian. Identiteti evropian i shqiptarëve nuk duhet vënë në dyshim për këtë "difekt"!
Nëse qenka kështu, atëherë si mund të qëndroj "grishja" e një konvertimi masiv? Nuk e besoj që Kadare kaq shpejtë ta ketë ndryshuar "pikpamjen" e tij rreth kësaj çështjeje! Mund të jetë nxjerrë nga konteksti, gjë që e bën shumë diskutabile gjithë "rrëmujën" e krijuar pastaj.
Pra, Kadare e sheh shqiptarin me identitet evropian edhe si mysliman. Ai për vete e tha: Jam me origjinë myslimane. Nuk tha se ishte konvertuar, sepse po të ishte do ta pohonte. Mirëpo më shumë ngjanë që sot të jetë ateist. E drejtë e secilit, pra edhe e tij.
Çfarë dua të them? Zënia e një pozicioni Pro-Kundër cilit do qoftë mund të na sjell në situata kur subjektiviteti ynë nuk do të mund ta mund vetvetën! Andaj, kur titanët grinden, ne të "vegjlit" nuk duhet të ndërhyjmë. Që të dy kanë një bagazh të jashtëzakonshëm, dhe paraqesin pasuri për kulturën tonë. Polemika ka pasur gjithnjë, edhe për çështje më të parëndësishme. Po ta lexosh librin e R. Kelmendit "Fytyra dhe turinj" e kupton lehtë se me çfarë zjarri polemizonin gjigantët e kulturës sonë dikur (Konica, Noli etj).
Ne shqiptarët i duam dhe i respektojmë vetëm të vdekurit! Prandaj, kur të vdesin edhe këta dy do t'i harrojmë zënkat dhe polemikat, do t'i mbajmë në mend veprat e mëdha që na i lanë. E kjo nuk mund të mohohet. Pas njërit dhe tjetrit do të mbeten veprat e tyre të jashtëzakonshme. Shyqyr!