[Drinni]

Çeku merr mbështetje italiane për pavarësinë


Data e Publikimit: 21/11/2006

Autori i Lajmit:
L.M

Kryeministri i Kosovës Agim Çeku ka vizituar të hënën Romën në vazhdim të turneut të tij në disa kryeqytete evropiane për të ndikuar lidhur me vendosjen sa më shpejt të statusit të Kosovës.

Në Romë zoti Çeku u takua me ministrin e Jashtëm italian Massimo D'Alema.

Pas takimit zoti D'Alema rikonfirmoi qëndrimin e shprehur të Italisë në favor të një pavarësie të kufizuar të Kosovës.

Zoti D'Alema ofroi mbështetjen italiane për zhvillimin e Kosovës pas marrjes së statusit, mbështetje që u vlerësua nga kryeministri kosovar.

Besojmë që Kosova do të jetë vend i pavarur, por me prezencën ndërkombëtare kuptohet se sovraniteti do të jetë i kufizuar nga kompetencat e vogla, por kompetenca që do t'i ketë prezenca ndërkombëtare.

"Në shtegëtimin tonë drejt Evropës është mëse e nevojshme mbështetja dhe përfshirja e Italisë," tha zoti Çeku.

"Kosova ka dhe do të ketë nevojë për lidershipin diplomatik të Italisë, për profesionalizmin ushtarak dhe policor të tyre dhe për partneritetin ekonomik," tha kryeministri kosovar.

Zoti Çeku rikonfirmoi bindjen e tij se çështja e statusit të Kosovës do të zgjidhet së shpejti në favor të shqiptarëve, por tha se prania ndërkombëtare në Kosovë do të vazhdojë.

"Besojmë që Kosova do të jetë vend i pavarur, por me prezencën ndërkombëtare kuptohet se sovraniteti do të jetë i kufizuar nga kompetencat e vogla, por kompetenca që do t'i ketë prezenca ndërkombëtare," tha zoti Çeku në Itali.

Jo zvarritje

Presidenti i Kosovës, Fatmir Sejdiu dhe kreu i opozitës, Hashim Thaçi, kanë shprehur besimin e plotë se procesi i zgjidhjes së statusit të Kosovës nuk do të zvarritet dhe se garanci, sipas tyre, është deklarata e kryenegociatorit të OKB-së Martti Ahtisaari për paraqitjen e propozimit të tij menjëherë pas zgjedhjeve në Serbi.

Ata thanë se janë të gatshëm për statusin e Kosovës dhe se sfida më e madhe do të jetë funksionimi i një shteti demokratik.

Zoti Sejdiu e zoti Thaçi pohuan se po bëhen të gjitha përgatitjet për të përfunduar punën rreth hartimit të një kushtetute të re të Kosovës, dhe u angazhuan për ruajtjen e stabilitetit të Ekipit të Unitetit, për ngritjen kapaciteteve shtetformuese dhe për forcimin e lidhjeve me faktorin ndërkombëtar.

Ndërkohë, shefi i zyrës ruse në Prishtinë, Andrej Dronov, ka deklaruar se qëndrimi i vendit të tij për Kosovën nuk ka ndryshuar që nga takimi i fundit i Grupit të Kontaktit në Nju Jork në shtator të këtij viti.

Ai ka thënë se qeveria Ruse është e bindur se statusi për Kosovën duhet të jetë i pranueshëm për të gjitha palët dhe se ai duhet të jetë i negociuar.

Zoti Dronov ka thënë se në të kundërtën çdo zgjidhje tjetër do të ishte e paqëndrueshme.

Shefi i zyrës ruse në Prishtinë ka thënë se qëndrimi zyrtar rus do t'i paraqitet kryeminstrit Agim Ceku, kur të vizitojë Moskën zyrtare nga fundi i këtij muaji.