[Dilaver]

I DERGUARI I RI I ZOTIT?

Blerim Latifi

Komedia politike vazhdon të jetë pjesë e fjalorit politik në Kosovë.

Në debatet publike që sot zhvillohen në Kosovës mes shumë e shumë gjërave që nuk shkojnë hetohet edhe një lloj keqpërdorimi i terminologjisë e cila në pjesë më të madhe të saj vjen nga fushat e shkencave humane, duke përfshirë këtu edhe filozofinë. Ky keqpërdorim është konsekuencë e”lehtësisë së padurueshme”me të cilën operacionalizohen nocionet e ndryshme në diskursin publik, qoftë politik apo medial.
Janë të shumta nocionet të cilat keqpërdoren, por këtu do të ndalem në njërin prej tyre. Fjala është për nocionin e “karizmës”.
Kanë filluar ta përdorin të gjithë, vend e pa vend, për ta përshkruar personalitetin e akëcilit individ. Për më tepër vetë individ të caktuar kanë filluar të vetëshpallen “persona karizmatik”. I fundit prej tyre është Daut Haradinaj, vëllai i Ramush Haradinajt, i kyçur në politikë kohëve të fundit.
Në një intervistë ai u shpreh : “unë e kam karizmin time”. Nga leximi i fjalisë së tij hetohet se ai e përdorë këtë nocion pa e ditur fare domethënien e tij dhe në këtë mënyrë bie në lajthitje dhe na bën për të qeshur me të. Vetëshpallja karizmatik tregon injorancën e tij të plotë rreth këtij nocioni se po ta dinte vetëm pak se çka do të thotë ky nocion me siguri që do të ishte më i kujdesshëm. Termi “karizmë”është term i greqishtes së vjetër dhe i takon fjalorit të teologjisë kristiane. Domethënia e tij është religjioze: karizma është dhurata e shpirtit të shenjt. Zoti i përzgjedh në mesin e njerëzve disa të cilët i pajisë me cilësi të jashtëzakonshme, cilësi të cilat i dallojnë ata nga njerëzit e tjerë. Falë këtyre cilësive këta të përzgjedhur të Zotit, pra karizmatikët, kryejnë vepra heroike, të jashtëzakonshme në histori, apo në jetën sociale. Me këtë term rëndom cilësohen profetët, themeluesit e religjioneve, por edhe udhëheqësit e mëdhenj politik të cilët ndikojnë në ndryshimin e rrjedhave të historisë botërore. Kjo është karizma.
Tash shtrohen pyetjet : si na argumenton Daut Haradinaj se ai është përzgjedhur nga Zoti? Me çka mund të dallojmë tek ai dhuratën e shpirtit të shenjtë? Cilat janë cilësitë e tij të jashtëzakonshme të cilat nuk i posedojnë kosovarët e tjerë? Nëse ai do të mund të përgjigjet në mënyrë të argumentuar në këto pyetje atëherë deklaratën e tij se “unë e kam karizmën tim”do të mund ta merrnim seriozisht.
Po e lëmë Jeruzalemin e Mekën dhe po kthemi nga kulla e tij në Gllogjan për lutje.
Nëse jo, atëherë konkluzioni se kemi të bëjmë me një njeri të padijshëm dhe qesharak është i paevitueshëm. Se cila ka gjasë të jetë e vërteta le ta vlerësojnë vetë lexuesit.