[Arb]

Beteja historike e Koshares

Prishtinë, 9 prill - 9 prillin presidenti i Kosovës, Fatmir Sejdiu, e vlerësoi si ditë tejet të rëndësishme për Kosovën, pasi, siç tha ai, pikërisht nga kjo ditë shqiptarët e të dyja anëve të Bjeshkëve të Nemuna qarkullojnë lirisht, shkojnë të papenguar nga askush për vizitë vëllai te vëllai, miku te miku.

Në akademinë solemne me rastin e 8-vjetorit të Betejës së Koshares, presidenti Sejdiu i çmoi lart udhëheqësit e kësaj beteje, Sali Çekaj dhe Agim Ramadani. “Secili komb i ka disa ditë të veçanta, të cilat e bëjnë atë të ndihet më krenar për të kaluarën e vet dhe më të sigurt për të ardhmen.

Një ditë e tillë për Kosovën është 9 prilli. Në këtë datë të shënuar ra muri berlinez ndërshqiptar, me Betejën e Koshares, së cilës i prinë strategët e luftës për liri Sali Çekaj e Agim Ramadani”, tha Sejdiu.

Më 9 prill 1999, derisa forcat ajrore të NATO-s, të udhëhequra nga Shtetet e Bashkuara të Amerikës, po vazhdonin fushatën e bombardimeve të pozicioneve serbe, Sejdiu tha se 114 dëshmorët e Brigadës 138 të UÇK-së po shkruanin me sakrificën e tyre njërën prej rrëfimeve më të madhërishme të luftës për lirinë dhe pavarësinë e Kosovës.

Sipas tij, ata i dhanë goditjen më të rëndë pushtuesit, duke e fshirë njëherë e përgjithmonë gurin e huaj nga kufiri, që pothuajse gjatë tërë shekullit XX i ndau si me shpatë shqiptarët nga njëri-tjetri. Duke e vlerësuar si datë të lavdishme për shqiptarët, presidenti Sejdiu theksoi se 9 prilli shënjoi një fitore tepër të rëndësishme edhe në planin strategjik ushtarak.

“Historia më e re e Kosovës nuk do të mund të shkruhej pa i dhënë një vend meritor kësaj beteje madhështore dhe burrave që e drejtuan me aq guxim e mençuri atë, Sali Çekajt dhe Agim Ramadanit.

Ndonëse katrahurat e jetës e kishin shtyrë të merrte Perëndimin në sy, veprimtari Sali Çekaj, jurist, politikan, ushtarak e vizionar, ishte ndër të parët që u mor me përgatitjen e rezistencës së armatosur në Kosovë, pasi që Serbia i kishte mbyllur të gjitha portat e një zgjidhjeje politike e paqësore”, tha Sejdiu.

Më tej, Sejdiu përmendi edhe prirjen e Agim Ramadanit, për krijimtari: “Agim Ramadani, oficer karriere, sypatrembur në frontin e luftës për liri, pati edhe sens krijuesi. Poezia dhe piktura ishin vokacion i tij shpirtëror.

Aty ai e sublimoi botën e ndjenjave të veta të çiltra, lajtmotiv i të cilave qe liria e atdheut. Me këso virtytesh janë të privilegjuar vetëm njerëzit e mëdhenj, ata që në traditën tonë të pasur etnokulturore njihen me atributin burra të dheut”.

Sejdiu më tej shtoi se për meritat e tyre të jashtëzakonshme në luftën për lirinë e Kosovës, Presidenti historik Ibrahim Rugova i nderoi Çekajn dhe Ramadanin me urdhrin më të lartë të vendit tonë, “Hero i Kosovës”.

Sipas Sejdiut, Presidenti Rugova kështu dëshmoi se Kosova di t’i nderojë bijtë e vet dhe idealin për të cilin ata u flijuan dhe se kultura shtetërore e saj, ndonëse jo pa vështirësi të shumta, tashmë ka nisur të krijojë traditën e vet të mëvetësishme institucionale.

Ai, ndërkohë, bëri një përmbledhje të zhvillimeve rreth statusit të Kosovës, të cilta i cilësoi se po zhvillohen “ashtu siç e do shumica absolute e qytetarëve të Kosovës dhe e gjithë bota demokratike, ashtu siç e deshën dëshmorët e Koshares dhe të gjithë dëshmorët e tjerë që ranë për lirinë e atdheut”.

Para shumë të pranishmëve, Sejdiu premtoi se do të angazhohen që, siç tha ai, monumentet, lapidarët dhe mjediset përkujtimore kushtuar atyre të mirëmbahen e të trajtohen ashtu siç i ka hije një vendi që synon integrim të plotë në Bashkimin Evropian, në NATO dhe në mekanizmat e tjerë ndërkombëtarë. “Ky është një borxh yni i natyrshëm, të cilin duhet ta kemi gjithmonë në mendje”, nënvizoi Sejdiu.

Presidenti Sejdiu në fund tha se “Kosova e pavarur ishte ëndrra për të cilën u flijuan të gjithë dëshmorët tanë. Ky ishte ideali i tyre suprem, para të cilit ne përkulemi përjetësisht”. Të pranishëm në këtë akademi ishin familjarë të dëshmorëve, zyrtarë të lartë institucionalë, por jo edhe përfaqësues nga opozita.

Agim Ramadani dhe Sali Çekaj janë komandantët që udhëhoqën Betejën e Koshares, e cila vlerësohet ndër më të lavdishmet për Ushtrinë Çlirimtare të Kosovës, me ç’rast është thyer kufiri ndërmjet Kosovës dhe Shqipërisë.

Besnik RAMADANAJ, IP