[Arb]

Simbolet shterpe që s’identifikojnë asgjë

Nuk duhet harruar përvoja boshnjake. Nga vonesa dhe gjumi i rëndë i Grupit të Unitetit, simbolet shtetërore mund të na shpijnë drejt shumetnicitetit apo ndonjë imponimi të bashkësisë ndërkombëtare, që më pastaj, edhe ne si intelektualët boshnjakë, do ta identifikonim me ndonjë objekt “qorr”. Shteti i Bosnjë e Hercegovinës ka tri kushtetuta; Kushtetutën e Federatës së Bosnjë e Hercegovinës, Kushtetutën e Bosnjë e Hercegovinës dhe Kushtetutën e Republikës Serbe.

Ka një flamur që intelektualët boshnjakë, të irrituar nga imponimi i bashkësisë ndërkombëtare, patën deklaruar se flamuri i tyre i ngjet më shumë detergjentit dhe se nuk shpreh asgjë që lidhet me vullnetin politik të popullit boshnjak.

Udhëhiqen sipas parimit të vetëqeverisjes, që u nxjerr shumë probleme, etj. Në Kosovë, ndër të tjera, e ngjashme do të jetë “puna e simboleve shtetërore” dhe decentralizmi.

Në Pakon e Ahtisaarit sa i përket definimit të simboleve shtetërore kemi shumetnicitetin, të cilin, sipas Ahtisaarit, duhet ta shprehin simbolet shtetërore të Kosovës.

Nga kjo rrjedh qartë fakti se në definimin e simboleve do të jetë ekzistenciale edhe përbërja e minoriteteve, që mund të shënjojë një Bosnjë të dytë. Madje, Grupi i Unitetit është pajtuar të mos ketë më shqiponjë në flamurin e shtetit të Kosovës!

Ka indikacione se Grupi i Unitetit ka pasur bisedime të vazhdueshme me bashkësinë ndërkombëtare për simbolet shtetërore të Kosovës dhe miratimi i tyre do të jetë vetëm formalitet. Ajo nuk do të diskutohet, nuk do të ketë debat!

Flamuri i Presidentit Rugova, së paku shprehte karakterin nacional të popullit shqiptar, që shënjonte atë kosovar. Madje, jo vetëm shqiptar, por edhe atë historik, duke përmbledhur brenda saj historinë ilire-dardane të trashëguar deri te ne.

Tani flitet për lloj-lloj konkursesh shterpe me kritere të caktuara nga Grupi i Unitetit. Në takimin e fundit, Grupi i Unitetit sërish e shtyu vendimin me pretekst të mosngutjes.

Nuk duhet harruar përvoja boshnjake. Nëse vëren me kujdes diskursin politik të politikanëve në raport me simbolet kombëtare, përkatësisht të flamurit të Kosovës, asnjëri nga ta nuk e thotë hapur se simbolet kombëtare do ta shprehin karakterin shumetnik të Kosovës, të propozuar nga Pakoja e Ahtisaarit.

Ata vetëm e përmendin dhe u kthehen sërish qëndrimeve subjektive, duke mos guxuar të thonë që flamuri i Kosovës do të shprehë vullnetin e popullit shumicë të Kosovës.

Arbër A. Rexhaj, IP