[Era1]

Çamët, negociata me zëvendësin e Janullatos

Për shkak se kanonet e shenjta të Kishës Ortodokse ndalojnë “lutjet ndërfetare”, komuniteti çam fton Kryepeshkopin Anastas Janullatos, të zhvillojë një meshë të veçantë në përshpirtje të viktimave të kësaj popullsie martire. Pasi u njoh me qëndrimin e Sinodit të Shenjtë e në respekt të përgjigjes së tij, ky komunitet kërkoi dje nga Hirësia e tij që të zhvillojë një lutje, kësaj here jo të përbashkët me komunitetet e tjera fetare, por në një ceremoni të veçantë në kishë, në përputhje me të gjitha rregullat e shërbesave kishtare ortodokse. Ndërkaq nga ana tjetër, Partia për Drejtësi dhe Integrim që mbron të drejtat e çamëve, nëpërmjet kreut të saj, Tahir Muhedini bëri po dje të ditur për gazetën, se kërkesa drejtuar Kryepeshkopit Janullatos për të marrë pjesë në një “lutje ndërfetare”, nuk ka pasur sipas tij “qëllimin e implikimit të kishës në lojëra politike. Pasi PDI-ja thjesht doli në mbështetje të një kërkese të komunitetit çam, që iu drejtua katër baballarëve të feve në Shqipëri për t’iu lutur Zotit së bashku, që të tregohet në atë botë me viktimat e pafajshme shumë më dashamirës se sa u treguam ne në këtë jetë dhe asgjë më tepër”, - sqaroi Muhedini. Madje në funksion të këtij qëndrimi, kreu i PDI-së bëri gjithashtu të ditur se këtë sqarim ai ia kishte paraqitur personalisht edhe zëvendësit të Kryepeshkopit, Episkop Andonit, në një takim konfidencial që ata kanë zhvilluar pak ditë më parë. “Në këtë takim ne bëmë të ditur se prapa kësaj ftese të sinqertë të komunitetit çam, të cilën ne thjesht e mbështetëm, nuk fshihen aspak qëllimet tona politike, pasi të drejtat e çamëve ne do t’i zgjidhim sipas të gjitha rregullave dhe ligjeve ndërkombëtare, duke iu drejtuar të gjitha instancave kombëtare dhe ndërkombëtare”, - shtoi më tej Muhedini. Ai pohon se bashkëbiseduesi i tij nuk i ka premtuar asgjë, por i ka deklaruar se do t’ia paraqiste pretendimin e tij, kryepeshkopit Janullatos. Ndërkaq, krerët e komuniteteve të tjera fetare, respektivisht ai mysliman, Haxhi Selim Muça, Kryeipeshkvi, Imzot Rrok Mirëdita si edhe Kryegjyshi Botëror i Bektashinjve, Haxhi Dede Reshat Bardhi, do të zhvillojnë sot një ceremoni të përbashkët fetare në përkujtim të viktimave të popullsisë martire çame. Të pranishëm në këtë aktivitet pritet të jenë edhe Presidenti Moisiu, kryeparlamentarja Topalli, kreu i PS-së, Rama si edhe shumë figura të tjera të politikës. Kurse kryeministri Berisha, duke mos mundur dot të marrë pjesë në këtë aktivitet për shkak të angazhimeve të tij jashtë vendit, i ka dërguar një mesazh përshëndetës komunitetit çam, ku nderon vuajtjet e kësaj popullsie martire.

Nga Gazeta Shqiptare