[jonuzi]

SHBA-të përgjithmonë në Kosovë


Serwer: Asnjë gjykatë nuk mund t’u tregojë SHBA-ve se cilin shtet duhet ta njoh

Eksperti Daniel Serwer, nga Instituti i Shteteve të Bashkuara për Paqe, me seli në Uashington, thotë se vizita e nënpresidentit Joe Biden, “paraqet riafirmim të mbështetjes së pavarësisë së Kosovës”. I pyetur për qëllimin e vizitës në Kosovë dhe Ballkan, z. Serwer, tha se shpreson se z. Bajden, do të riafirmojë mbështetjen për pavarësinë e Kosovës dhe integritetin e saj territorial. Ndërsa, i pyetur se nëse Kosova dhe në përgjithësi Ballkani po bëhen përsëri prioritete të larta të administratës së Shteteve të Bashkuara, eksperti politik amerikan tha se megjithatë SHBA-të, kanë prioritete më të larta, si Iraku, Afganistani, Irani, Lindja e Mesme dhe Koreja Veriore. “Që të gjitha ato vijnë para Ballkanit”, tha ai.
Ndërsa, i pyetur për praninë e ardhshme, si politike, ashtu dhe ushtarake të Shteteve të Bashkuara në Kosovë, Server tha se beson se ajo politike do të jetë përgjithmonë. “Politikisht mendoj se Shtetet e Bashkuara do të jenë atje edhe për një kohë të gjatë. Përgjigjja e saktë mund të jetë - përgjithmonë. Ndërsa, në aspektin ushtarak, mendoj se forcat tona janë të reduktuara në nivelin më të ultë. Por, mendoj se ne duhet ta vazhdojmë praninë tonë ushtarake atje derisa Prishtina dhe Beogradi të arrijnë një pajtueshmëri të ndërsjellë”, tha Server për Radion Evropa e Lirë.
”Mendoj se EULEX-i është misioni kryesor ndërkombëtar, që ka një mbështetje reale dhe energji pas vetes. Mendoj se administrata e Kombeve të Bashkuara duhet të reduktohet dhe po ashtu mendoj se Qeveria e Kosovës duhet vetë të qeverisë plotësisht. Ka vetëm fusha të caktuara, si krimet ndëretnike, të cilat kërkojnë ndërhyrjen ndërkombëtare, andaj Qeveria e Kosovës duhet ta vazhdojë punën e vet dhe të qeverisë mirë”, tha Server duke u përgjigjur për rolin e misioneve ndërkombëtare në Kosovë, atij të EULEX-it dhe të UNMIK-ut në reduktim, si dhe të Qeverisë së Kosovës. Ai thotë se do të ishte më mirë po të ishte njohur Kosova nga 100 shtete. Ndërsa, i pyetur për ndikimin që mund të ketë në procesin e njohjeve Gjykata Ndërkombëtare e Drejtësisë, ndërsa nuk e përjashton mundësin e ndikimit, Server thotë: “Mendimi im personal është se asnjë gjykatë nuk mund t’u tregojë Shteteve të Bashkuara se cilin shtet mund ta njohin dhe cilin jo. Do të isha shumë i befasuar po qe se ka përpjekje të këtilla”. / B.S.