[Arb]

Ibrahim Rugova e Adem Jashari - janë dy figura të rëndësishme të Kosovës për liri dhe pavarësi, tha Mustafaj

Prishtinë, 18 dhjetor - Para largimit nga Kosova, Ministri i jashtëm i Shqipërisë, Besnik Mustafaj vizitoi familjen Rugova dhe u përkul para varrit të Presidentit Ibrahim Rugova. Një gjë të tillë e bëri edhe në Prekaz para varrezave të të Jasharajve.

Ai me këtë rast vlerësoi se Ibrahim Rugova e Adem Jashari janë dy figura të rëndësishme të rezistencës së popullit të Kosovës për liri dhe pavarësi.

Me këtë gjest diplomati shqiptar Mustafaj shprehu admirimin e tij për rezistencën paqësore dhe luftën çlirimtare të Kosovës. Ai ka tha se Kosova ka vetëm një histori. "Nuk ka dy histori. Kosova ka vetëm një histori, e cila është historia e një populli që ka ditur ta ndërtojë rezistencën e tij me të gjitha mjetet që kërkonte mbijetesa në rrethana tragjike".

Ministri i jashtëm shqiptar, Presidentin Rugova e vlerësoi si njeri të madh dhe me një vizion që ndër shqiptarët e shekullit XX vetëm ai e pati.

Ndërkaq, në Prekaz ai tha se një popull që nuk ka dëshnorët e tij, nuk mund të ketë as të ardhmen e sigurtë.

"Dua të them me sinqeritetin më të madh se të gjithë qytetarët e Kosovës, të të gjitha etnive duhet të mishërohen te Rugova dhe Jasharajt, sepse një Kosovë e pavarur është një Kosovë e të gjithë atyre që do të jetojnë në Kosovë".

Ministri i jashtëm shqiptar, Besnik Mustafaj gjatë qëndrimit të tij treditorë në Kosovë rikonfirmoi se Tirana zyrtare mbështetë pavarësinë e Kosovës si të vetmen zgjidhje për stabilitetin në rajon. Ai po ashtu i bëri thirrje klasës politike që të tregohet unike dhe të flasë me një zë para komunitetit ndërkombëtar, ndërsa kërkoi nga populli i Kosovës që të tregojë maturi deri në përcaktimin e statusit të Kosovës.

"Nderimi i popullit të Kosovës dhe besimi tek e ardhmja dhe politikanët e vet janë nderim për historinë e shkruar me gjak", ka thënë Mustafaj. Sipas tij Kosova e ka kaluar historinë e luftës dhe para vetes tashmë e ka historinë e diplomacisë.

QIK-u