[Dilaver]

Hollbruk: Kosova ndoshta nuk do të ekzistonte sot pa vizionin dhe këmbënguljen e Rugovës

Uashington, 25 janar - Ish ambasadori amerikan në Kombet e Bashkuara Riçard Holbruk, një nga diplomatët që ka luajtur një rol qendror në Ballkan, gjatë viteve 90 tha se Presidenti Ibrahim Rugova ishte një udhëheqës i jashtëzakonshëm. Hollbruk deklaroi për "Zërin e Amerikës" se populli i Kosovës ishte me fat që u drejtua nga një njeri i tillë dhe tani duhet të punojë për të realizuar ëndrrën e Presidentit Rugova për pavarësi.
Hollbruk përmbledh me pak fjalë rolin e rëndësishëm të Presidentit Rugova për Kosovën: "Kosova ndoshta nuk do të ekzistonte sot pa vizionin dhe këmbënguljen e tij".
Hollbruk e njihte mirë Presidentin Rugova dhe për të shprehur kujtimet e tij sjell vetëm një detaj.
"Gjithmonë do ta kujtoj që kur e takova, ai kishte shallin e tij të përhershëm dhe tha se nuk do ta hiqte deri kur Kosova të ishte e lirë. Më vonë, kur shkova përsëri në Prishtinë e pashë pa shall në qafë. Ishte diçka e mrekullueshme. Ai ishte një njeri i madh dhe populli i Kosovës ishte me fat që e kishte atë si udhëheqës".
Hollbruk shpreh besimin se trashëgimia e Presidentit Rugova do të mbetet dhe se shpreson që shqiptarët të bashkohen për të punuar drejt qëllimit për të cilin u përpoq presidenti Rugova.
"Shqiptarët e Kosovës kanë një mision historik për të plotësuar. Tani aq më tepër si një nderim ndaj kujtimit të doktor Rugovës".
Ambasadori Hollbruk është optimist për të ardhmen e bisedimeve për Kosovën, duke vlerësuar lart diplomatët ndërkombëtarë që janë caktuar për të ndërmjetësuar.
"Si Shtetet e Bashkuara, ashtu edhe Kombet e Bashkuara kanë emëruar emisarë të shkëlqyer. Marti Ahtisaari është shumë i zoti dhe i dërguari amerikan, Ambasadori Frenk Uizner, të cilin e njoh prej kohësh, që kur kemi qenë bashkë në luftën e Vietnamit, është një nga diplomatët më të zotë në historinë moderne të diplomacisë amerikane. Kështu mendoj se ekipi i Ahtisaarit dhe Wisnerit do të ketë një rol shumë të madh për zgjidhjen e këtij problemi të vjetër, tha Hollbruk.
Por si e parashikon zoti Hollbruk Ballkanin, në të ardhmen?
"Endrra ime është që Ballkani të jetë një grup vendesh të pavarura, të lidhura në një zonë të përbashkët ekonomike dhe që të futen të gjitha në Bashkimin Evropian përfshirë Shqipërinë, Kosovën, Serbinë, Malin e Zi, Bosnje Hercegovinën dhe Kroacinë".