[Dilaver]

Moisiu, Berisha e Topalli, të tre në varrimin e Rugovës. Presidenti dhe kryeministri në një avion

Krerët e shtetit thyejnë protokollin


Nevila Perndoj

TIRANË- Asnjë shtetar i lartë, siç e kërkon protokolli, nuk do të jetë në Shqipëri ditën e enjte, ku në Prishtinë do të zhvillohet ceremonia mortore në nderim të presidentit Ibrahim Rugova. Mbrëmë është konfirmuar edhe përbërja e delegacionit shtetëror që do të kryesohet nga presidenti Alfred Moisiu, për të vijuar më pas me kryeministrin Sali Berisha, kryetaren e Kuvendit, Jozefina Topalli, ministrin e Jashtëm, Besnik Mustafaj, ish-presidentin Rexhep Meidani (ky i fundit është jashtë vendit), kryetarin e grupit parlamentar të PD-së, Bamir Topi dhe atë të PS-së, Pandeli Majko. Mendohet që ky është edhe delegacioni shtetëror që do të niset për në Prishtinë, ndërkohë që pjesëmarrja e Topallit në këtë delegacion është konfirmuar vetëm dje, nisur edhe nga fakti se në mungesë të presidentit dhe kryeministrit, në bazë të protokollit shtetëror, asaj i takonte që të qëndronte në Shqipëri. Por meqenëse bëhet fjalë për një rast tepër të veçantë, mësohet se edhe Topalli do të marrë pjesë në ceremoninë e varrimit, por nuk do të udhëtojë me të njëjtin avion që do të nisen presidenti Moisiu dhe kryeministri Berisha. Megjithatë, fakti që Berisha dhe Moisiu do të udhëtojnë në të njëjtin avion, ditën e mërkurë mbasdite, përbën një tjetër shkelje të protokollit, ndërkohë që burimet kanë saktësuar se ka qenë një zgjidhje e sforcuar, për shkak të motit të keq që do të mbajë ditën e enjte.