[Lona]

Deputeti shqiptar në Kuvendin e Serbisë i shqetësuar për militarizimin e Luginës së Preshevës

Preshevë, 27 nëntor Deputeti i vetëm shqiptar në Parlamentin e Serbisë, Riza Halimi ka shprehur shqetësim për vazhdimin e militarizimit të Luginës së Preshevës. Reagimi vjenë pas deklaratës së ministrit serb të Mbrojtjes, Dragan Shutanovac për dërgimin edhe të më shumë trupave ushtarake në Preshevë dhe Bujanoc. "Janë shqetësuese deklaratat e fundit se për shkak të pakënaqësisë me zgjidhjen e statusit të Kosovës do të bllokohet komunikimi. Kjo do të thoshte getoizim i plotë i shqiptarëve në këtë rajon dhe nuk do të sillte asgjë të mirë", ka thënë Halimi për mediat serbe.

Presidenti Sejdiu, me rastin Ditës së Flamurit, u drejtoi një mesazh qytetarëve të Kosovës

Prishtinë, 27 nëntor - Presidenti i Kosovës Dr.Fatmir Sejdiu, me rastin e 28 Nëntorit - Ditës së Flamurit, i ka drejtuar qytetarëve të Kosovës një mesazh urimi për këtë ditë të shënuar, duke theksuar se së shpejti Pavarësia e Kosovës do të shënojë realizimin e ëndrrës së parealizuar plotësisht të shqiptarëve për mëvetësi. Në këtë mesazh të Presidentit Sejdiu thuhet: - 28 Nëntori, Dita e Pavarësisë së Shqipërisë, që festohet kudo në zemrat shqiptare si Ditë e Flamurit, është datë e shënuar për kombin. Gjysma e kombit shqiptar doli shtet më vete pas shpalljes së pavarësisë shqiptare më 28 nëntor 1912 në Vlorë, para nëntëdhjetë e pesë vjetësh. Pavarësia e Kosovës, që është në prag, do të shënojë realizimin e ëndrrës së parealizuar plotësisht të shqiptarëve për mëvetësi, e cila është mbajtur gjallë edhe nga ditë të tilla të shenjta si Dita e Flamurit, që ka shpalosur identitetin autokton të popullit tonë. Tani, pavarësia jonë do t?u shërbejë të gjithë qytetarëve të Kosovës pa dallim etnie. Si shtet i pavarur e sovran, Kosova do të ketë atributet e veta të shtetësisë, duke lënë në zemrat e të gjithë neve dashurinë e madhe për Flamurin e Skënderbeut, që u rishfaq në Vlorë me binomin Ismail Qemali e Isa Boletini. Qyetarë të nderuar, gëzuar festa e 28 Nëntorit! Gëzuar pavarësia shqiptare! E gëzofshim së shpejti pavarësinë e Kosovës!, - thuhet në fund të mesazhit të Presidentit të Kosovës, Dr. Fatmir Sejdiu.

Presidenti Sejdiu përgëzon Presidentin Topi me rastin e Ditës së Pavarësisë së Shqipërisë

Prishtinë, 27 nëntor - Presidenti i Kosovës Dr.Fatmir Sejdiu, me rastin e 28 Nëntorit - Ditës së Pavarësisë, i ka dërguar Presidentit të Shqipërisë, Bamir Topi, një mesazh urimi me këtë përmbajtje: "Në emër të popullit dhe të institucioneve të Kosovës, ju përgëzoj nga zemra në 95 vjetorin e pavarësisë së Shqipërisë. 28 Nëntori, Dita e Pavarësisë së Shqipërisë, festohet kudo në zemrat shqiptare si Ditë e Flamurit, një datë e shënuar për kombin tonë të moçëm. Lufta e Gjergj Kastriotit, Heroit Kombëtar Shqiptar, luftërat e patriotëve tanw nëpër shekuj, lëvizja gjithëpërfshirëse indipendiste e Lidhjes së Prizrenit, u kurorëzuan me pavarësinë shqiptare të shpallur në Vlorë më 28 nëntor 1912. Pavarësia e Kosovës, që është në prag, do të shënojë realizimin e ëndrrës së shqiptarëve të Kosovës për mëvetësi, e cila është ushqyer e mbajtur gjallë edhe nga ditë të tilla të shenjta si Dita e Flamurit, që ka shpalosur identitetin autokton të popullit tonë. Tani, pavarësia jonë do t?u shërbejë të gjithë qytetarëve të Kosovës pa dallim etnie. Si shtet i pavarur e sovran, Kosova do të ketë atributet e veta të shtetësisë, duke ruajtur në të njëjtën kohë, në gjithë zemrat tona, dashurinë e madhe për Flamurin e Skënderbeut, që u rishfaq në Vlorë me binomin Ismail Qemali e Isa Boletini. I dashur President Topi, Gëzuar 28 Nëntori, Dita e Pavarësisë së Shqipërisë! E kremtofshim njëqindvjetorin e pavarësisë shqiptare me Shqipërinë e Kosovën të integruar në strukturat evropiane e atlantike, në familjen e vlerave perëndimore!", thuhet në fund të mesazhit të përgëzimit të Presidentit të Kosovës, Dr. Fatmir Sejdiu.