[Zana_ch]

Deklaratë e Sekretares së Shtetit, Condoleezza Rice për njohjen e pavarësisë së Kosovës


Sot, Shtetet e Bashkuara kanë njohur formalisht Kosovën si shtet sovran dhe të pavarur. Me këtë rast historik, ne i shprehim urime popullit të Kosovës.

Kryetari Bush i është përgjigjur pozitivisht një kërkese nga Kosova për të vënë marrëdhënie diplomatike mes dy shteteve tona. Vendosja e këtyre marrëdhënieve do të konfirmojë lidhjet e veçanta të miqësisë që kanë lidhur bashkë popullin e Shteteve të Bashkuara dhe Kosovës.

Para nëntë viteve, bashkësia ndërkombëtare, e prirë nga NATO-ja, ndërmori veprim për të ndërprerë sulmet brutale drejtuar kundër popullatës së shqiptarëve të Kosovës. Ky intervenim ndërkombëtar, i bërë me kohë, e ndërpreu dhunën, gjë që çoi tek vendimi i Këshillit të Sigurimit të Kombeve të Bashkuara për të suspenduar qeverisjen e Beogradit, dhe që vendosi Kosovën nën administrimin e përkohshëm të KB-ve. Që atëherë, Kosova ka ndërtuar institucionet e veta demokratike të ndara nga kontrolli i Beogradit. Vitin e kaluar, i Dërguari Special i KB-ve, Martti Ahtisaari zhvilloi një plan për të ndërtuar një Kosovë demokratike dhe mutlietnike, dhe rekomandoi që Kosova të jetë e pavarur, me një periudhë kohore të mbikëqyrjes ndërkombëtare. Duke pasur parasysh konfliktet e viteve të 90-ta të shekullit të kaluar, pavarësia është opsioni i vetëm i mundshëm për të promovuar stabilitetin në rajon. Shtetet e Bashkuara e përkrahin Planin e Ahtisaarit, dhe do të punojnë me partnerët ndërkombëtarë që të ndihmojnë në zbatimin e tij.

Ne mirëpresim përkushtimet që Kosova i ka shprehur në deklaratën e vet të pavarësisë për të zbatuar Planin e Ahtisaarit, për të përqafuar multietnicitetit si një parim fondamental të qeverisjes së mirë, dhe për të mirëpritur një periudhë të mbikëqyrjes ndërkombëtare.

Kombinimi i pazakonshëm i faktorëve në situatën e Kosovës – duke përfshirë këtu edhe kontekstin e shpërbërjes së Jugosllavisë, historinë e spastrimit etnik dhe krimet kundër civilëve në Kosovë, dhe periudhën e zgjatur të administrimit nga KB-ja – nuk është gjetur diku tjetër, prandaj këto e bëjnë Kosovën një rast të veçantë. Kosova nuk mund të shihet si precedent për asnjë situatë tjetër në botë sot.

Shtetet e Bashkuara e shfrytëzojnë rastin që të konfirmojnë miqësinë tonë me Serbinë, që ka qenë një aleat gjatë dy luftërave botërore. Ne ftojmë udhëheqësinë e Serbisë që të punojë së bashku me Shtetet e Bashkuara dhe partnerët tanë, për të arritur qëllimet e përbashkëta, siç janë mbrojtja e të drejtave, sigurisë, kulturës, dhe jetesës se bashkësisë serbe në Kosovë.

Gjersa Kosova fillon sot jetën e saj si një shtet i pavarur, Shtetet e Bashkuara zotohen se do të vazhdojnë të jenë mik dhe partner i ngushtë i saj, thuhet në deklaratën e Sekretares së Shtetit , Condoleezza Rice për njohjen e pavarësisë së Kosovës.
| s.b & RTK staff |