[Pupi]

MPB do të përshpejtojë nxjerrjen e dokumentacioneve për mërgimtarët kosovarë

Prishtinë, 20 qershor 2007 (Kosovapress) Koha 15:31

Ministria e Punëve të Brendshme (MPB) në bashkëpunim me Zyrën Kryesore të Regjistrimit Civil të UNMIK-ut, me qëllim të përshpejtimit të procedurës së prodhimit të dokumenteve të udhëtimit për qytetarët kosovarë që përkohësisht jetojnë jashtë Kosovës, e ka nxjerrë programin për përshpejtimin e procedurës për lëshuarën e dokumenteve të udhëtimit për muajt qershor, korrik dhe gusht, për qytetarët kosovarë që jetojnë përkohësisht jashtë Kosovës.


Në këtë program i nënshkruar nga ministri i Punëve të Brendshme, Blerim Kuçi theksohet:

Do të organizojë punën për pranimin e kërkesave me prioritet për qytetarët e Kosovës, të cilët përkohësisht jetojnë jashtë Kosovës, si dhe do ta caktojë nga një zyrtar (person kontaktues) në secilën qendër komunale të regjistrimit civil (QKRC), i cili do ta organizojë pranimin e kërkesave dhe përshpejtimin e procedurave për lëshimin e dokumenteve të udhëtimit.

Kërkesat për dokumente të udhëtimit, të cilat do të klasifikohen si raste me prioritet, QKRC-të do të futen në zarf me ngjyrë të veçantë (të siguruara nga Departamenti për Regjistrim dhe Gjendje Civile - RGJC-ja), me shenjën “Diaspora”, të cilës do t’i bashkëngjitet lista me emrat e aplikantëve, numrin e dokumenteve të udhëtimit dhe vizë të vlefshme.

Koordinatori i QKRC-së do t’i raportojë për çdo javë grupit mbikëqyrës të formuar nga ministria, lidhur me kërkesat e paraqitura për procedurë të përshpejtuar, në formë të shkruar dhe të veçantë.

Në raport do të ceket numri rendor, numri i dokumenteve, emri dhe mbiemri i personit apo personave, numri personal, koha e aplikimit dhe koha e dërgimit të kërkesës në Departamentin për Prodhimin e Dokumenteve - MPB.

Në kuadër të MPB-së do të emërohet grupi mbikëqyrës, i cili do ta mbikëqyrë punën e QKRC-së për pranimin, përcjelljen e kërkesave në DPD dhe shpërndarjen (dorëzimin) e dokumenteve të udhëtimit, punën e DPD-së për prodhimin e dokumenteve të udhëtimit, si dhe raportet që do të dërgohen nga koordinatorët e QKRC-ve dhe DPD-ja. Ky grup do të përbëhet prej 2 zyrtarëve nga DRGJC-ja, 1 nga DPD-ja dhe 1 nga kabineti i ministrit.

Ministria e Punëve të Brendshme, do t’i caktojë personat kontaktues me palë (aplikant).

Orari i punës me palë i zyrtarëve të përcaktuar është çdo ditë gjatë tërë orarit të punës, përveç festave. Në raste të veçanta, për arsye të shtimit të punëve, kërkesave, të qytetarëve do të kufizohet koha e pushimeve dhe do të zgjatet orari i punës sipas nevojës.
Për t’u trajtuar si rast me përparësi për nxjerrjen e dokumenteve të udhëtimit, qytetarët kosovarë që përkohësisht jetojnë jashtë Kosovës, duhet t’i plotësojnë kushtet për lëshimin e dokumentit të udhëtimit dhe kërkesës (aplikacionit), t’ia bashkangjesin njërën nga këto dëshmi:

Të aplikojë në afat sa më të shkurtër, pas kthimit nga shteti ku aplikanti jeton;
Kopjen e vizës nga pasaporta;
Kopjen e lejes së qëndrimit, ose kopjen e lejes së punës të shtetit ku ai jeton.

Koordinatori i QKRC-së, kërkesën (aplikacionin) e qytetarit e dërgon në DPD, më së largu ditën e nesërme të punës, në kohën e arritjes së transportit zyrtar.

Nga momenti i pranimit të aplikacionit nga DPD, afatet për prodhimin e dokumenteve janë si në vijim:

Për vazhdimin e dokumentit të udhëtimit afati është deri 5 ditë pune, nga dita e pranimit të kërkesës nga QKRC-të;

Për prodhimin e dokumentit të ri të udhëtimit është deri 7 ditë pune, nga dita e pranimit të kërkesës nga QKRC;

Për aplikantët që e kanë arritur moshën madhore (16 vjet), afati për pajisje me dokument identifikimi (DI) dhe dokument udhëtimi (DU) është deri 10 ditë pune (5 për DI dhe 5 për DU);

DPD do t’i raportojë për çdo javë grupit mbikëqyrës të formuar nga ministria lidhur me kërkesat e pranuara dhe rastet e kryera (prodhuara);

Në raport do të ceket numri rendor, emri dhe mbiemri i personit, numri personal, koha e aplikimit, koha e pranimit në DPD, koha e prodhimit personalizimit dhe koha e dërgimit - kthimit në QKRC.

Në rast të refuzimit të ndonjë kërkese për cilëndo arsye, atëherë për këtë zyrtari përgjegjës i DPD-së duhet njoftuar zyrtarin përgjegjës të QKRC (duhet të ceken arsyet e refuzimit dhe masat që do të mund të ndërmerren), në mënyrë që ai ta informojë qytetarin - aplikantin në kohë me qëllim të evitimit të pengesave, njofton Zyra për marrëdhënie me publikun e Ministrisë së Punëve të Brendshme.