[Dilaver]

Kryetari i Partisë së Unitetit Kombëtar dhe drejtuesi i AKSH-së është shpallur person në kërkim nga Interpoli Shqiptar



Idajet Beqiri kërkohet në 184 vënde



Ndërkohë Prokuroria e Përgjithshme ka bërë gati kërkesën për ekstradimin e Beqirit nga Belgjika



Ened Janina



TIRANË - Idajet Beqiri, kryetari i Partisë së Unitetit Kombëtar dhe një nga krerët e Armatës Kombëtare Shqiptare, është person në kërkim në 184 vende të botës. Momentalisht ai ndodhet në Belgjikë ku ka marrë statusin e azilantit politik dhe Prokuroria e Përgjithshme ka bërë gati kërkesën për ekstradimin e tij. Ai akuzohet për veprime që nxisin urrejtjen ndëretnike dhe gjykata ka marrë ndaj tij masën e sigurisë burg pa afat në mungesë. Duke u bazuar në këtë masë sigurie, Interpoli Shqiptar i ka përcjellë vëndeve të tjera kërkesën për arrestimin e tij ndërsa prokuroria ka bërë gati kërkesën për ekstradim. Lajmi është pohuar dje nga burime të Interpolit dhe organit qëndror të akuzës.

Idajet Beqiri, Gafurr Adili dhe Taip Mustafaj akuzohen nga Prokuroria e rrethit Tiranë për veprime që nxisin urrejtjen ndër etnike midis shqiptarëve dhe maqedonasve. Sipas akuzës, Beqiri, Taip Mustafaj dhe Gafurr Adili kanë ushtruar propagandë duke nxitur urrejtjen për popullin maqedonas. Propaganda e tyre është ushtruar në fshatrat kufitare ndërmjet Shqipërisë dhe Maqedonisë. Në këto fshatra ata kanë nxitur urrejtjen për shtetin maqedonas si dhe për popullin maqedonas. Madje, sipas akuzës, Adili dhe Beqiri kanë ushtruar veprimtarinë e tij të paligjshme edhe me anë të internetit kur nuk ndodheshin në Shqipëri. Gjatë kohës që ata ndodheshin jashtë vendit publikonin materiale në internet që nxisnin urrejtjen ndëretnike. Dyshimet për aktivitetin e Adilit, Beqirit dhe Mustafajt kanë lindur disa muaj më parë por prokuroria nuk ka pasur prova për ta arrestuar atë. Në prill të këtij viti Gafurr Adili tentoi që të hynte në Shqipëri nga aeroporti i Rinasit po u ndalua nga policia shqiptare. Ai u shpall person i padëshiruar dhe iu ndalua hyrja. Dy muaj më pas ai arriti të depërtonte në Shqipëri duke përdorur disa dokumente të falsifikuara. Në këtë kohë u bë edhe arrestimi i tij, në zonën e Dibrës. Ndërkohë që në mes të muajit shtator në listat e personave në kërkim është shtuar edhe emri i Idajet Beqirit. Edhe ai, në rast se do të hyjë në territorin e Shqipërisë, do të arrestohet menjëherë nga policia dhe do të dërgohet në gjykatë. Emri i tij i është shtuar listës së personave në kërkim vetëm pasi gjykata ka marrë masën e sigurisë burg pa afat për të. Ndërkohë tashmë duke u bazuar në këto materiale Interpoli shqiptar i ka kërkuar të gjitha vendeve partnere që të arrestojnë Idajet Beqirin. Në të njëjtën kohë Prokuroria e Përgjithshme përpiloi kërkesën për ekstradimin e Beqirit nga Belgjika në Shqipëri. Në Belgjikë Beqiri ka statusin e azilantit politik dhe mbrohet nga shteti belg. Sipas burimeve të prokurorisë, tashmë i takon gjykatës belge të vendosë nëse Idajet Beqiri mund të ekstradohet apo jo. Disa ditë më parë, ministrat e jashtëm të Komitetit Europian hartuan listën e re të vendeve që mund të marrin azil politik. Në këtë listë nuk ndodhej më emri i Shqipërisë. Kjo është argumentuar prej tyre duke thënë se Shqipëria tashmë është një vend i stabilizuar ku respektohen të drejtat e njeriut dhe qytetarët e saj nuk kanë përse kërkojnë azil politik. Ky argumentim mund të ndikojë në vendimin e gjykatës belge për ekstradimin apo jo të Idajet Beqirit në drejtim të Shqipërisë.









07/10/2003