[Dilaver]

Në Stubëll u shënua 100 vjetori i Famullisë së shën Jozefit dhe i themelimit të shkollës së parë shqipe në Kosovë

Të shtunën në Stubëll të Vitisë u shënua 100 vjetori i pavarësimit të famullisë së Shën Jozefit dhe të legalizimit të shkollës së parë shqipe në Kosovë. Me rastin e këtij përvjetori u mbajt një akademi kremtore në të cilën folën zëvendës kryeministri qeverisë së Kosovës Adem Salihaj dhe imzot Mark Sopi.

Në ceremoninë e shënimit të 100 vjetorit të pavarësimit të Famullisë së Shën Jozefit dhe themelimit të shkollës së parë shqipe, përveç banorëve lokal, mes tjerësh ka marrë pjesë edhe Imzot Mark Sopi, Ipeshkv i Ipeshkvisë së Kosovës, zv/kryeministri Adem Salihaj, gjenerallejtënant Agim Çeku e të tjerë.

Jemi tubuar për ta shënuar njjë ngjarje të madhe, pavarësimin e plotë të Famullisë së Stubllës dhe njëkohësisht themelimin e shkollës së parë shqipe, ka thënë fillimisht Imzot Mark Sopi.

“Kisha ka qenë vatër e fesë, por edhe e kulturës dhe shpresoj se shpejt do të arrijmë deri tek realizimi i aspiratave shekullore të popullit tonë”, ka thënë me këtë rast Imzot Mark Sopi.

Zëvëndëskryeministri Adem Salihaj theksoi se ky 100 vjetor paraqet një përvjetor dinjitoz. Ne e dijmë se kemi një histori që ka kaluar nëpër sfida të mëdha dhe e dijmë se institucionet tona fetare të të tri konfesioneve kanë kontribuar në çështjen kombëtare. Kishat dhe xhamiat tona kanë qenë të mishëruara për kulturën dhe për çështjen tonë kombëtare, ka thënë me këtë rast zv/kryeministri Salihaj.

Kryetari i Kosovës Ibrahim Rugova nuk mori pjesë në shënimin e përvjetorit të sotëm, mirëpo kishte dërguar një botim të librit Iliricum Sacrum.

Pas shënimit të këtij përvjetori të rëndësishëm për historinë dhe kulturën tonë, në fshatin Stubëll është bërë hapja e Qendres Rinore, ndërkohë që në kishën e fshatit është mbajtur një meshë festive.

/Muharrem Saragjolli/




Blue Sky & Radio Kosova