[Dilaver]

Organizimi i shqiptarëve rreth kongresistit

Nikollë Shala mendon se Joseph DioGuardi është faktori kryesor i organizimit të komunitetit shqiptar në Amerikë. Kanë kaluar gati 20 vjet nga momenti kur DioGuradi i dha fjalën se do të mbronte shqiptarët dhe prej asaj kohe nuk e ka parë që të ndalet në rrugën e nisur. Me telefona, me faxe, E-Maila, me intervista nëpër gazeta, radio, TV, në demonstrata, në darka e me fjalime, përherë në shërbim të çështjes shqiptare. Askush nuk mund të kundërshtojë faktin se ishte DioGuardi ai që hapi dyert e Shtëpisë së Bardhë dhe ngriti në këmbë Kongresin dhe Senatin amerikan.
Nikolla u bë jo vetëm përkrahës, por dhe një nga bashkëpunëtorët e ngushte të Kongresistit. I tregoi atij se shqiptarët ishin të organizuar në shoqata, si Federata Vatra, Balli Kombëtar, Legaliteti, Blloku Indipendent, Lidhja Kosovare, Lidhja e Prizrenit, Kisha Katolike shqiptare, Xhamia, Kisha Ortodokse Shqiptare etj. Ai ndërmjetësoi që kongresisti të takohej me të gjithë.
Për të siguruar më shumë kontakte me shqiptarët, Nikolla e ftoi kongresitin edhe në dasëm të familjes. Kongresiti kishte shkuar në dasëm së bashku me nënë dhe vajzën. Ishin 600 dasmorë në atë gëzim familjar. Aty ishin edhe Patër Andrea Narkaj dhe Patër Ambroz Martini. Kongresisti u prit me duartrokitje e thirrje përgëzimi.
Më pas Nikolla e çoi edhe në komunitetin shqiptar të Detroitit, duke e zgjeruar rrethin e kontakteve me shqiptarët.
Në këto rrethana erdhi dhe krijimi i Ligës Qytetare Shqiptaro-Amerikane.
- Nuk ishim më shumë se 5-6 vetë ne që ia nisëm asaj pune, kujton Nikollë Shala. Secili nga ne premtoi se do të ndihmonte edhe financiarisht.
Vetë ai ishte betuar se pasurinë do ta vinte në shërbim të çështjes shqiptare. Ishte i pari që i çoi DioGuardit çekun prej 12 mijë dollarësh. Pas tij dhe të tjerët vunë në shërbim të Lidhjes shumat që kishin premtuar dhe puna mori vrull. Rreth saj shqiptarët po ndjenin siguri.
Nikolla shpreh bindjen se Liga ka bërë shumë për çështjen shqiptare dhe se presidenti i saj Joseph DioGuardi meriton që të nderohet nga kombi ynë sepse i ka dhënë zë çështjes shqiptare në hapësirën amerikane.
-Liga na hapi dyert, thotë ai. “ Ja,unë për vete, po të mos ishte DioGuardi, jam i bindur se nuk do të mundja të takohesha me presidentin Bush (babanë e presidentit të tanishëm), presidentin Ford, Sekretarin e Shtetit Henry Kissinger si dhe me më shumë se 50 senatorë e kongresistë. Ky njeri na i celi dyert e Shtëpisë së Bardhë, e Kongresit dhe të Senatit, me të në krye ne shqiptarët demonstruam në Nju Jork e Washington. Të grumbulloje më shumë se 10 mijë demonstrues në Washington nuk ishte gjë e pakët. Dhe të kishe aty 15 e më shumë kongresmenë e senatorë amerikanë, gjithashtu nuk ishte pak.”
Ai pyet: E kush na njihte më parë ne shqiptarët?
Së bashku, shton ai, kemi shtruar darka me më shumë se 3 mijë vetë e mes nesh kemi pasë personalitete amerikane.