[Dilaver]

Loja me “Yllin e kuq”

Nikollë Shala mendon se një kontribut të veçantë për çështjen shqiptare ka dhënë Xhim Xhema, i cili nuk ka kursyer asgjë për t’i shërbyer kombit.
Ai kujton një ndër udhëtimet e shumta me Xhim Xhemën. Po ktheheshin nga Washingtoni. Xhimi ka kërkuar informacion për Shqipërinë. Nikolla i ka folur hapur , pa fshehur asgjë nga ato ç’ka dinte. Ai kishte jetuar me shqiptarë që kishin lënë Shqipërinë që nga viti 1948 e deri në 1967, para se të linte Gucinë. Shqipëria i kishte çuar në plumb të gjithë ata që kërkonin bërjen e Shqipërisë së vërtetë ashtu siç e kishte bërë Zoti. Dhe këtë llojë armiqësie mes vetë shqiptarëve nacionalistë dhe atyre komunistë e kishin kultivuar Miladin Popoviçi e Dushan Mugosha, që krijuan Partinë Komuniste Shqiptare dhe ndërtuan bashkë me ta një platformë siç i interesonte Beogradit. Vrasja e nacionalistëve, e klerikëve, shembja e institucioneve fetare, kthimi i vendit në një kamp me tela e bunkerë, e ka izoluar Shqipërinë.Ylli i kuq e drapëri e çekani kanë zënë vendin e Shqiponjës me dy krerë.
Nikolla kujton se ka qenë një bisedë shumë e vështirë dhe kur ka mbaruar rrëfimin ka parë se sytë Xhim Xhemës lotonin. Ai nuk e kishte përfytëruar Shqipërinë në atë gjendje.
Që nga ai çast e më mbrapa, nuk ishte e lehtë t’i thoje Xhim Xhemës se në demonstrata mund të përdornim dhe flamurin me Yll! Kurrë jo. Këtë yll e kishte futur në komunitet Misioni Shqiptar pranë Kombeve të Bashkuara dhe ai yll u bë shkak grindjesh mes komunitetit. Padyshim që në ndarjen e komunitetit kishte pjesën e vet edhe UDB-ja jugosllave, së cilës i interesonte përçarja mes shqiptarëve, grindjet mes tyre, me qëllim që të diskretitoheshin në sytë e amerikanëve.Ishte koha kur po i përgatitej thika Kosovës. Shumica e shqiptarëve që ishin për yllin e kuq, nuk e dinin lojën e UDB-së dhe të Sigurimit shqiptar.
Nikolla kujton një rast, kur para një demonstrimi, pjestarët e Ligës, u kishin folë shqipatrëve nga Radio e Ligës, që të mos vinin në demonstratë me flamurin me yllin e kuq sepse do të ishte në dëm të Kosovës dhe se Amerika nuk e përkrahte Yllin e Kuq të komunizmit. Gjithësesi në demonstratë, një grup majtist kishte shkuar me flamurin me yllin e kuq. Sherri ishte në prag. Atëherë DioGuardi ka dhënë urdhër që do të demonstrohej pa flamujë.
Nikolla dhe sot nuk ndjehet mirë kur kujton se në Hotel Sheraton, ku ishte kryetari Rugova dhe shumë senatorë e kongresitë, Ali Aliu, ka folë se këtu në SHBA s’kishte ndonjë gjë të keqe që të përdorej flamuri me yllin e kuq. Në ato momente masa e pjesmarrësve ka reaguar.
Është çuar në këmbë në ato çaste Patër Ambroz Martini, frati farnçeskan që kishte ardhë nga Belgjika, dhe ka thënë: ”Nuk duhet t’ju tradhëtojë askush sepse ylli, drapëri e çekani, janë simbole bolshevike e nuk janë simbole shqiptare.”.

***
Nikollë Shala mendon se Liga ka kryer një shërbim të madh ndaj kombit shqiptar, veçanërisht ndaj Kosovës. Ai e ndjen veten të qetë që e ka mbështetur që në lindje atë, duke dhënë gjithçka kishte, shpirt dhe dollarë. Mjafton, thotë ai, që të kujtojmë deklaratën e Kriminelit Sllobodan Millosheviç në Gjykatën Ndërkombëtare të Hagës se:”Liga Qytetare Shqiptare me Joseph DioGuardin dhe me Bob Dole ma shkatërruan Jugosllavinë.”
Ai thotë se ende i vjen për të qeshur, kur kujton një bisedë me Joseph DioGuardin, i cili e ka pyetur:- Nikollë a të dhimbsen ato 12 mijë dollarë që i pate dhënë për krijimin e Ligës?”..Atëhere, Nikolla kishte qeshur dhe ia kishte kthyer:”Më vjen keq që nuk kisha 12 bilion, për t’i dhënë kundër Jugosllavisë, për çfarë ajo i ka bërë kombit shqiptar”.Nikolla as do që t’i përmend shumat që ka dhuruar në fushatat elektorale, për presidentë të Amerikës, senatorë e kongresistë. As shumat që ka dhënë për kishë e gjithëçka tjetër. Për shqiptarizëm, askush nuk duhet të tregohet dorështërnguar.

***
Në mbyllje të bisedës, Nikollë Shala, thotë se është përpjekur të bëj gjithëçka për të mirën e kombit. Ka investuar për Atdhe e fe. Ai është një ndër kontribuesit e bashkimit të komunitetit katolik në Nju Jork, bashkimit të dy kishave.
Ai ndjehet i qetë që ka shfrytëzuar qenien në Amerikë për t’i shërbyer Atheut dhe Fesë. Kjo është dhe porosi e gjyshit të tij, Vocërr Balës, heroit të Lahutës së Malsisë të At Gjergj Fishtës.