[ARVANITI]

Flasin lojtarët kuqezinj pas fitores të së shtunës me Gjeorgjinë


Kombëtarja starton fushatën anti-Danimarkë


Pas ndeshjes me Gjeorgjinë, që kuqezinjtë tanë e fituan me rezultatin 3-2, vijnë edhe reagimet nga futbollistët e ekipit tonë kombëtar. Shumë prej tyre mendojnë se tashmë ndeshja e së shtunës është histori i kaluar, ndërkohë që grupi duhet të mendojë për ndeshjen e së mërkurës në Kopenhagen. Kështu, Edvin Murati, një prej futbollistëve të kombëtares që ka probleme të vogla fizike këtë moment dhe që ndeshjen e djeshme ka qenë në tribunë, është shprehur kështu për këtë takim të radhës në grupin 2 eliminator. "Fituam një ndeshje të mirë, por duhet të kishim kujdes, pasi Gjeorgjia shënoi dy gola në fund të lojës. Por, nga ana tjetër, mbahet mend tripikëshi. Ndiej keqardhje që tifozët nuk ishin këtu. Shpresoj që ndeshjen e ardhshme të jenë nëpër tribuna. Tani shkojmë në Danimarkë ndoshta për të marrë diçka tjetër të mirë," - mbyll Murati. Ndërkohë, Redi Jupi, i rikthyer në ekipin kombëtar, ka mbetur i kënaqur nga loja që ka zhvilluar ekipi, por edhe ai personalisht. Gjithsesi, sipas tij, rikthimi ka qenë pak i hidhur pasi stadiumi ka qenë pa spektatorë. Jupi është shprehur se në Kopenhagen ekipi kërkon të marrë pikë, ndonëse dihet fuqia e danezëve. "Në këtë ndeshje u mundova të bëj punën time. Unë e thashë që kur erdha që nuk bëj dot mrekullira. Do të bëj atë gjë që e bëj edhe në ekipin tim. Ishte mirë që rikthimi koincidoi me fitoren e ekipit. Sidomos kur ekipi fiton, të gjitha gjërat janë në përmirësim dhe vlerësohen me superlativa. Megjithatë, kemi shumë gjëra për të pasur kujdes, pasi Danimarka nuk është Gjeorgjia dhe takimin e ardhshëm duhet ta shohim me optimizëm. Ne jemi lojtarë profesionistë. U bënë vite që e bëjmë këtë punë dhe them se edhe publiku ka bukurinë e tij. Do të ishte më mirë sikur sot publiku të ishte në stadium. Fati qëlloi që duhet të rikthehesha në kombëtare dhe të gjeja një stadium bosh, edhe pse me fitore. Me këtë 3-pikësh kemi arritur të shkëpusim Gjeorgjinë dhe të jemi pak më të sigurt. Megjithatë, për këtë grup do të jetë decizive ndeshja në Danimarkë. Shpresoj që të marrim pikë në Danimarkë. Ekipi fiton moral dhe pikë dhe për objektivat e mëpasmë të marrim një koeficient më të lartë. Shpresojmë që t'i arrijmë të gjitha këto që thashë, pasi më parë nuk kemi pasur rezultate të mira."


Në fund, ai që ka folur ka qenë mbrojtësi shkodran Elvin Beqiri. Mbrojtësi i Metalurg Donjeckut është shprehur se në takimet e ardhshme gola të tillë si ndaj Gjeorgjisë momentet e fundit nuk duhet të ndodhin më. "Ndeshja është relativisht e vështirë, pasi Gjeorgjia është një skuadër e vështirë. E filluam mirë takimin, por nga fundi lëshuam pak. Kuptohet, kjo edhe sepse është fund sezoni dhe ka lodhje në këmbët tona. Besuam në këtë fitore dhe ia arritëm qëllimit. Ky takim ka qenë shumë i rëndësishëm për sulmin, pasi kishte disa kohë që nuk shënonte. Them se ia arritëm qëllimit. Për sa u përket golave të pësuar në fund, them se nuk duhet të ndodhin më," - ka përfunduar Beqiri.