[ARVANITI]

Kuqezinjtë zhvillojnë stërvitjen e parë në tokën daneze, në pritje të sfidës së nesërme

Kombëtarja, gjithçka në rregull para Danimarkës



Kombëtarja shqiptare, pas një udhëtimi të gjatë, ka mbërritur në Danimarkë. Ashtu siç ishte përcaktuar edhe më parë, kuqezinjtë janë akomoduar në hotelin më të mirë të Kopenhagenit "Marriott". Rreth orës 17.00, kuqezinjtë kanë marrë rrugën dhe në një fushë sportive pranë hotelit kanë zhvilluar stërvitjen e parë në Danimarkë. Trajneri Brigel ka pasur në dispozicion të gjithë futbollistët kuqezinj. Përjashtim ka bërë vetëm Altin Haxhi, i cili është dëmtuar në ligamente dhe kështu nuk ka mundur të stërvitet dhe për 4 javë do të bëjë pushim absolut. Sipas portierit legjendar të kombëtares shqiptare, Foto Strakosha, i cili është kontaktuar nga "Sporti shqiptar", gjendja e grupit kuqezi është shumë e mirë. Vetëm Edvin Murati akoma nuk është 100 për qind të formës së tij. Me mesfushorin e Iraklisit vazhdon të punojë fizioterapisti Akim Bulinger. Pjesa tjetër e grupit po kalon një gjendje të mirë. Asnjë shqetësim nuk ka as portieri Ilion Lika, që para ndeshjes me Gjeorgjinë ka vuajtur nga muskujt e barkut. Dje, kuqezinjtë kanë zhvilluar një stërvitje të ndarë në dy grupe. Futbollistët që janë aktivizuar në takimin me Gjeorgjinë kanë zhvilluar një stërvitje të lehtë. Ndërkohë, një stërvitje më të fortë kanë zhvilluar ata lojtarë që nuk kanë luajtur apo kanë luajtur vetëm pak minuta në takimin e së shtunës. Sipas informacioneve, me grupin është edhe Igli Tare, i cili duket se do të qëndrojë me ekipin kombëtar edhe për ndeshjen me Danimarkën. Për sa i përket pjesës tjetër, gjithçka është "ok". Trajneri Brigel, para takimit është shprehur se në fushë ditën e mërkurë mund të hedhë një skuadër mbrojtëse, kjo duke ditur se danezët do të luajnë me një skuadër që do të kërkojë vetëm të fitojë.
Ndërkohë, kuqezinjtë edhe sot pritet të zhvillojnë një stërvitje në Danimarkë, por këtë herë në stadiumin ku do të zhvillohet ndeshja ditën e mërkurë. Sikurse diket, kuqezinjtë do të përballen më 8 qershor me ekipin e Danimarkës. Të dyja skuadrat janë me pikë të barabarta, me nga 9 pikë. Ndërsa në ndeshjen e parë kuqezinjtë janë mundur në "Qemal Stafa" me rezultatin 2-0. Kujtojmë që në atë ndeshje kombëtarja jonë ka qenë pa disa nga lojtarët titullarë.

Shpresa, sot në fushë (d.m.th. ne daten 7 qershor 2005, ora 19.00)

Ekipi përfaqësues Shpresa sot pritet të zhvillojë ndeshjen e radhës me ekipin danez për eliminatoret e Europianit të 2006-ës. Skuadra është akomoduar në hotel dhe dje ka zhvilluar stërvitjen e vetme në tokën daneze. Ndërkohë që sot, në orën 19.00, me atë shqiptare pritet të luhet takimi mes Shqipërisë dhe Danimarkës për 21-vjeçarët.