[panta_rhei]

Eja të vdesim për hatër të këtij funerali kaq të bukur.
E dij qe nuk është radha jonë, por kjo s’ka rëndësi.
Eja…
rast tjetër më të mirë nuk do të kemi.
A nuk e sheh që e kanë sjellë hoxhën më të mirë?
A nuk e sheh që i kanë sjellë kurorat më të bukura?
A nuk e sheh si po shndritë dorëza e artë e arkivolit të praruar?
A nuk e sheh që i kanë sjellë varrmihësit më me përvojë?
A nuk e sheh se çfarë dheu i butë e i ngrohtë avullon anës gropës?
A nuk e sheh se sa shumë njerëz kanë ardhur sot këtu për lamtumirën e fundit?

Nuk do të derdhin asnjë lot për ne.
Po ti mos mendo keq për ta.
E si do të mund të lotonin?
Krejt jetën e tyre jetojnë buzë varrit.
E na krejt jetën pranë tyre…

Eja të vdesim për hir të këtij funerali kaq të bukur.
Mosvdekja nuk është pavdekësi…
Eja…
E dij që nuk është radha jonë
por sa për mallkimet e tyre, radha s’na vjen kurrë…