[Era1]

Kisha Ortodokse Autoqefale Shqiptare ua ka mbyllur derën shpirtrave të 4250 çamëve që humbën jetën tragjikisht 63 vjetë më parë nga ushtarët grekë të gjeneralit Zervas. Përgjigja negative e Sinodit të Shenjtë të KOASH-it për kërkesën e bërë nga përfaqësuesit e komunitetit çam në Shqipëri, iu shpërnda medias dje në mesditë. Autoriteti më i lartë i besimtarëve ortodoksë të Shqipërisë kishte parashtruar në komunikatën e tij një sërë justifikimesh për të refuzuar meshën e përshpirtjes së çamëve të martirizuar. Ai ka shkuar aq larg sa “kishte nuhatur” se po provokohej për “tu përzjerë direkt ose indirekt, në çështje politike të brendshme apo të jashtëme”. Pra përfundimisht Sinodi i Shenjtë i KOASH-it nuk do ta zhvillojë lutjen ndërfetare për çamët që u shpërngulën forcërisht nga vatrat e tyre në mesin e shekullit të kaluar, madje nuk ka për të mbajtur as ndonjë meshë përshpirtje për ta. Ky vendim i Sinodit të Shenjtë që komandohet nga tre mitropolitë me kombësi e shtetësi greke dëshmon dhe një herë se krerët helenë të KOASH-it jo vetëm që po përzihen prej kohësh direkt dhe indirekt në çështje të politikës së brendëshme, por dhe në çështje të politikës së jashtëme.
Përgjigjja
Paraditen e djeshme është mbledhur Sinodi i Shenjtë i KOASH-it i cili mori në shqyrtim kërkesën që Partia për Drejtësi dhe Integrim i kishte dërguar disa ditë më parë për të organizuar një meshë “lutje ndërfetare” për të kujtuar të gjithë çamët që humbën jetën 63 vjetë më parë prej genocidit grek. Pas kësaj mbledhje Sinodi i Shenjtë shpërndau një komunikatë për median në të cilën thuhej se:”Në takimin që përfaqësuesi ynë(Sinodit të Shenjtë) i autorizuar pati me kryesinë e PDI-së sqaruam se Kisha Orthodhokse Autoqefale e Shqipërisë nuk merr pjesë në veprimtaritë e partive politike, sikundër edhe më parë ia kemi bërë të qartë me shkrim kësaj partie. Parim bazë i Kishës është të mos përzihet, direkt ose indirekt, në çështje politike të brendshme ose të jashtme”. Arsyeja pse KOASH-i refuzonte mbajtjen e kësaj meshe ishte fakti që:”Në mënyrë të posaçme “lutjet ndërfetare” janë të ndaluara prej Kanoneve të Shenjta të Kishës Orthodhokse. Për këtë arsye gjatë viteve Kisha jonë nuk ka marrë pjesë në asnjë “lutje” ose meshë ndërfetare. Përshpirtjet për të vdekurit janë një pjesë e rëndësishme e lutjes së Kishës dhe duke pasur një karakter të shenjtë dhe kishtar ato kryhen në përputhje me rregullat e shërbesave kishtare orthodhokse”.
“Pavarësia”
Në fund të komunikatës Sinodi e Shenjtë deklaronte:”Lutjet për viktimat e luftërave, për ata që ranë për liri dhe atdhe, kryhen në Kishë sipas traditës së saj dhe jo me porosi partish apo urdhra politikanësh nga Kuvendi. Shqipëria sipas Kushtetutës është shtet laik, i cili përparon drejt Bashkimit Evropian dhe feja duhet të lihet në seriozitetin dhe rolin e saj hyjnor, të mos tentohet implikimi i saj me mënyra të drejtpërdrejta ose të tërthorta në lojëra politike”. Këto paragrafe të komunikatës së Sinodit të Shenjtë të KOASH-it do të ishin të besueshme nëse prifti i Përmetit dhe Mitropolia e Gjirokastrës nuk do të kishin futur hundët gjithandej në skandalin e zhvarrimeve në Kosinë, madje deri dhe te shpërblimi i varrmihësve me para në dorë. Se ç’punë ka Kisha Ortodokse Autoqefale Shqiptare të mbledhë eshtrat e ushtarëve grekë dhe të ndërtojë varrezat e tyre pikërisht aty ku pretendohet se janë piketat e Vorio-Epirit, kjo sigurisht që nuk quhet implikim në lojëra të drejtëpërdrejta politike nga Sinodi i Shenjtë dhe Hirësia e Tij Janullatos.


Marre nga Gazeta Shqiptare