[Psikologu]

Si e përcollën gazetat "Bujku" e "Koha ditore" takimin e presidentëve Klinton-Rugova

Prishtinë, 30 maj (QIK)
Takimin e djeshëm në Shtëpinë e Bardhë të presidentëve Klinton-Rugova e kanë paraqitur sot dy gazetat e përditshme shqipe në Kosovë,

"Bujku" e paraqet takimin në dy faqe të gazetës. Në faqen e parë, gazeta boton një fotografi nga takimi i djeshëm i Presidentit Klinton me kryetarin Rugova. Me mënyrën e paraqitjes, gazeta shpreh qëndrimin e vet për takimin si për ngjarjen kryesore politike të ditës, me titull të dalluar: Klinton: "Në Kosovë nuk do të lejojmë përsëritjen e Bosnjës", kurse në dy nëntitujt, theksohen fjalët e presidentit të Republikës së Kosovës: "Ne ritheksuam se zgjidhja më e mirë për Kosovën është shtet i pavarur" dhe të Ambasadorit Kristofer Hill: "SHBA-të nuk do të largohen përderisa të arrihet një zgjidhje paqësore në Kosovë". Në faqen e parë, "Bujku" parlajmëron takimin e sotëm në Uashington të kryetarit Rugova me sekretaren e shtetit z. Medllin Ollbrajt. Në faqen e dytë jepet deklarata e kryetarit Rugova pas takimit me presidentin Klinton me titull: Kjo ishte ditë historike për Kosovën" si dhe intervista e kryeministrit të qeverisë se Republikës së Kosovës Bujar Bukoshi dhënë "Zërit të Amerikës" me titull: "Kemi arsye të jemi optimistë të matur". Për dallim nga "Bujku" gazeta "Koha ditore" takimin e presidentëve Klinton-Rugova e paralajmëron në faqen e parë nëpërmjet të anëtarit të delegacionit të Kosovës, Veton Surroi, duke cituar fjalët e tij: Clintoni dha garanca për implikimin serioz të SHBA-së në bisedat për Kosovën". Gazeta nuk boton asnjë fotografi nga takimi Klinton-Rugova, as fotografi të ndonëjrit nga presidentët, ose anëtarët e delegacioneve që kanë marrë pjesë në takimin e djeshëm. "Koha" boton gazeta portretin e kryeredaktorit të saj, të Veton Surroit si edhe tekstin e Rojterit. Këtë takim, të cilësuar si historik për Kosovën, kjo gazetë nuk e ka shënuar as me një lajm të veçantë redaksional.