[hasanmehmeti]

Komentim i ajet el-Kursi
Nga Tefsiri i Imam Ibn Kethir
Versioni i shkurtuar i mbikëqyrur nga shejh Safiu-Rahman el-Mubarekpuri


"Allahu! Askush s'ka të drejtë të adhurohet përveç Tij, i Përjetshmi, Ai që mban dhe mbron gjithë çka ekziston. Atë nuk e kap as dremitja, e as gjumi. Atij i përket gjithçka që ekziston në qiej dhe tokë. Kush është ai që mund të ndërmjetësojë tek Ai përveç me lejimin e Tij? Ai e di ç'u ndodh atyre [krijesave të veta] në këtë botë dhe çfarë do t'u ndodhë atyre në jetën e përtejme. Ata kurrë s'do t'i vijnë rrotull çfarëdo gjëje nga dija e Tij, përveç atë që Ai do. Kursia e Tij shtrihet mbi qiejt dhe tokën, dhe Ai nuk ndjen lodhje në ruajtjen dhe kujdesin ndaj tyre. Ai është më i larti, më i madhi". [el-Bekare, 255]

Ajet el-Kursi ka dhjetë fjali të plota Arabe.


Thënia e Allahut:


"Allahu! Askush s'ka të drejtë të adhurohet përveç Tij", përmend që Allahu është një dhe i vetmi zot i gjithë krijimit.

[el-Hajjum-Kajjum] "I Përjetshmi, Ai që mban dhe mbron gjithë çka ekziston", dëshmon që Allahu është i përjetshëm, që kurrë nuk vdes, i cili mban çdonjërin dhe gjithçka. I gjithë krijimi ka nevojë për Allahun dhe plotësisht varet nga Ai, ndërsa Ai është më i pasuri, i cili s'ka nevojë për çfarëdo që është e krijuar. Ngjashëm, Allahu thotë:



"Dhe nga shenjat e Tij janë që qiejt dhe toka qëndrojnë me anë të urdhrit të Tij". [er-Rum, 25]



"Atë nuk e kap as dremitja, e as gjumi", tregon që tek Allahu nuk gjendet ndonjë e metë, pavëmendje apo injorancë, asnjëherë. Madje, Ai është i vëmendshëm dhe kontrollon çfarë fiton çdo shpirt, vëzhgon me përpikëri gjithçka, asgjë nuk i ikën dijes së Tij, dhe asnjë çështje e fshehur s'është e fshehur për Të. Ndër cilësitë e përsosura të Tij, është fakti që Ai kurrë nuk preket nga dremitja apo gjumi. Ndaj, thënia e Allahut "Atë nuk e kap as dremitja, e as gjumi", tregon që Allahun nuk e kap kurrfarë pavëmendje si pasojë e dremitjes apo gjumit. Allahu thotë më pas:


"... e as gjumi", gjë që është më e fortë se dremitja. Është shënuar në Sahih që Ebu Musa ka thënë:


"I dërguari i Allahut, salallahu alejhi ue selam, mbajti një fjalim lidhur me katër gjëra:"Allahu nuk fle, dhe nuk i ka hije madhërisë së Tij që të flejë. Ai ul shkallët [pozitat] dhe i ngre ato. Veprat e ditës ringjallen përpara Tij para veprave të natës, si dhe veprat e natës para atyre të ditës. Velloja e Tij është dritë apo zjarr dhe po e hoqi atë, rrezet nga Fytyra e Tij do të digjnin gjithçka nga krijimi që shikimi i Tij do ta mbërrinte". [Sahih Muslim, 161]


"Atij i përket gjithçka që ekziston në qiej dhe tokë", tregon që çdonjëri është rob i Allahut, pjesë e mbretërisë së Tij dhe nën pushtetin e Tij. Ngjashëm, Allahu ka thënë:


"S'ka asnjë në qiej dhe tokë vetëm se i vjen më të Mëshirshmit [Allahut] si një rob. Vërtet, Ai njeh secilin nga ata dhe u ka bërë atyre një llogari të plotë. Secili nga ata do t'i vijë Atij i vetëm në ditën e Ringjalljes [pa ndonjë ndihmës apo mbrojtës]". [Merjem, 93-95]


Thënia e Allahut:

"Kush është ai që mund të ndërmjetësojë tek Ai përveç me lejimin e Tij?", është e ngjashme me thënien e Tij:


"Në qiej ka shumë engjëj, ndërmjetësimi i të cilëve s'do t'ju vlejë gjë, përveç pasi Allahu të ketë dhënë leje për këdo që Ai do dhe me të cilin Ai është i kënaqur". [en-Nexhm, 26]


Dhe,


"Ata s'mund të ndërmjetësojnë, përveç për atë me të cilin Ai është i kënaqur". [el-Enbija, 28]

Këto ajete theksojnë madhërinë e Allahut, krenarinë dhe hirin, dhe se askush nuk merr guximin të ndërmjetësojë tek Ai në emër të dikujt tjetër, përveç me lejimin e Tij. Vërtet, hadithi në lidhje me ndërmjetësimin përmend që pejgamberi, salallahu alejhi ue selam, ka thënë:


"Do të qëndroj nën Fron [Arsh] dhe do të bie përmbys [në sexhde], dhe Allahu do të më lejojë të mbetem në atë pozitë sa të dojë Ai. Pas kësaj do të thuhet:'Ngrehe kokën. Fol dhe do të dëgjohesh, ndërmjetëso dhe ndërmjetësimi yt do të pranohet'. Pastaj pejgamberi, salallahu alejhi ue selam, tha:'Ai do të ma lejojë një pjesë, të cilët do t'i fus në xhenet'". [Sahi Muslim, 180]


Thënia e Allahut:

"Ai e di ç'u ndodh atyre [krijesave të veta] në këtë botë, dhe çfarë do t'u ndodhë atyre në jetën e përtejme". Kjo i referohet dijes së përsosur të Tij; të kaluarës, të tashmes dhe të ardhmes së saj [dijes]. Ngjashëm, Allahu ka thënë që engjëjt thanë:


"Ne [engjëjt] nuk zbresim vetëm se me urdhrin e zotit tënd [O Muhamed]. Atij i përket çfarë është përpara nesh dhe çfarë është pas nesh, si dhe çfarë është midis këtyre dyjave. Zoti yt s'harron kurrë". [Merjem, 64]


Thënia e Allahut:


"Ata kurrë s'do t'i vijnë rrotull çfarëdo gjëje nga dija e Tij, përveç atë që Ai do", thekson faktin që askush nuk arrin ndonjë pjesë të dijes së Allahut, përveç çfarë njofton dhe lejon Allahu. Kjo pjesë e ajetit tregon që askush asnjëherë nuk merr dije mbi Allahun dhe cilësitë e Tij, përveç çfarë i njofton Ai. Për shembull, Allahu ka thënë:


"Por ata s'do t'i vijnë rrotull ndonjë gjëje nga dija e Tij". [Ta Ha, 110]


Allahu ka thënë:


"Kursia e Tij shtrihet mbi qiejt dhe tokën". Ueki' transmeton në Tefsirin e vet, që Ibn Abas ka thënë:"Kursija është Mbështetëse Këmbësh, dhe asnjeri s'është në gjendje t'i bëjë vlerësim të duhur Fronit të Allahut". [et-Taberani, 12:39]


el-Hakim ka shënuar këtë hadith në Mustedrek-un e vet [el-Hakim, 2:282] nga Ibn Abas, i cili nuk e ka lidhur atë me të dërguarin, salallahu alejhi ue selam. el-Hakim ka thënë:"Kjo është Sahi sipas kritereve të dy Sahi-ve, dhe ata [el-Buhari dhe Muslim] nuk e kanë shënuar".


Veç kësaj, ed-Dahak ka thënë që Ibn Abas ka thënë:"Po të rrafshoheshin shtatë qiejt dhe shtatë tokët dhe të shtroheshin krahpërkrah, ato do të kishin qenë sikur madhësia e një unaze në një shkretëtirë krahasuar me Kursinë". [Ibn Ebi Hatim, 3:981]


Allahu ka thënë:

"Dhe Ai nuk ndjen lodhje në ruajtjen dhe kujdesin ndaj tyre", do të thotë që ruajtja dhe kujdesi ndaj qiejve dhe tokës, si dhe çfarë ka mes tyre, nuk e ngarkon Atë dhe nuk e bën të lodhet. Madje, kjo është një çështje fare e lehtë për Të. Më tej, Allahu mban gjithçka, vëzhgon me përpikëri gjithçka, asgjë nuk i ikën dijes së Tij dhe asnjë çështje e fshehur s'është e fshehur për Të. Të gjitha çështjet janë të parëndësishme, të ulëta dhe të nënshtruara përpara Tij. Ai është më i pasuri, i denjë për çdo lavdërim. Ai bën çfarë të dojë dhe askush s'mund ta pyes për çfarë Ai bën. Ai është më i larti, më i madhi. S'ka perëndi të denjë për adhurim përveç Tij, e as zot të vërtetë përveç Tij.

Thënia e Allahut:

"Ai është më i larti, më i madhi", është e ngjashme me thënien e Tij:"Më i madhi, më i larti". [er-Rad, 9]


Këto dhe ajetet e ngjashme lidhur me cilësitë e Allahut, duhet të trajtohen në mënyrën që Selefi i kanë trajtuar ato, duke i pranuar domethënien e tyre të jashtme/të qartë, pa i barazuar ato [me cilësitë e krijimit] apo ndryshuar domethënien e tyre të jashtme/të qartë.