[Guri i madh]

RTK ndalon emisionin që flet për fondet e trepërqindëshit dhe “Vendlindja thërret”







Publikuar: 24.08.2011 - 09:34Prishtinë, 24 gusht – Musa Daka, anëtar i Këshillit të Përgjithshëm të LDK-së, që jeton në Amerikë, kishte menduar se përmes Radiotelevizionit Publik të Kosovës, do t’i njoftonte qytetarët e Kosovës se çka në të vërtetë kishte ndodhur me fondin e trepërqindëshit dhe me fondin “Vendlindja thërret”.

Daka ishte ftuar nga RTK-ja për të sqaruar kërkesën e tij të bërë në mbledhjen e Këshillit të Përgjithshëm të LDK-së, të mbajtur në korrik, me ç’rast ai kishte kërkuar që Grupi parlamentar i LDK-së ta ftonte ish- kryeministrin Bujar Bukoshi që të jepte llogari për fondin e mbledhur nga trepërqindëshi, pas së cilës kërkesë reaguan Bukoshi e Mustafa. “Natyrisht që z. Bukoshi duke qenë në postin e zv. kryeministrit të Kosovës, reagoi ashpër me arrogancë, duke e quajtur të pabazë kërkesën time dhe duke dezinformuar popullin e Kosovës se gjoja një gjë e tillë është e mbyllur kohë më parë dhe se gjoja na paska dhënë llogari. Po ashtu kishte reaguar edhe kryetari i LDK-së, z. Isa Mustafa, madje duke shpifur se gjoja unë nuk paskam qenë as anëtar i Këshillit të Përgjithshëm, dhe se gjoja paskam kërkuar llogari për fondin në SHBA”, ka treguar Daka. Për ta sqaruar më gjerësisht këtë kërkesë, Daka ishte ftuar mysafir në emisionin “Pa rrotlla”, të gazetarit Milaim Zeka. Rreth një orë, Daka kishte folur sesi ishte (keq)përdorur trepërqindëshi nga ish-kryeministri Bujar Bukoshi. Por emisioni i përgatitur nuk është transmetuar, edhe pse reklama e tij ishte transmetuar për pesë ditë me radhë.

Gazetari Zeka dhe drejtori i RTK-së, Bekim Hasani, kanë dhënë versione të ndryshme për arsyen e mostransmetimit të emisionit, për të cilin veprim Daka ka vendosur ta padisë RTK-në. Sipas drejtorit të Televizionit të Kosovës, Bekim Hasani, arsyeja e vetme pse emisioni i gazetarit Zeka nuk është transmetuar është mosbalancimi i tij. “Emisioni nuk ka qenë i kompletuar. Unë kam biseduar me autorin e emisionit, i cili më ka thënë se ka bërë përpjekje me marrë palën tjetër, por unë nuk kam parë që ai ka bërë përpjekje për këtë”, ka thënë Hasani, duke mohuar se RTK-ja e kishte bërë reklamën e këtij emisioni, të cilin Hasani e kishte vlerësuar të pabalancuar. “Nuk është e vërtetë që është transmetuar promo e emisionit, kjo është e sigurt”, ka thënë Hasani. Ndërsa ka përjashtuar mundësinë që emisioni nuk është transmetuar për shkak të presionit nga zyrtarët e LDK-së, të cilët Daka i kishte përmendur në emision. “Absolutisht nuk ka intervenuar askush dhe askush nuk na ka thirrur”, ka theksuar Hasani. Mirëpo version tjetër për mostransmetimin e emisionit jep autori i tij, gazetari Zeka.

“Regjisori i emisionit, Alban Gashi, ma ka dërguar një mesazh telefonik dhe më tha që po e sheh se në terminin kohor të emisionit “Pa rrotlla” po transmetohet një film amerikan. Ai ka thirrur në dhomën e transmetimit dhe ka pyetur pse nuk po transmetohet emisioni dhe ata i janë përgjigjur se kemi urdhër nga drejtori Bekim Hasani që të mos transmetohet emisioni”, ka treguar Zeka. Për të shtuar se pas kësaj drejtori Hasani i kishte telefonuar atij dhe ia ka treguar arsyen e mostransmetimit të emisionit.

“Bekimi më ka thirrur në telefon pasi që e ka ndaluar transmetimin e emisionit dhe më tha që emisioni nuk është transmetuar për shkak se është i pabalancuar dhe se nuk e paskam marrë edhe palën tjetër. I thashë që pala tjetër nuk ka dashur të flasë”, është shprehur Zeka. Sipas tij transmetimi nuk është bërë për shkak të ndërhyrjes nga jashtë, pasi që, sipas tij, kryetari i LDK-së, Isa Mustafa, kishte ndërhyrë edhe më parë. “E kam 100 për qind të konfirmuar se drejtpërdrejt Isa Mustafa ka ndërhyrë dhe nuk ka lënë gjë pa thënë kundër menaxhmentit të RTK-së edhe për emisionin që është transmetuar për Degën e LDK-së në Gjakovë. Për këtë kam argumente se me qenë për këtë kisha thënë Hashim Thaçi, por po them Isa Mustafa. Ai e ka thirrur në telefon menaxhmentin dhe ka thënë pse është lejuar emisioni për Degën e LDK-së në Gjakovë dhe pastaj këta janë frikësuar se edhe pas transmetimit të këtij emisioni me Musa Dakën po goditet Isa Mustafa”, ka deklaruar Zeka. “Kam bërë përpjekje që të jetë edhe pala tjetër, por nuk kanë dashur të vijnë. Unë po e garantoj menaxhmentin e RTK-së që asnjëri nga ata nuk do të vijnë të ballafaqohen në emision”, është shprehur Zeka. Gazeta ka kontaktuar me zëdhënësin e LDK-së, Fidan Jupolli, por ai nuk ka dashur të komentojë asgjë lidhur me këtë çështje.

Mirëpo promo e emisionit të patransmetuar e reklamuar disa herë me radhë për pesë ditë rresht, e ka nxitur mysafirin e emisionit të patransmetuar, Musa Daka, që të marrë hapa ligjorë ndaj RTK-së.

Më gjerësisht lexoni sot në gazetën “Koha Ditore”