[Zero Cool]

Qeveria pro ndryshimit të historisë?!






Qeveria e Kosovës ka bërë një marrëveshje me Qeverinë turke që në librat shkollorë të historisë sonë të ndryshohen disa pjesë që kanë të bëjnë me Turqinë.


Burime brenda Qeverisë konfirmojnë për Radio Kosovën marrëveshjen mes të dyja shteteve, ndonëse historianët nga Kosova dhe Shqipëria vazhdojnë ta kundërshtojnë kërkesën e palës turke për këto ndryshime.

Zëvendësministri kosovar i Arsimit, Nehat Mustafa, thotë se ndryshimet do të bëhen për shkak se autorët e teksteve historike kanë bërë gabime.

“Kompromis do të ketë në disa pjesë ku autorët e historisë nuk kanë ditur të bëjnë dallime midis Turqisë dhe Perandorisë Turke. Edhe strategjia e BE-së kërkon që tekstet të lirohen nga gjuha e dhunës”, ka thënë Mustafa për Radio Kosova.

Edhe Ministri turk në Qeverinë e Kosovës, Mahir Jagxhilar, konfirmon marrëveshjen mes të dyja vendeve, por nuk jep detaje rreth ndryshimeve që mund të bëhen.

“Ka disa gjëra që duhet të ndryshohen, për të hequr perceptimet e gabuara që janë krijuar në kohën e komunizmit për Turqinë”, thotë Jagxhillar.

Pëllumb Xhufi, historian nga Universiteti i Tiranës, thotë se ndryshimet mund të bëhen për shkaqe politike, por e vërteta është se nuk ka asgjë fyese dhe jo reale në librat historike.

“Në tekstet e historisë së popullit shqiptar nuk ka gjuhë fyese. Qeveria e Kosovës - nëse pranon ndryshimet - atëherë bënë pranimin e një kërkese politike dhe për nevoja politike”, thotë Xhufi.

Sipas tij, një kërkesë e tillë është dashur të shqyrtohet me autoritetet e Shqipërisë, për shkak se Shqipëria dhe Kosova ndajnë të njëjtën materie historike për periudhën për të cilën kërkohen ndryshimet.

Ministria e Arsimit e Kosovës pritet që nga muaji i ardhshëm të formojë ekipet punuese që do të rishikojnë pjesët e historisë që kanë të bëjnë me Turqinë dhe Perandorinë Osmane.