[Bjeshka1]

• Gilmana Bushati GAZETA SHQIPTARE

Ministri i Jashtëm, Lulzim Basha takoi disa nga përfaqësuesit më të lartë të Organizatës së Konferencës Islamike, duke filluar me sekretarin e Përgjithshëm të kësaj organizate, Ekmeleddin Ýhsanoglu, me të cilin u fol kryesisht për çështjen e Kosovës. Ihsanoglu është shprehur në këtë takim se “pavarësia e Kosovës është fakt real pas një lufte të gjatë dhe të vendosur të popullit të saj”. Më tej, ashtu siç ishte vendosur dhe më parë, sekretari i Përgjithshëm, në emër të kësaj organizate shtoi se konferenca solidarizohet me “vëllezërit dhe motrat kosovare”. “Komuniteti mysliman u dëshiron atyre sukses dhe i uron në përpjekjet për ndërtimin e shtetit”, - është shprehur në takim Ihsanoglu.
Ministri Basha gjithashtu është takuar me drejtuesit e dy vendeve, të cilët janë shprehur se shumë shpejt do ta njohin pavarësinë e Kosovës, si me ministrin e Jashtëm të Arabisë Saudite, princin Saud Al Faysal dhe me emirin e Emirateve të Bashkuara. Njoftohet se këto dy vende kanë marrë në shqyrtim vendimin për ta njohur pavarësinë e Kosovës dhe pritet që shumë shpejt t’u renditen vendeve të tjera të Konferencës Islamike, që e kanë njohur Kosovën si shtet. Por Basha është takuar dhe me ministrin e Jashtëm egjiptian, Aboul Gheit dhe me presidentin e Indonezisë, Susilo Bambang Yudhoyono, dy vende që kundërshtuan përfshirjen e pavarësisë së Kosovës si çështje për t’u diskutuar dhe për t’u përfshirë në deklaratën përfundimtare të samitit të 11 të Organizatës së Konferencës Islamike. Basha në dy ditët e samitit, i cili u mbajt në Dakar të Senegalit, u takua dhe me drejtues të tjerë të vendeve islamike, si emirin e Katarit, me sekretarin e Përgjithshëm të OKB-së, Ban Ki Mon, me ministrin e Jashtëm të Kuvajtit, me sullnatin e Bruneit, presidentin e Palestinës, me kryeministrin e Libanit dhe me zëvendëspresidentin e Sirisë. Një takim të veçantë Basha pati me presidentin e Turqisë, Gul dhe me ministrin e Jashtëm të këtij shteti Babacan. Që të dy këta zyrtarë të lartë turq, i dhanë mbështetje Bashës jo vetëm sa i takon çështjes së Kosovës, por edhe në përpjekjet e vendit tonë në proceset e integrimit, kryesisht në anëtarësimin e NATO-s. Në samitin e 11-të të Organizatës së Konferencës Islamike, pritej të shkonte kryeministri Berisha. Por ai e anuloi vajtjen në Dakar të Senegalit, duke lënë që Basha të përfaqësonte Shqipërinë në këtë samit. Berisha u angazhua në një seminar të PPE-së, mbajtur në Bruksel më 12 mars. Në këtë seminar, kryeministri ka lobuar jo vetëm për Kosovën, por edhe për anëtarësimin e Shqipërisë në NATO. Për çështjet që kanë mbetur pezull në këtë samit, që është edhe ajo e Kosovës, mësohet se do të ketë edhe një tjetër mundësi në qershor të këtij viti.