[Zero Cool]

Pishpirik ne facebook


Adhuruesit e lojës së njohur me letra Pishpirik tani më mund ta gjejnë këtë lojë dhe në Facebook. Pas qëndrimit katër-mujor në inkubatorin e Innovation Centre Kosovo (ICK), ekipi prej katër anëtarësh i kompanisë “Punëtoria”, të hënën ka lansuar produktin e tyre të parë, lojën online Pishpirik, zbavitjen e njohur me letra, në të cilën mund të luajnë me miliona njerëz anë e mbanë botës.

Uranik Begu, drejtor ekzekutiv i ICK-së, ka thënë sot se presin që kjo lojë të ketë njohje rajonale dhe globale. Sipas tij, për të arritur rezultate në tregun global, s’është aspak e lehtë, por se me punën e këtyre të rinjve dhe me mbështetjen e ICK-së dhe kjo është e mundur.

“Për të arritur rezultate sot në tregun global nuk është shumë e lehtë. Por me punë këta djem të ri dhe me ndihmën e ICK-së në këtë rast, kanë dëshmuar që është e mundur. Ky është një fillim i ri për ta, sepse është fillim i ri edhe për shumë anëtarë tjerë të inkubatorit që kemi, për të cilët presim që të kemi dhe ngjarje të reja dhe lansime të reja të produkteve të tyre”, ka pohuar ai.

Ndërsa Florimet Klinaku, nga kompania “Punëtoria”, i cili bëri prezantimin e lojës ka thënë se ideja e tyre për këtë ka qenë shumë moti, por punë efektive rreth saj ata kanë bërë katër muaj. Klinaku thotë se ata me këtë lojë kanë hyrë në një treg të vështirë, por i cili është fitimprurës. Megjithatë, sipas tij, në Kosovë është paksa e vështirë të depërtosh, por shpreson se do t’ia dalin.

“Ne kemi aplikuar në inkubatorin e ICK-së. Mbështetja e tyre ka qenë shumë e madhe. Gjithashtu, kemi fituar një grant, i cili e ka mundësuar publikimin e lojës. Se a do të kemi sukses si biznes, ne kemi hyrë në një treg shumë të vështirë por dhe shumë fitimprurës. Por, ka mbetur të shihet se a mund të ia dalim apo jo. Thjeshtë duhet me gjet alternativa, sepse në Kosovë është shumë vështirë. Gjendja ekonomike është shumë e vështirë për me pas sukses, por duhet me gjet alternativa tjera. Unë shpresoj se do të ia dalim”, ka thënë ai.

Edhe Safet Rama, menaxher i inkubatorit në ICK ka pohuar se ekipi “Punëtoria”, kanë aplikuar para katër muajve në ICK dhe janë pranuar në inkubator. Gjatë këtyre katër muajve, përveç hapësirës në ICK, atyre u është ndihmuar dhe me këshilla dhe trajnime të ndryshme. Rama ka pohuar se nuk kanë munguar idetë për ta as nga ana e tyre, pasi që këta janë të rinj dhe iu mungon qasja në biznes. Inkubatori i ICK-së sipas tij është një vend i cili u jep përkrahje dhe një rrugëtim të mbarë të rinjve, në mënyrë që idetë e tyre t’i shndërrojnë në biznes profitabil.

“Loja pishpiriku është pak e vështirë me u komercializu sepse është një lojë në traditat tona dhe është luajt për qejf. Por tani pasi që kjo lojë luhet shumë në Ballkan, mendojmë që t’i ndihmojmë të depërtojnë sidomos në tregun turk, në Shqipëri, Maqedoni, Serbi, në gjithë rajonin, ku luhet me të madhe. Tregu i Kosovës është treg i vogël, për këtë lojë dhe qëllimi është me u zgjeru dhe shpresojmë që me reklama të ndryshme dhe dhurata të ndryshme duke i dërguar njëri-tjetrit mund të bëhet fitim”, ka thënë ai.

Ndryshe, loja Pishpirik mund të gjendet në Facebook dhe të gjithë ata që kanë llogari të krijuar në rrjetin social më të madh në botë, mund të kenë qasje në Pishpirik. Ideja fillestare e shndërrimit të Pishpirikut në lojë që mund të luhet në Facebook ka qenë e Floriment Klinakut dhe Alket Rexhepit, ndërsa realizimin e kësaj ideje në produkt final, e kanë ndihmuar Atdhe Konjufca dhe Pëllumb Hasani.