[hasanmehmeti]

Vazhdimi i temes se mesiperme mbi Zeqatin

Muhammedi alejhis-selam ka thënë: "Nuk ndalon një popull dhënien e zekatit veçse Allahu ka për t`i sprovuar me skamje." Transmetoi Tabaraniu ndërsa Ibn Huzejme dhe Tabaraniu transmetojnë: "Atij që jep zekatin e pasurisë së tij i largohet e keqja e tij." Ibn Maxheh, Bezzari dhe Bejhakiu transmetojnë se Muhammedi alejhis-selam ka thënë: "Nëse ndalojnë dhënien e zekatit, do t`u ndalohet uji nga qielli e sikur mos të ishin kafshët nuk do t`u hidhej shi." Hadithin e saktësoi Hakimi dhe i këtij mendimi ishte Dhehebiu.
O ju pasanikë të nderuar! Përkujtoni jetimët, të dobëtit, vejushat dhe të varfërit, ata kanë të drejtat e tyre të detyrueshme në pasurinë tuaj. Për to ju jeni përgjegjës dhe do t`u kërkohet llogari. Aliu (Allahu qoftë i kënaqur prej tij!) ka thënë: Allahu i bëri detyrë të pasurve muslimanë të japin një pjesë të pasurisë në masën e cila i bën dobi të varfërve e të varfërit nuk kanë për të vuajtur urie veçse për shkak të asaj që bëjnë të pasurit. Allahu ka për t`i kërkuar atyre llogari të ashpër.
Frikësojuni Allahut o robërit e Tij dhe jepeni zekatin e pasurive tuaja duke qenë të kënaqur në zemrat tuaja dhe duke larguar kështu të këqijat e pasurive tuaja, prandaj pastroni me të fenë dhe Ahiretin tuaj. "Merr prej pasurisë së tyre lëmoshë që t’i pastrosh me të dhe t’u shtosh të mirat dhe njëkohësisht lutu për ta, " (Et-Teube: 103)
O ti i cili nuk e jep atë që Allahu ta ka bërë detyrim, a nuk frikësohesh nga zemërimi i Allahut, a nuk frikësohesh nga fatkeqësitë që mund të të ndodhin në pasurinë tënde apo në trupin tënd e të mos mundesh ta shijosh më atë! Muhammedi alejhis-selam ka thënë: "Ka humbur robi i dirhemit, ka humbur robi i dinarit, nëse i jepet diçka kënaqet e nëse nuk i jepet gjë hidhërohet ..." transmetoi Buhariu. Në hadithin tjetër thuhet: "Çdo mëngjes dhe pasdite dy engjëj thërrasin: O Allah, gjithkujt që jep sadaka jepi kompensim, gjithkujt që nuk jep sadaka jepi shkatërrim." Transmetoi Buhariu.
O vëllezër të një besimi! Muslimanët ashtu si edhe të tjerët janë çuditur papritur nga një ngjarje e rëndë e cila të thinj flokët, para saj zemra dridhet, lapsat dhe gjuha nuk mund të përshkruajë dhimbjet. Bëhet fjalë për shpërthimet që ndodhën në kryeqytetin e Teuhidit Rijad, natën e të dielës së shkuar. Me e çuditshmja është se kjo ndodhi në atë muaj të cilin Allahu e ka lartësuar më shumë se të tjerët. Prandaj kjo ngjarje ishte një krim i madh i cili dëmtoi vendin dhe njerëzit. Të gjithë muslimanët e denoncojnë një akt të tillë kriminal, edhe dijetarët janë të një mendimi të përbashkët se ky ishte një krim i madh dhe një haram i madh. Ky akt është në kundërshtim të plotë me dy shpalljet, Kur`anin dhe Sunnetin. Allahu i Madhëruar ka thënë: (ky është komentimi i ajetit) " Mos bëni çrregullime në tokë pas rregullimit të saj (pas ardhjes së pejgamberëve) ..." (El-A`raf: 56) dhe "All-llahu nuk e do shkatërrimin." (El-Maide: 64) Ky është një akt që e përmbledh thënia e Allahut të Madhëruar (ky është komentimi i ajetit) "E ata që dëmtojnë besimtarët dhe besimtaret, për ç`ka ata nuk janë fajtorë, ata kanë ngarkuar veten me shpifje dhe me një mëkat shumë të madh." (El-Ahzab: 58) Kjo është një ngjarje të cilën asnjë llogjikë apo fe nuk e pranon. Muhammedi alejhis-selam ka thënë: "Çdo musliman e ka haram gjakun, pasurinë dhe nderin e çdo muslimani tjetër." Transmetoi Muslimi. Në porosinë e tij në hytben e lamtumirës ka thënë: "Me të vërtetë gjaku, pasuria dhe nderi juaj është haram për njëri-tjetrin ashtu siç është e shenjtë kjo ditë në këtë vend." Transmetoi Buhariu dhe Muslimi. Muhammedi alejhis-selam ka thënë: "Besimtari vazhdon të jetojë i lirë në fenë e tij për sa kohë që nuk ka derdhur gjak të ndaluar." Ky akt vrau, dëmtoi, dogji, shkatërroi dhe prishi. Për çfarë gjynahu u vranë ata persona, me ç`të drejtë u shkatërruan ato ndërtesa, çfarë qëndrimi do të mbajnë ata persona që bënë këtë vepër kur të dalin para Allahut të Madhëruar ndërkohë që Ai i ka premtuar robërve të tij besimtarë: "Kush e vret një besimtar me qëllim, dënimi i tij është Xhehennemi, në të cilin do të jetë përgjithmonë. All-llahu është i hidhëruar ndaj tij, e ka mallkuar dhe i ka përgatitur dënim të madh." (En-Nisa: 93)
Ky akt kriminal është kundërshtim i mësimeve të Islamit i cili ka treguar kujdes të madh për të mbrojtur pesë gjërat më të domosdoshme të njeriut. Pejgamberi alejhis-selam ka thënë: "Kush ngrin armët kundër nesh nuk është prej nesh." Dhe ka thënë: "Atë që i drejton vëllait të tij qoftë edhe një hekur e mallkojnë engjëjt." Transmetoi Buhariu.
Ky akt shkatërrues bëri që të frikësohen muslimanët, të vriten besimtarë dhe të shkelen marrëveshje. Muhammedi alejhis-selam ka thënë: "Kush del mbi popullin tim dhe rreh të mirët e të këqijtë, që nuk do t`ia dijë për besimtarët dhe nuk i plotëson marrëveshjet me ata që janë lidhur ato, ai nuk është prej meje e unë nuk jam prej tij." Transmetoi Muslimi.
Çfarë qëndrimi do të mbajnë ata që kryen këtë akt kur të dalin para Allahut i cili i ka paralajmëruar ata duke thënë: (ky është komentimi i ajetit) "Edhe ata që përveç All-llahut, nuk lusin zot tjetër dhe nuk vrasin njeriun që ka ndaluar All-llahu, por vetëm kur e meriton në bazë të drejtësisë, dhe që nuk bëjnë kurvëri, ndërsa kush i vepron këto, ai gjen ndëshkimin." (El-Furkan: 68) Si do të dalin para Tij ndërkohë që Muhammedi alejhis-selam ka thënë: "Gjynahet më të mëdha janë: T`i bësh shirk Allahut, të vrasësh dikë, të kundërshtosh prindërit dhe dëshmia e reme." Transmetoi Buhariu dhe Muslimi.

Pprap vazhdon tema e njejte mbi Zeqatin