[Pupi]

Njofton Radio Televizioni i Kosovës.

Turqia kërkon njohjen e Kosovës në Samitin e Konferencës Islamike

Ministrat e Jashtëm të Organizatës së Konferencës Islamike janë takuar të hënën në Dakar për të diskutuar përgatitjet që po bëhen për mbajtjen e samitit të këtyre shteteve më 13 dhe 14 të këtij muaji.
Ministrat kanë diskutuar dokumentet që do të duhej të miratoheshin në samit. Sipas gazetës turke 'Zaman", Turqia është munduar që në një pikë të konkluzioneve të fusë edhe njohjen e pavarësisë së Kosovës, por kjo është kundërshtuar nga Azerbajxhani, Egjipti, Sudani dhe Indonezia. Në vend të kësaj në dokument vetëm do të shprehet solidariteti me popullin e Kosovës. Megjithatë, Ankaraja do të insistojë për njohjen e Kosovës në takimet me ministrat dhe kryetarët e shteteve islamike. Deri tash pavarësinë e Kosovës e kanë njohur 5 shtete të Konferencës Islamike – Shqipëria, Turqia, Malajzia, Afganistani dhe Senegali, kurse njëjtë pritet të veprojnë shumë shpejt Arabia Saudite dhe Emiratet e Bashkuara Arabe.