[Dilaver]

Ambasadorja Ris: "Biznesi amerikan do të angazhojë në këtë investim 600 milionë USD"

Projekti përmbush nevojat për gaz e energji

Mbështetja për projektin është në ditën e saj më të mirë dhe asgjë nuk mund të na bënte më shumë të lumtur se kaq, thonë përfaqësuesit e ASG Power SA. Gatishmëria e gjetur për realizimin e këtij projekti i bën nder qeverisë shqiptare dhe partnerëve të saj strategjike, ku ASG Power veçon përfaqësinë diplomatike dhe zyrën ekonomike amerikane në Tiranë.
Edhe pse në Shqipëri prej 3 vitesh, problemi kryesor i projektit deri tani ka qenë vend-vendosja e qartë e tij. Në bashkëpunim me partnerët zbatues, SAIPEM- Grupi ENI, kompania ka shpenzuar deri tani disa milionë dollarë për të bërë vlerësimet teknike të terreneve të ndryshme që u janë propozuar herë pas here. Qeveria Berisha përfundimisht propozoi për këtë investim zonën pranë grykëderdhjes së lumit Seman.
Duke i falenderuar madje për durimin e treguar, kryeministri Berisha shprehu kënaqësinë e tij për shanset që një investim i tillë serioz ofron për ekonominë vendase dhe në tërësi për realitetin ekonomik shqiptar.
"Me konsorciumin gjetëm një mirëkuptim të shpejtë për vendin e ndërtimit të këtij termocentrali me gaz likuid shumë të fuqishëm. Unë i siguroj se do i mbështesim fuqimisht që këtë ëndërr të tyre të madhe ta bëjnë sa më shpejt realitet... Qeveria shqiptare, nënvizoi kryeministri do të mbështesë fuqishëm përpjekjet për të realizuar këtë projekt të madh. Ky është një nga investimet më të mirëpritura dhe më të rëndësishme që bëhet në Shqipëri, dhe jo vetëm për Shqipërinë, por edhe për rajonin në tërësi", deklaroi zoti Berisha.
Ambasadorja e SHBA në Tiranë, Marsi Ries, tha në hapje të veprimtarisë se ky projekt është një mbështetje e rëndësishme për ekonominë shqiptare.
"Ky projekt është investimi më i madh që është bërë ndonjëherë në Shqipëri. Ky investim do ta bëjë Shqipërinë një faktor të rëndësishëm për energjitikën në Europë dhe do të mbështesë investime të tjera që do të vijnë këtu... Çka është e rëndësishme, nënvizoi ambasadorja, është fakti që në përfundimin e këtij projekti mund të ofrohet energji e mjaftueshme, për të gjitha nevojat që Shqipëria ka për energji dhe për gaz". Ambasadorja Ries tha se, qeveria amerikane rithekson me këtë rast mbështetjen e saj për rritjen e ekonomisë shqiptare. "Kjo është gjithashtu një diçka e mirë për biznesin amerikan, i cili po merr pjesë në këtë projekt me afro 600 milionë USD. Pjesëmarrja e US EXIM Bank (Banka e Eksport-Importit e SHBA) hap mundësi të tjera për investime të reja të kompanive amerikane", tha ambasadorja amerikane në Tiranë.
Të pyetur nëse ndihen të lodhur nga vonesat përballë administratave shqiptare, përfaqësuesit e ASG Power përgjigjen thjesht se, "Eshtë mirë gjithçka që përfundon mirë".
"Sikur të kishim trokitur në dyert e administratës në Itali, vonesat për realizimin e projektit do të kishin qenë edhe më të mëdha", thotë gjithnjë i gatshëm për t'iu përgjgjur pyetjeve tona zoti Agim Gjinali.
Gjatë bisedave pas ceremonisë me drejtues të ASG Power, kryeministri Berisha ka risiguruar ata dhe ambasadoren amerikane në Tiranë, se qeveria që ai drejton është thellësisht e angazhuar për ta bërë realitet shndërrimin e Shqipërisë në vendin më mikpritës të investimeve të huaja.
Drejtori i kompanisë ASG Power SA, theksoi në prezantimin e tij se me këtë projekt "Ne i ofrojmë Shqipërisë një shans të rëndësishëm zhvillimi dhe presim prej saj dhe qeverisë së saj partneritetin e natyrshëm, ku respektohen afatet, procedurat dhe ligji për të maksimalizuar shanset e përbashkëta. Mirëkuptimi dhe gatishmëria e qeverisë shqiptare për ta sjellë në jetë këtë investim janë për ne një detyrim i drejtpërdrejtë për të përmbushur angazhimet e marra dhe për të ofruar atë që pritet prej nesh. Jemi të lumtur që na jepet ky shans".



Me sy nga biznesi vendas

Por megjithë mbështetjen e lartë për këtë investim të rëndësishëm të huaj, zoti Berisha ka preferuar t'u përsërisë drejtuesve të ASG Power SA kërkesën për asistentë që në fazën zbatimore të projektit biznesi shqiptar të përfshihet me krejt përvojën dhe kapacitetet e tij për të rritur shkallën e përfitueshmërisë kombëtare prej këtij investimi. "Unë jam i sigurt, tha zoti Berisha, se biznesi shqiptar e ka arritur tashmë qoftë pjekurinë ashtu edhe përmasën për të qenë një partner i vërtetë në zhvillimin dhe realizimin e këtyre projekteve madhore, që paraqesin interes si në fazën zbatimore ashtu edhe në atë të shfrytëzimit".
Sipas kryeministrit, i cili gjeti në këtë qasje edhe mbështetjen e përfaqësuesve të biznesit vendas, kompanitë shqiptare mund të ishin një partner real i ASG Power për të realizuar ndërtimin e veprës, ashtu edhe për të investuar në të. Dine Fratari, president i Konfindustria-s Shqiptare, tha në këto takime të vogla miqësore se, biznesi shqiptar ka një aftësi financiare që mund të arrijë në afro një miliard Euro dhe mund të përfshihet shumë mirë në investime të tilla strategjike. Impjanti i gazit në zonën e Fierit sipas specialistëve të Ministrisë së Ekonomisë nënkupton gjithashtu një shans real që mund të ringjallte industrinë petrokimike dhe industritë e tjera në Fier, "është shumë më tepër se thjesht një TEC apo gazsjellës", thotë ing.Miltiadh Mata. Eshtë një shans i ri dhe tejet optimist për ringjalljen e një sërë industrish që sot vuajnë mungesën e gazit natyror. Në impaktin e përgjithshëm, kjo ngjarje e tejkalon përmasën e një kompanie. Ajo i përket gjithë ekonomisë së vendit".