[Fshatari]

Deklarata e Ben Emmerson në emër të ekipit mbrojtës të Ramush Haradinajt
Më në fund, pas shtatë viteve të gjata, dhe dy gjykimeve të gjata, kjo Gjykatë ka sjellur drejtësi për Ramush Haradinajn dhe për popullin e Kosovës.
Zoti Haradinaj ka kërkuar nga unë që t’u falemnderohem të gjithë atyre në Kosovë, si dhe bashkësine e gjerë ndërkombëtare që në mënyrë solide qëndruan me të gjatë gjithë kësaj përvoje të hidhur.
Ai ka kërkuar nga unë që të them se ai do të kthehet në Kosovë këtë mbrëmje, dhe me pëlqimin e popullit, shumë shpejt do ta rikthejë pozitën e merituar si lider politik i vendit, duke e udhëhequr qeverinë e cila i përfaqëson të gjithë qytetarët e Kosovës, pavarësisht se cilën gjuhë e flasin, pavarësisht se nga vijnë, dhe pavarësisht përkatësisë së tyre kombëtare. Ka ardhur koha për pajtim.
Ai ka kërkuar nga unë që të them se si lider i Kosovës së lirë ai do ta luftojë korrupsionin kudo që gjindet, dhe do të merret me të me vendosmëri. Ai do të garantojë të drejta për të gjitha minoritetet, dhe do të sigurojë pjesëmarrjen e plotë politike për të gjithë serbët e Kosovës.
Mbi të gjitha, ai do t’i rimarrë detyrat që ia ka ndërprerë kjo ndjekje penale e keqgjykuar, duke e udhëhequr vendin drejt fazës tjetër të këtij rrugëtimi të gjatë drejt pavarësisë dhe sovranitetit të plotë.
Me mbështetjen e bashkësisë ndërkombëtare, dhe me pëlqimin e popullit, ai do ta përfundojë punën që e ka filluar kur u bë Kryeministër në vitin 2004 duke sjellur Shtetësi të plotë për një Kosovë të pavarur.
Me këtë udhëheqje, Kosova shumë shpejt do ta merr vendin e merituar në mesin e bashkësive të kombëve, dhe do ta fitojë ulësen e vet në Kombet e Bashkuara.
Kërkoj falje nëse konstatoj atë që është më se e qartë në këtë moment. Ky verdikt që vjen pas njërit prej proceseve më të gjata e më raskapitëse penale që ndonjëherë janë zhvilluar në historinë e ligjit penal ndërkombëtar, është shfajësim i plotë i pafajësisë së Zotit Haradinaj. Ai dëshmon përtej dyshimit më të vogël të mundshëm se ai ka qenë hero i luftës dhe jo kriminel i luftës.
Ka ardhur koha që armiqtë e Kosovës së lirë ta pranojnë verdiktin e historisë. Ky gjykim duhet t’i heshtë, njëherë e përgjithmonë, të gjithë ata zyrtarë të lartë që janë në maje të udhëheqësisë më të lartë të qeverisë në Beograd të cilët kanë nxjerrë gënjeshtra lidhur me këtë rast, madje edhe në ditët kur po afrohej gjykimi.
Zoti Haradinaj është sjellur si burrë shteti gjatë gjithë këtyre proceseve, që kur ka marrë pozitën e kryeministrit, në mars të vitit 2005, dhe u shfaq vullnetarisht për t’iu përgjigjur Hagës për të gjitha këto akuza. Si burrë shteti, ai nuk do të dëshironte që unë ta akuzoja udhëheqësinë aktuale në Beograd se qëllimisht po gënjejnë në lidhje me të, dhe në lidhje me këtë rast, në mënyrë që ta mashtroj publikun. Por si avokat i tij, mund të them pa çfarëdo dykuptimësie të mundshme se zyrtarët e lartë kanë kaluar javën e fundit duke nxjerrë deklarata për të cilat dijnë se nuk janë të vërteta.
Dje pasdite, Prokurori aktual Serge Brammertz ka qenë i detyruar të intervenojë për t’i dhënë fund kësaj kampanje të ndotur e të pandershme duke e bërë të qartë se deklaratat zyrtare ngra prokurori për Krime të Luftës në Beograd në lidhje me frikësimin dhe vrasjen e dëhsmitarëve thjesht nuk ishin të vërteta.
Dhoma e Gjykatës u kthye mbrapa në këtë rast për të siguruar se prokuroia ishte në gjendje t’i thërrasë të gjithë dëshmitarët që ajo dëshironte. Nuk është fare i vërtetë pretendimi se ka pasur vrasje të dëshmitarëve.
Vetë prokuroria konfirmon se as edhe një dëshmitar apo dëshmitar potencial nuk është vrarë.
Dhe Tribunali ka theksuar shumë herë se asnjëherë nuk ka pasur asnjë provë që sugjeron se Zoti Haradinaj ka qenë i përfshirë në ndonjë mënyrë, në ndonjë formë të frikësimit të dëshmitarëve.
Ata që e përsërisin këtë pretendim, atë e përdorin thjesht si mjet për ta sulmuar Tribunalin, apo për ta sulmuar Zotin Haradinaj, dhe për ta fshehur të vërtetën.
Ka ardhur koha që këto gënjeshtra të ndalen. Le të jetë ky gjykim paralajmërim për të gjithë ata që qëllimisht e kanë çorientuar publikun në këtë mënyrë. Loja mbaroi. Përfundoi.
Bota tani e di atë që populli i Kosovës e ka ditur për shtatë vjet me rradhë.
Që kurrë nuk është dashur të ngritej kjo padi. Që kurrë nuk është dashur të ngriten këto akuza.
Njeriu që ka bërë një luftë të ndershme për çlirimin kombëtar kurrë nuk është dashur të gjykohej, duke u ulur në karriga të njëjta sikurse kasapët e Beogradit.
Madje vetëm sugjerimi se ka pasur ndonjë lloj barazvlere ndërmjet politikave gjenocidale të regjimit të Millosheviqit dhe rezistencës së ushtrisë popullore që kërkonte çlirim dhe vetëvendosje për popullin e Kosovës, ka qenë një shtrembërim që nga fillimi.
Kjo ishte barazvlerë e vendosjes së udhëheqëve të rezistencës Franceze në Nuremberg pranë bandave të Rajhut të Tretë të Hitlerit.
Është një individ në veçanti që duhet të japë përgjigje për këtë dhe ajo është ish prokurorja Karla del Ponte.
Natyrisht që do të ketë një analizë të gjatë rreth asaj se si dhe pse del Ponte ka ngritur këto akuza përkundër këshillave të avokatëve të saj të lartë të cilët i patën thënë në atë kohë se nuk kishtë ndonjë provë të qëndrueshme që sugjeronte se Zoti Haradinaj ishte kriminel lufte.
Shumë herë i kishin thënë britanikët dhe amerikanët si dhe të tjerët se këtë e kishte gabim të keq. Por ajo ishte e vendosur të vazhdonte tutje përkundër provave.
Tani do të parashtrohen pyetje rreth asaj se si dhe pse ajo lejoi që zyra e saj të përdorej si mjet për akuza të rrejshme që ishin bërë nga vetë ata zyrtarë të Beogradit që fabrikonin kampanja të spastrimit etnik kundër popullatës shqiptare shumicë të Kosovës.
Do të parashtrohen pyetje se si – madje edhe gjatë këtij rygjikimi – Prokuroria ia lejoi vetes të shfrytëzohej nga Beogradi që të sillej një dëshmitar kyç që u dëshmua se e kishte fabrikuar të gjithë dëshminë e tij. Këtu natyrisht i referohem dëshmitarit famëkeq 81.
Prova që ky dëshmitar e kishte sajuar dëshminë e tij që nga fillimi e deri në fund ishte aq e qartë saqë vetë Prokuroria pranoi se Beogradi i kishte dorëzuar një dëshmitar të rrejshëm. Edhe njëherë.
Por këto janë pyetje për një ditë tjetër. Sot është dita për të festuar faktin se drejtësia më në fund u arrit, dhe u pa që u arrit.
Për sot, krejt ajo që kërkohet është që Karla del Ponte t’i kërkojë falje publike Ramush Haradinajt dhe popullit të Kosovës.
Nëse ajo ka një pikë nderi, ajo do të kërkojë falje për akuzimin e një kryeministri në detyrë, një njeriu me guxim e dinjitet të jashtëzakonshëm, një lideri i cili u mbështet nga Kombet e Bashkuara, i cili u mbështet nga bashkësia ndërkombëtare, dhe i cili u mbështet nga populli i Kosovës si fuqi për bashkim.
Ajo sot duhet të kërkojë falje për përgjegjësinë e saj të plotë për vendimin e lëshimit të Aktakuzës pa ndonjë provë të qëndrueshme që do ta arsyetonte vendimin e saj, dhe përkundër këshillave të avokatëve të lartë të zyres së saj. Ajo duhet të kërkojë falje për abuzimin e pozitës së saj në këtë mënyrë.
Ajo duhet ta ketë ditur se vendimi i saj për akuzimin e Ramushit u ka shërbyer interesave politike të nacionalistëve ekstremistë në Serbi, duke e privuar Kosovën nga lideri i saj politik më efikas gjatë këtij procesi vendimtar të tranzicionit drejt pavarësisë.
Le të kërkojë falje të paktën për këtë. Pra, e përsëris: Madam Del Ponte – duhet t’i kërkosh falje Ramushit, të gjithë kosovarëve, për gabimet tua trashanike të gjykimit të këtij rasti.
Për t’iu kthyer çështjeve më të këndshme, Zoti Haradinaj më ka kërkuar që në këtë rast t’u uroj të gjithë shqiptarëve 100 vjetorin e pavarësisë këtë javë. Kjo ka qenë një ditë e veçantë e flamurit, në një javë shumë të veçantë. Dhe ai pret që ta sjellë pavarësinë e njëjtë për të gjithë qytetarët e Kosovës.
Në fund, si avokat i Zotit Haradinaj, dhe si mik i tij, a mund të them vetëm një gjë duke iu përgjigjur fjalëve të Ramushit?
Vetëm dëshiroj të kërkoj nga të gjithë qytetarët e Kosovës, nga të gjitha përkatësitë etnike, dhe nga të gjithë shqiptarët anembanë botës, që së bashku me mua të themi: "Me Ramushin". Unë jam me Ramushin.
Hagë, 29 nëntor 2012
____________________________
http://kosovapress.com/?cid=1,92,156431

bushtra delponte, dick muti,kouchneri,daçiçi,marnhacu...nuk mjafton te kerkojne falje : duhet te gjykohen e denohen.