[AdelinaFan]

ADELINA ISMAIJLI Pas sëmundjes përgatit rikthiminNachrichtAllgemein



Kjo eshte fotoja ma e reja e Adelines

Kam arritur në jetë më shumë se ç’kam dashur dhe do të vdes e lumtur që isha e para”, kështu është shprehur Adelina në një nga intervistat e shumta për mediat. E vërtetë, ajo ka qenë e para këngëtare shqiptare që ka thyer disa tabu në Kosovë dhe Shqipëri, ndërkohë që ne ishim mësuar me një model shabllon në skenat tona. E kush nuk e mban mend vajzën lozonjare më kaçurrela, e cila nuk ishte më shumë se 14 vjeç kur u shfaq në skenën e festivalit. Por në atë kohë askush nuk mund të imagjinonte që vetëm një vit më vonë ajo vajzë çapkëne do të transformohej në një femër seksi, duke mos ngurruar ta shoqëronte këngën me një striptizë sensuale. Por ajo që të çudit është fakti se ajo edhe sot vijon të mbetet një këngëtare e veçantë edhe pse konkurrenca është mjaft e madhe. Adelina quhet fenomeni kosovar pikërisht për risitë dhe çudirat që solli në muzikën mbarëshqiptare. Gjithmonë ka pasur kuriozitet për të mësuar sa më shumë mbi jetën e saj private, e cila sipas imagjinatës së të gjithëve mund të ishte po aq interesante sa performanca e saj në skenë, mirëpo Adelina ka ditur të jetë e rezervuar duke mos bërë asnjë koment për këtë fakt, duke jua mbajtur antenat ngritur të gjithëve për tëmësuar të renë e radhës “Made by Adelina”. Ja si shkruan një fans i Adelinës në një nga forumet shqiptare në internet: “Ajo është femra më seksi shqiptare. Adelina është yll muzikë, yll arti, yll seksi, yll lirie, yll rebelimi, yll afere, yll i sportit, yll pavarësie. Adelina Ismajli ka thyer akullin, Adelina ka çmendur meshkujt...”

Një koncert 10 mijë euro, absolutisht më e paguara



Adelina Ismajli mbetet ende në toplistën e emrave më të paguar nga organizatorët e koncerteve dhe më e kërkuara nga fansat. Asnjë prej këngëtareve të reja, që kanë hyrë në skenën muzikore kosovare, e madje edhe në skenën shqiptare nuk kanë mundur të arrijnë në nivelet e Adelina Ismajlit. Sepse në ditën e saj më të mirë, këngëtarja ka arritur të fitojë deri në 10 mijë euro në një koncert ndërkohë, që janë vetë kolegët e saj shqiptarë, të cilët tregojnë se është e vetmja këngëtare, për të cilën sallat dhe lokalet janë të tejmbushura. Me zërin e saj të spikatur e natyrisht edhe pamjen tepër intriguese Adelina Ismajli ka arritur të shndërrohet në këngëtaren më të kërkuar, sidomos për shqiptarët e diasporës. U fol se dalja e Genta Ismajlit kishte nisur të dobësonte “potencën” e Adelinës, por në fakt mësojmë se shuma, që paguhet për të pasur Gentën në një koncert është gati sa gjysma e shumës me të cilën paguhet Adelina. As motra e saj e bukur Zanfina nuk ka mundur kurrësesi deri më sot, të arrijë në nivelet e Adelinës.


Jeta private, nga meshkujt problematikë tek Alban Skënderaj

Edhe pse e kyçur mbi jetën e saj private, ndonjë thashethem ka qarkulluar për lidhjet e saj me meshkujt. Ajo vetë ka pohuar se nga vitit 1997 deri në vitin 2000 ka pasur një lidhje të rëndësishme, por asgjë më shumë se kaq. Më pas vetëm është përfolur dhe hamendësuar për lidhje të ndryshme. Natyrisht duke qenë me banim ne Prishtinë, mediat e Shqipërisë nuk e kanë pasur të lehtë që të vjelin lajme për të. Por edhe kronikat rozë të Kosovës nuk kanë ngelur duarkryq. Kështu ato e kanë përshkruar në detaje një natë romantike në një bar të njohur të Prishtinës, ku këngëtarja është parë në shoqërinë e Alban Skënderajt. Madje shkohet më tutje duke aluduar për një lidhje të mundshme pasi çuditërisht që të dy këngëtarët janë tërhequr nga jeta artistike në të njëjtën kohë. Një tjetër thashethem vë në qendër të vëmendjes një tjetër djalë, që dikur ka qenë i dashuri i Adelinës, ndërsa tani thuhet se po shoqërohet me Nora Istrefin, një tjetër këngëtare bukuroshe dhe e talentuar nga Kosova. Ky lajm është pak absurd pasi thuhet se të dy këngëtaret janë shoqe dhe nuk ka sesi njëra të shkojë me ish të dashurin e tjetrës, por megjithatë nuk i dihet, gjithçka ndodh. Ndërkohë një lajm tronditës tjetër nga Prishtina na bën me dije se një natë, kur në një kazino ka ndodhur një vrasje, Adelina ka qenë e shoqëruar me njërin nga autorët e kësaj vrasjeje. Nuk kemi pasur asnjë mundësi për ta konfirmuar këtë lajm. Shpresojmë që në një intervistë të afërt me këngëtaren, hamendësimet dhe lajmet e pakonfirmuara, të marrin përgjigje.

Gjithnjë e më rrallë me krijime të reja

Ka lëvruar pothuajse të gjitha gjinitë e muzikës, pop, rok, folk... Ka prekur të gjitha temat e mundshme në tekstet e saj, duke i shokuar të gjithë me të papritura. Po paraqitja skenike? E veshur nga koka tek këmbët kur këndon strofën dhe sapo vjen refreni, të gjitha rrobat në tokë duke u shfaqur me të brendshme që nxjerrin në pah format e saja marramendëse. Një vajzë e bukur, trendy, që u bë model për shumë vajza por sidomos për këngëtaret e reja. Edhe pse ka filluar të nxjerrë gjithnjë e më rrallë një këngë të re, gjithsesi ajo arrin menjëherë të tërheqë vëmendjen e të gjithëve.

E vërteta e sëmundjes


Eshtë parë për herë të fundit në skenë në koncertin e Vitit të Ri dhe më pas asnjë dalje e saj në publik, asnjë turne, madje thuhet se këngëtarja ka anuluar disa kontrata me mjaft leverdi. Sipas burimeve tona në Prishtinë, thuhet se Adelina ka marrë ftohje në mushkëri dhe situata është rënduar pasi ajo pi shumë cigare si dhe tepron me pijen. Tani mjeku i ka ndaluar rreptësisht jo vetëm cigaren, por ai kontrollon edhe dietën e saj. Thuhej gjithashtu që këngëtarja ishte për kura në Turqi, në Zvicër, dikush tjetër aludon se mund të jetë shtatzënë, por e kontaktuar në telefon nga redaksia, e ëma na pohoi se ajo është në Prishtinë, në fshat tek daja i saj. E pyetur nëse është e vërtetë që e bija do të tërhiqet nga kënga, ajo na u përgjigj: “Nuk e ka menduar asnjëherë, madje tani po përgatitet për klipin e ri dhe së shpejti do të jetë në skenë.” Gjithashtu e ëma e mohon faktin se e bija është e sëmurë duke mos dhënë më shumë detaje rreth fjalëve që qarkullojnë në media dhe ambientet artistike.

Pamje gjithnjë e më seksi



Në daljet e saj të para, krahas cilësive të tjera, të binin në sy flokët e bollshëm kaçurrela. Në përpjekje për të qenë gjithnjë ndryshe, Adelina ka eksperimentuar shumë me flokët e saj, ka qenë e para që ka përdorur gërsheta extention që më pas u bënë modë. Ndërsa sot thuhet se këngëtarja e ka aq pisk me flokët sa është detyruar të përdorë paruke. Nuk e dimë sa e vërtetë është, pasi nuk kemi mundësi ta konfirmojmë. Kur ende 14 vjeç dhe tejet e imët këndonte “Mos ma gjuj diellin me gurë”, nuk kishte asgjë seksi në pamjen e saj, përveç lirshmërisë në skenë që nuk e kishte pasur asnjë këngëtare tjetër. As buzë të mëdha, as vetull me një të çarë në mes (ishte në fakt Adelina ajo që solli këtë lloj vetulle në modë as mollëza të kërcyera e as fizik seksi. Por vajza çapkëne një vit më pas do të shfaqej me një pamje më seksi. Edhe pse natyra i ka falur një trup elegant, ajo është aq e fiksuar mbas trupit të hollë dhe mban dietë vazhdimisht për të mos shtuar asnjë gram.