Racizem pa Pardon !

[Shpati]

RACIZËM PA PARDON!Publikuar më 14 tetor, 2009 në orën 13:35 ( Para 6 orë e 41 minutave )Tafil Duraku | Opinion | - Reagim kundër të pavërtetave antishqiptare të gjermanit Thilo Sarrazin, thënë te revista "Lettre Internacional", publikuar në www.shekulli.com.al, më 13 tetor 2009

Sipas revistës "Lettre International", siç njoftojnë mediat, intervista e ish-senatorit për financat e Berlinit, Thilo Sarrazin, ka shkaktuar një debat të zjarrtë për politikat e imigrimit dhe të integrimit. Ai, madje, ka dhënë një deklaratë tepër raciste dhe të pambështetur shkencërisht, duke deklaruar: "Turqit po e pushtojnë Gjermaninë, në atë mënyrë si 'kosovarët' pushtuan Kosovën: me anë të numrit të lartë të lindjeve."

Kjo deklaratë raciste dhe e pa pardon e gjermanit të pamatur është tepër qesharake dhe tepër e pabazuar, e, madje, do ta quanim një deklaratë tejcinike dhe me prapavi politike të përmasave të racizmit pa pardon. Këtu, duam ta sqarojmë opinionin, duke reaguar fuqishëm në deklaratën e Thilo Sarrazin-it, se turqit dhe shqiptarët e Kosovës nuk kanë asnjë pikëmbështetje për barasvlerësim. E, me këtë duam të themi se krejt element tjetër janë turqit në Gjermani dhe element krejt tjetër janë shqiptarët ("kosovarët") në trojet e tyre të pushtuara stërgjyshore shqiptare, në Kosovën e pushtuar shqiptare, e cila paraprakisht qe pushtuar nga Turqia dhe më pastaj nga Serbia e Jugosllavia. Këtu, duam t'i sqarojmë opinionit rajonal e ndërkombëtar se deklarata e Thilo Sarrazin-it është më tepër se raciste, sepse, nuk mund të krahasohet një popull autokton, siç janë shqiptarët në Kosovën e tyre të pushtuar, me një popull siç janë turqit në Gjermani, siç janë edhe shqiptarët në Gjermani. Shqiptarët në Gjermani, janë sikurse të gjithë të huajtë, por, në Kosovën e tyre të pushtuar serbo-kosovaro-ndërkombëtarisht, nuk janë pushtues, siç ua mvesh ish-senatori i financave i Berlinit, Thilo Sarrazin. Pikë së pari, kosovarët nuk janë kosovarë, por, janë shqiptarë të Kosovës së pushtuar shqiptare, dhe, ata, kurrënjëherë nuk kanë qenë pushtues dhe as e kanë pushtuar Kosovën, sepse, Kosova ka qenë, është dhe mbetët djepi i shqiptarizmit. Këtë duhet ta dijë opinioni përparimtar botëror dhe aifarë Thilo Sarrazin, të cilin do ta pyesim botërisht: Sa të pagoi Serbia për të deklaruar se "kosovarët" e pushtuan Kosovën, për të të zhytur aq thellë në racizmin e pa pardon?!...

Të thuash, z. Thilo Sarrazin se "shqiptarët e kanë pushtuar Kosovën"(Sic!), është njësoj sikurse të thuash: "gjermanët e kanë pushtuar Gjermaninë" (Sic!)… Pra, cili dhe kush është ai popull që e pushton shtëpinë e vet, tokën e vet?!... Të tillë janë shqiptarët në Kosovën e tyre të pushtuar, dhe, aspak, nuk qëndron paralelja e tërhequr qëllimshëm në mes të turqve në Gjermani dhe shqiptarëve në Kosovën e tyre të pushtuar.

E tërë bota duhet ta dijë se shqiptarët janë autoktonë në trojet e tyre stërgjyshore shqiptare dhe autoktonia e tyre është me prejardhje mijëvjeçare pellazgo-iliro-shqiptare, dhe, krahasimet e turqve, në Gjermani, me të shqiptarëve, në Kosovën e pushtuar shqiptare, nuk qëndrojnë, prandaj edhe deklarata e z. Thilo Sarrazin është më tepër se racizëm, bile, racizëm pa pardon!...

Dhe, nga ai racizëm i paramenduar, i parapaguar dhe i menaxhuar serbo-ndërkombëtarisht, duhet të hiqet dorë përfundimisht, për t'u kthjelluar ujërat dhe për t'u parë realisht autoktonia e vazhdueshme shqiptare në trojet e pushtuara shqiptare nga fqinjët dhe politikat e tyre antishqiptare e serbo-ndërkombëtare, të prira prej Rusosllavisë!...