PDK staliniste, LDK titiste

[GjIlAnAsI_cSi]

Geci: PDK staliniste, LDK titiste

Anëtari i Kryesisë së Lidhjes Demokratike të Dardanisë, Gani Geci ka hedhur poshtë deklaratat e fundit se ai mund t’i bashkohet Lidhjes Demokratike të Kosovës, ndërkaq në adresë të koalicionit qeverisë PDK-LDK, adresoi një varg kritikash duke i quajtur këto parti me orientime staliniste dhe titiste.

Këto komente Gecit i bëri në një konferencë për medie mbajtur të hënën në objektin e Kuvendit të Kosovës. Akuzat e tij pasuan deklarata e fundit se ai mund ta “tradhtojë” LDD-në dhe t’i kthehet partisë në të cilën i mori hapat e parë në politikë, LDK-së.
“Unë do t’u shpjegoj një gjë të rëndësishme se ata që kërcejnë nga një vend në vendin tjetër në Drenicë quhen karkaleca”, ka thënë Geci. Deputeti i LDD-së tha se këtë spekulime për ndryshim të “formacionit” i kanë bërë përfaqësuesit e partive të koalicionit, PDK-LDK. Madje këtë të fundit ai nuk hezitoi t’i quaj parti diversantë me pikëpamje staliniste dhe titiste.
PDK, sipas tij, ka orientim marksist-leninist, ndërsa LDK pas vdekjes së ish-presidentit të ndjerë, Ibrahim Rugova, është sjell me politikën titiste të diferencimit politik.
“LDD-ja gjatë fushatës së fundit zgjedhore është sjell konform rregullave demokratike dhe ja ka zgjatë dorën e bashkëpunimit LDK-së, e cila në vend se të jetë mirënjohëse, ajo sillet më një agresivitet diversiv kundër LDD-së”, tha Geci, sipas të cilit, kjo sjellje e LDK-së është e stilit titist.
Anëtari i Kryesisë së LDD-së e ka akuzuar edhe kryetarin e Komunës së Prishtinës, Isa Mustafa si politikanë pa vizion. “Thënia që kjo qeveri i ka ditët e numëruara i ka sjell rezultat Isa Mustafës. Se sa vlen kjo kur LDK së bashku me PDK-në në nivel qendror njëra plaçkitin këtë popull ndërsa tjetra e vjedh këtë popull duke e mbrojtur njëra tjetrën”, ka thënë Geci.
Madje, sipas tij, Fatmir Sejdiu do të bëhet nënkryetar i PDK-së, ndërsa kryetar i LDK-së do të bëhet Isa Mustafa dhe dhjetë deputet të LDK-së, siç tha ai, do të kalojnë në PDK. /zeri/