Letër E Hapur Zotri Hashim Thaçit

[Shpat]

I nderuar zotri Hashim,

Jam një qytetar i thjesht, i cili, përveç votës time dhe të anëtarëve të familjes sime, asgjë tjetër më shumë nuk mund të bëj në favorin tuaj dhe të partisë që ju momentalisht e udhëhiqni. Kështu kam vepruar në të gjitha zgjedhjet e gjertanishme, dhe, padyshim se, kështu mendoja të veproja edhe në të ardhmen. Por, sikur, kohën e fundit, disa veprime, të them ashtu , të pamatura që i keni bërë dhe që vazhdoni t’i bëni, mua, dhe ndoshta edhe shumë votues dhe simpatizant tuaj të tjerë, do të na shtyjnë që, do e mos, të mendojmë seriozisht për rivlerësimin e këtij qëndrimi.

Befasia ime e parë ishte kur ju me tërë pasion dhe kapacitetin politik u inkuadruat në “Grupin e Unitetit”. Me kohë, ky dyshim, u zbut me arsyen se vërtetë jeni një politikan i urtë dhe se dini çka bëni. Të vendoset për të ardhmen historike të Kosovës, dhe në të, të mos jetë një lider si ju, vërtetë nuk mbisundohej me asnjë arsye tjetër të çfarëdo dyshimi eventual. Ne e dinim se kush ishin ata të tjerë në këtë grup, të ashtuquajtur uniteti, prandaj, prezenca e juaj aty, na ishte garancia, se vërtetë asgjë nuk mund të devijohet nga kërkesat dhe synimet historike të popullit të Kosovës.
Por, sikur, me kohë, murrën fillet e zhgënjimit tonë. Kur disa të rijnë. “axhami” manipulonin me do harta që ju veç i kishit pranuar, ne as që deshëm të merrnim pjesë në tubimet e tyre “paralajmëruese” për një rrezik që po na kanoset. Nuk deshëm, sepse e kishim aty Hashimin të cilit, ashtu sikur na premtonte, thellësisht i besonim se, “pavarësia e Kosovës do të jetë e panegociushme” , “asnjë milimetër nuk do të lëvizet nga ky parim”...etj.
Gjersa ju Hashim, na ftonit: “më besoni...”, “ më besoni...”, “më besoni... “, këta të rinjtë “axhami” të Vetëvendosjes, na mësonin : “mos besoni!”, “mos besoni, por...binduni!”
Dhe...unë fillova të mos besoj. Vërejta se besimi ishte vetëm karakteristikë e mosdijes, ndërsa mosbesimi i urtësisë, apo kërkimit vetjak të së vërtetës Dhe për tu bindur fillova me të madhe të merrem me argumentet e këtyre të rinjve “axhami”, apo, thjeshtë, të jem ai që jem në profesion, jurist. Së pari fillova të kërkoj, mos vallë do ta gjej ndonjë shtet ekzistues në botë sikur Kosova.
Nuk e gjeta askund, z. Hashim. Nuk e gjeta sepse nuk ka! Shtet me tri sovranitete nuk ka kurrkund. (sovraniteti i BE-së , sovraniteti i Serbisë mbi komuna të pastra etnike serbe dhe sovraniteti i kosovarëve) . Shpesh ju politikan, në këto raste, dini t’na thoni: “Po në Evropën e ardhshme të bashkuar nuk do të ketë shtete me sovranitet të plotë?! Edhe kjo është e vërtetë, ama, ato shtete si tërësisht sovrane, me vullnetin e plotë të tyre të lirë, e kanë shkrirë një pjesë të sovranitetit të tyre në këtë bashkësi. Me atë vullnet të lirë, që del pikërisht nga vetë sovraniteti i plotë që ata kanë si shtete vërtetë të pavarura.