Projektin “Ramosaj”, e pengon vetëm LDK-ja

[Dardania_KS]

Intervista e Deputetit Gani Geci,për "Epokën e Re",
Projektin "Ramosaj", e pengon vetëm LDK-ja
- Kjo është diçka e pamundshme të bëhet sepse në LDK nuk ka zot shtëpie. Aty sovran është Hashim Thaçi.

Intervistoi:Jetlir Zyberaj
Prishtinë, 24 korrik –

EPOKA E RE: zoti Geci, sa keni njohuri për projektin e bashkimit të nënkryetarit të LDD-së Ramosaj?
Geci: Po, për atë është i njoftuar gjithë opinioni, jo vetëm unë.
EPOKA E RE: Dhe çka mendoni për atë projekt?
Geci: Kur flasim për një projekt të afrimit të LDD-së dhe LDK-së, duhet të bazohemi në LDK-në. E them këtë sepse Lidhja Demokratike e Kosovës nuk ka zot shtëpie. Ajo e ka një kryetar i cili e ka postin e ngrirë dhe ky post i ngrirë shkrihet vetëm atëherë kur dëshiron kryeministri. Këtë po e them duke u bazuar në fakte. Kur ka dashur kryeministri i Kosovës, presidenti e ka shkrirë postin dhe e ka shkarkuar zotin Blerim Kuqi nga posti i kryeshefit të LDK-së dhe pastaj prap e ka ngrirë postin.
EPOKA E RE: Dhe për këtë arsye po e shihni si të pa implementueshëm këtë projekt?
Geci: Kjo është diçka e pamundshme të bëhet sepse në LDK nuk ka zot shtëpie. Aty sovran është Hashim Thaqi.
EPOKA E RE: Ju personalisht a e përkrahni apo jo projektin e zotit Ramosaj?
Geci: Unë personalisht mendoj se sikur atje në LDK të kishte ndjekës të rrugës së presidentit Rugova, sikur të kishte implementues të vizionit të presidentit Rugova, do të ishte e mundshme të arrihej një koalicion në formatin CDU-CSU, sikur në Gjermani. Ky format i koalicion do të ishte i mundshëm në Kosovë sepse tani LDK-ja në njëfarë forme e sundon Podujevën, kurse LDD-ja është e fuqishme në anamoravë. Në Gjermani është ashtu, CDU-ja në Bajern, kurse CSU në pjesën tjetër.
EPOKA E RE: Ju po e shihni LDK-në fajtore?
Geci: LDK-ja është fajtor në total. LDD-ja s`ka me kë të bisedojë. Ju e dini që zoti Thaçi e ka bërë një marrëveshje me LDK-në dhe ajo marrëveshje nuk i lejon LDK-së koalicione parazgjedhore me asnjë parti politike. Zoti Haziri ka të drejtë kur thotë se nuk do të bëjmë koalicion me asnjë parti, sepse e ka të shkruar në marrëveshje.
Unë e thash edhe më herët dhe po e them edhe tash.
EPOKA E RE: A është i mundshëm implementimi i këtij projekti?
Geci: Sikur gjatë kësaj periudhe, sa ka funksionuar shteti i Kosovës pas vdekjes së presidentit Rugova, të ishte implementuar edhe një element sado i vogël i vizionit të tij, do të ishte e mundshme, por në vija të trasha. Elektorati i LDK-së është elektorat i presidentit Rugova, kurse udhëheqësia e LDK-së, elita udhëheqëse e saj është në shërbim të PDK-së së Hashim Thaqit. Ata janë rreshtuar në anën e majtë. Pjesa dërrmuese e udhëheqësisë së tanishme të LDK-së janë ish komunista. Është e vështirë që me pesë nënkryetar të bëhet marrëveshje atje. Ndërsa Lidhja Demokratike e Dardanisë ka zot shtëpie...
EPOKA E RE: I cili e ka kundërshtuar projektin "Ramosaj"
Geci: I cili ka thënë dhe vazhdimisht e përsërit se mund të ketë marrëveshje me udhëheqësi legjitime por aktualisht në LDK, udhëheqësi legjitime nuk ka. Një shtet i cili nuk mund ta sundojë vetveten, e pushton një shtet tjetër. Ashtu ndodh edhe me atë parti që s`mund ta sundojë veten. LDK-në po e sundon PDK-ja, sepse s`po mundet ta mbajë veten.
EPOKA E RE: A ke biseduar ti konkretisht me zotin Ramosaj?
Geci: Unë këtë që po ju them juve, ia kam thënë edhe zotit Ramosaj. I kam thënë atij se një koalicion në formatin CDU-CSU do të ishte i mundshëm nëse pajtohet lideri ynë, i cili besoj se do të pajtohet dhe sikur të kishim me kë të bisedonim në anën tjetër. Normalisht që për këtë do të krijoheshin grupet punuese.
EPOKA E RE: Zoti Ramosaj ka deklaruar se kundërshtimet në LDD për këtë projekt bëhen vetëm për shkak të inateve personale me udhëheqësinë e LDK-së, për ato që kanë ndodhur në të shkuarën.
Geci: Ne mund ti marrin si inate personale edhe si inate vizuale. LDK-së kur i nevojitet emri i presidentit Rugova, lansojnë një propagandë se aeroporti i Prishtinës do ta ketë emrin Ibrahim Rugova. Pastaj dalin te autostrada Prishtinë-Merdare dhe e lansojnë propagandën tjetër. Pastaj propagandojnë për mauzolenë për presidentin Rugova. Merreni me mend se çfarë politike po bëjnë. Në anën tjetër secili individ që ka tentuar ta ruajë frymën dhe vizionin e presidentit Rugova është përjashtuar nga LDK-ja.
EPOKA E RE: Për dallim prej deklaratave të zyrtarëve të LDD, zotit Daci dhe zotit Zeneli, të cilët projektin "Ramosaj" e cilësojnë si tendencë të partive në pushtet për ta dëmtuar LDD-në, ju nuk po shprehni kundërshti të hapur. Po e gjuani topin te LDK-ja?
Geci: Edhe kjo e imja në njëfarë forme është e afërt me përgjigjen zyrtare por është ndërrim konceptesh. Pse është ndërrim konceptesh? I gjithë elektorati i presidentit Rugova e di këtë, që Lidhjen Demokratike të Kosovës nuk e udhëheq më udhëheqësia nga brenda. Ata po e shohin në Kuvendin e Kosovës që kryeministri kur dëshiron e heq nga rendi i ditës një pikë dhe e sjell një pikë tjetër që i përshtatet dhe LDK-ja nuk ka ndonjë fuqi që ta kundërshtojë atë. Vetë kryetari i LDK-së e ka postin e ngrirë dhe atë post e shkrin atëherë kur dëshiron kryeministri. Ju e dini çfarë zhurme bëhej kur presidenti Rugova mbante postin e kryetarit të LDK-së. A ju kujtohet çka bënte PDK-ja. Kurse tani asnjëherë nuk e ngrit zërin, edhe pse kushtetuta nuk e lejon ushtrimin e posteve të dyfishta.

EPOKA E RE: Pse po e përmendni shumë PDK-në dhe Thaqin. A shumë po ju pengon?
Geci: Mua nuk po më pengon PDK-ja. Unë i përgëzoj ata për fuqinë që po e kanë që gjithë mundin e elektoratit të LDK-së ta kanalizojnë kah vetja.
EPOKA E RE: A keni menduar ndonjëherë për një bashkim me LDK-në?
Geci: Unë jam ithtar i një koalicioni në formatin CDU-CSU. Një bashkim jo, por një koalicion i përhershëm i cili do të ishte edhe i qëndrueshëm për shkak se ju e dini që ka filluar edhe të ndahet elektorati. Anamorava është në LDD, Llapi është LDK.
EPOKA E RE: Ju thatë që jeni ithar i një koalicioni të qëndrueshëm me LDK-në..
Geci: Po një koalicion CDU-CSU. Bashkim jo, por një koalicion.
EPOKA E RE: Por edhe zoti Ramosaj e parasheh krijimin e koalicionit?
Geci: Jo, zoti Ramosaj e parasheh më ndryshe. Ai parasheh shkrirje, shkrirje, ngrirje.
EPOKA E RE: Në cilën prej pikave të projektit të profesor Ramosajt nuk pajtoheni?
Geci: Me projektin e zotit Ramosaj unë nuk pajtohem me asnjërën prej pikave, në formën e realizimit të tyre. Sepse forma e realizimit të tyre është asisoji që nuk ka me kë të bisedohet. Ne kemi lider, ata s`kanë lider. Ata e kanë të ngrirë. Nëse lideri i LDK-së do ta sheh të arsyeshme të takohet me liderin e LDD-së, kjo do të bëhej shumë shpejt.
EPOKA E RE: Keni bërë ju ftesë ndonjëherë për të zhvilluar një takim?
Geci: Ftesë nuk ju kemi bërë sepse ne nuk jemi në pozicionin e atillë për t`iu bërë ftesë.
EPOKA E RE: Nëse iu bëjnë juve ftesë LDK-ja, do ti përgjigjeni pozitivisht?
Geci: Po si jo.
EPOKA E RE: Pra nuk do të ju pengonte asgjë. As ngjarjet e kuvendit të gjashtë?
Geci: Pse, a po e pengojnë LDK-në mosmarrëveshjet që i ka pasur me PDK-në. Në Kosovë tash është relaksuar situata. Ju e dini që për gazetën tuaj, skam folur asnjëherë, por tash po flas dhe kjo është hera e parë. Atëherë pozicionet kanë qenë të tilla. Relacionet PDK-LDK kanë qenë shumë të acaruara. Tash është normalizuar gjithçka. Çka ka të keqe këtu.

EPOKA E RE: Zoti Geci po supozojmë që këtë projektin e Ramosajt e përkrah familja e presidentit Rugova. Cili do të ishte reagimi juaj personal dhe i anëtarëve të tjerë, në këtë rast?
Geci: Po supozojmë që familja e presidentit të Kosovës do të përkrah ndonjë projekt, apo edhe këtë të Ramosajt. Ne jemi parti politike dhe do të mendojmë si parti politike. Do të mendojmë për implementimin e çdo nisme pozitive të vizionit të presidentit Rugova. Por është e pamundshme për tu implementuar kjo në praktikë për shkak se siç e thashë edhe më parë, LDK-në nuk e sundojnë njerëzit e vet, nuk e sundon elektorati i vet, e as familja e presidentit Rugova. Familja e presidentit ju nevojitet vetëm në disa raste.