Vriten 4 shqiptarë në Radushë të Shkupit

[Hajdede]

Vriten 4 shqiptarë në Radushë të Shkupit


Shkup, 12 maj (E plotësuar)- Katër të vdekur dhe disa të plagosur është bilanci i incidentit të armatosur që gjatë natës ka ndodhur në afërsi të fshatit Radushë të Shkupit, mëson Alsat-M.
Tre nga viktimat janë identifikuar, ndërsa është duke u bërë identifikimi i viktimës së katërt. Bëhet fjalë për një person nga fshati Gërçec, një nga Prishtina dhe një nga fshati Merovë.

Incidenti ka ndodhur pasi grupi i armatosur ka qenë duke bartur armë në kufirin midis Maqedonisë dhe Kosovës dhe ka hapur zjarr ndaj policisë.

Vendi i ngjarjes është i bllokuar nga forcat policore, ndërsa mbi të fluturojnë helikopterë.

Banorët lokalë thonë se kanë dëgjuar të shtëna armësh nga mesnata deri në orën 3 të mëngjesit. Ministria e Brendshme e Maqedonisë paralajmëroi më shumë detaje gjatë ditës.

Ndërkaq, zëdhënësi i Policisë së Kosovës Baki Kelani, i tha Radios Evropa e Lirë se nuk kanë asnjë informacion se mund të ketë pasur incidente në pjesën kosovare të kufirit me Maqedoninë.

Kelani tha se policia nuk ka regjistruar incident me të shtëna armësh apo ndonjë incident tjetër, për të shtuar se nëse një gjë e tillë ka ndodhur në pjesën maqedonase të kufirit, atëherë Policia e Kosovës nuk mund të japë informacione, por ajo e Maqedonisë, bëjnë të ditur ndërkohë edhe “Lajm” i Shkupit dhe Telegraf i Prishtinës.
Në ndërkohë rreth rastit është deklaruar edhe Policia e Maqedonisë, e cila tha se katër vetë janë vrarë nga shkëmbim zjarri ndërmjet policisë dhe një grupi të armatosur në afërsi të kufirit me Kosovën.
Zëdhënësi i policisë, Ivo Kotevski, tha se katër personat janë vrarë në rrethinën e fshatit Radushë, kur policia i pengoi gjatë përpjekjes për të trafikuar armë përtej kufirit me Kosovën.
Kotevski tha se katër njerëzit ishin duke udhëtuar me një furgon, në të cilin është gjetur sasi e madhe armatimi dhe eksplozivi.
“Ne u zumë pusinë, njerëzit brenda makinës hapën zjarr dhe policia u përgjigj, duke vrarë katër prej tyre”, tha Kotevski duke shtuar se asnjë polic nuk është lënduar.
Kotevski ka sqaruar se dy nga të vrarët janë shqiptarë nga Maqedonia, përkatësisht nga fshatrat Gërçec dhe Merovë, një nga Prishtina, derisa origjina e personit të katërt nuk është ende e njohur.

Marrë nga: KohaDitore