Serbia pranon dokumentet e Kosovës?

[Dardani_K1]

Një pako marrëveshjesh në mes të Serbisë e Kosovës pritet të arrihet në mesin e muajit korrik, në takimin e gjashtë të delegacioneve të të dy vendeve.

E premte 17 Qershor 2011 16:09
Krahas marrëveshjes për lëvizje të lirë do të jenë edhe shtatë marrëveshje që do të nënshkruhen.
Burime të afërta me bisedimet kanë bërë të ditur se kjo pritet të ndodhë së shpejti me pranimin e ndërsjellë të dokumenteve në kuadër të diskutimeve për lëvizjen e lirë. Përveç letërnjoftimeve dhe pasaportave, Serbia pritet të pranojë edhe patentë shoferët e Kosovës dhe targat, njofton nga Beogradi korrespondenti i Kohës Ditore.
Të njëjtën gjë do ta bëjë edhe Kosova me dokumentet e Serbisë. Megjithatë, nuk ka mundur të saktësohet nëse do të pranohen edhe dokumentet serbe të Kosovës, dhe a do të vazhdojnë të jenë ato në qarkullim.
“Ne besojmë se do të gjendet një modalitet si ai i Maqedonisë dhe Greqisë, kur Greqia nuk njeh pasaportën e Maqedonisë, por megjithatë me të mund të udhëtohet, dhe vula vihet në një dokument përcjellës të bardhë”, ka thënë një burim ndërkombëtarë, i afër me bisedimet.
Një nga problemet që pritet të diskutohet në këto bisedime është edhe ai i doganave të Kosovës. Problemi, sipas burimit, është se Serbia do të propozojë sërish që dogana e Kosovës të mos ketë emërtim të tillë në dokumente, por vetëm Dogana e Kosovës, pra pa cilësimin Republikë dhe pa simbolet. Kjo është refuzuar më parë nga institucionet e Kosovës.