AMERIKA E SHPËTOI KOSOVËN MË 1999 E TANI PO NA NDIHMOJNË RRE

[LUMI_007]

AMERIKA E SHPËTOI KOSOVËN MË 1999 E TANI PO NA NDIHMOJNË RRETHANAT NDËRKOMBËTARE

Më 1999 Amerika me Anglinë, Gjermaninë e me aleatë të tjerë, e shpëtoi Kosovën e popullin shqiptar. Kurse sot Kosovën po e ndihmojnë rrethanat ndërkombëtare. Por, disa drejtues e zyrtarë të institucioneve dhe disa prijës të partive politike shqiptare, me epshe jo të shëndosha, me aktivitete në rrugë të gabuar dhe me mjerime të tjera, janë duke e dëmtuar Kosovën dhe duke e rrezikuar njohjen e pavarësisë së saj. Kështu, me ose pa qëllim, po ndihmohen forcat e antikosovare dhe po rrezikohet populli e çështja kombëtare shqiptare. Këto veprimtari janë duke i befasuar dhe mund t’i largojnë edhe miqtë tanë ndërkombëtarë nga dëshira e orvatjet për ta realizuar pavarësinë e Kosovës. Mjerisht, ata kosovarë që janë duke gabuar, me kokëfortësi e nën petkun e atdhetarizmit, po vazhdojnë rrugën që ofron vetëm dëme dhe rreziqe. Kurse, disa individë të biznesit dhe ndonjë politikan i mjerë, po përpiqen ta “ korruptojnë” edhe ndonjë ndërkombëtarë! Pastaj, pa dashur të kuptojnë realitetin, dëmet që mund t’i shkaktojnë dhe rrezikun që mund t’i ofrojnë Kosovës e popullit shqiptar, po i trashin buzët e po i rrudhin vetullat kur po i takojnë njerëzit që me qëllime fisnike dhe kombëtare po njoftojnë për aktivitete në rrugë të gabuar. Edhe bllokimi dhe mospublikimi i këtyre shkrimeve analitike e të dobishme nuk e ndihmon Kosovën dhe çështjen kombëtare shqiptare.

Aktualisht, Kosova është nën protektorat ndërkombëtar. Mbasi ende nuk është shtet sovran dhe i pavarur, gabohet në qoftë se Kosovën e imagjinojmë si mbretëri. Gjithashtu, është gabim i madh në qoftë se para kohe krijojmë bindje që Kosovën nuk mund ta rrezikojn më agresorët. Mirëpo, duhet kuptuar se disa zyrtarë ndërkombëtarë, pak a shumë pro-Beogradit, në detyra me përgjegjësi kanë përkrahur e avansuar individë “liberalë”. Pastaj, fakte të shumta tregojnë që zyrtarët ndërkombëtarë, duke shkelur normat ndërkombëtare dhe ligjet e vendit, në Kosovë kanë përkrahur e avansuar edhe persona që nuk posedojnë aftësi të duhura politike. Përkrahjen dhe mbajtjen e personave të tillë në pushtet, në Kosovë po e bëjnë ndërkombëtarët edhe për të mos lejuar ndonjë person të dyshuar për veprimtari të dyshimta që të marrin ndonjë detyrë me përgjegjësi, pa e dëshmuar fajësinë ose pafajësinë e tyre. Mjerisht, për të mbetur në funksion, po ndodh që ndonjë zyrtar po i servon popullit fjalë me peshë shumë të mëdha! Në qoftë se këto deklarime nuk përputhen me të vërtetën, mund të jenë përpjekje për ta mashtruar përsëri popullin e Kosovës, ose të jenë problem medicinal në sferën e të menduarit. Me siguri, njohja e pavarësisë është kapitale dhe faktor kryesor për stabilitet e jetë në liri dhe ka për të ofruar rezultate pozitive në Kosovë e në regjion. (Luten lexuesit e nderuar ta kuptojnë mirë dhe të mos e keqpërdorin këtë mendim të shënuar, me qëllim që ta ndihmojnë Kosovën në këto rrethana).

Në këtë shkrim detyrohem t’i njoftoj zyrtarët ndërkombëtarë në Kosovë, në Washington, në New York, në Bruksel e në Hagë që forca të rrezikshme tani janë duke ndërmarrë aksione të shumta kundër Kosovës për të shkaktuar trazira dhe konfrontime ndërmjet nacionaliteteve në Kosovë. Gjthashtu, për qëllime të rrezikshme, këto forca gjenden në aksione për t’i konfrontuar bartësit shqiptarë të funksioneve të Kosovës dhe liderët e partive politike. Nuk po kursehet asgjë për të gjetur, nxitur e bindur njerëz që të japin deklarata të rrejshme kundër këtij ose atij funksionari aktual, këtij apo atij prijësi të partive politike. Mendoj që lidhur me këto rreziqe, drejtuesit e bashkësisë ndërkombëtare kurrsesi nuk duhet t’u bëjnë lëshime forcave agresive.

Dr.R.Xhema
Prishtinë, më 28 dhjetor 2004