PS, projekt për “qeveri hije”

[MemphiSx]

TIRANË – Socialistët kanë filluar të përpunojnë idetë për ndryshimin dhe përmirësimin e organizimit të strukturave të partisë, pas humbjes në zgjedhjet e 3 korrikut. Njëri nga deputetët më të rinj socialistë dhe njëkohësisht shefi i protokollit të kryeministrit aktual, Fatos Nano, Taulant Balla, ka marrë përsipër të paraqesë në mbledhjen më të afërt të Komitetit të Përgjithshëm Drejtues një projekt të cilësuar si “qeveria hije” e PS-së, strukturë e cila do të jetë e përbërë prej 14 departamentesh dhe secili prej tyre do të jetë përgjegjës për një ministri të kabinetit “Berisha”. Socialistët kanë vendosur kështu të mos i lënë “të marrin frymë” pushtetarët e rinj, duke i survejuar ata në çdo moment, nëpërmjet strukturave të tyre partiake. Balla e cilëson këtë strukturë të re, të cilën ai është duke e projektuar dhe që pritet ta propozojë në forume, “më shumë sesa një strukturë, një veprim politik opozitar konstruktiv”. Në këtë projekt të më të riut të socialistëve, thuhet se, “për çdo ministri në Grupin Parlamentar të PS-së do të ketë tre deputetë që të monitorojnë në mënyrë të vazhdueshme ecurinë e realizimit të matricave qeverisëse dikasteriale, duke shfrytëzuar të gjitha hapësirat dhe procedurat parlamentare të kontrollit të legjislativit mbi pushtetin ekzekutiv”. Kjo do të thotë se jeta opozitare parlamentare e socialistëve do të jetë me sa duket, më e ashpër në formën e interpelancave se sa në atë të ngritjes së komisioneve parlamentare, praktikë e cila u ndoq nga opozitarët e vjetër, demokratët. Në projekt thuhet gjithashtu se, “komisionet e specializuara pranë KPD-së do të shndërrohen në departamente të monitorimit, të përgatitjes së qëndrimeve politike dhe të hartimit të politikave alternative ndaj atyre që parashtron qeveria”. Departamentet, sipas këtij projekti, realizojnë tryeza ta hapura konsultimesh, duke synuar partneritetin me shoqatat profesionale të fushës dhe grupet specifike të interesit. Ndërkaq, po sipas projektit që do të diskutohet në mbledhjen e KPD-së së ardhshme të PS-së, kryesia ekzistuese e PS-së mund të zëvendësohet me tryezën e punës së kryetarit të PSSH-së me shefat e departamenteve. Në një kohë të afërt mund të vlerësohet shkrirja e sekretariatit në kuadër të funksionimit të departamenteve, propozon Balla. Shefi i protokollit të kryeministrit ende nuk e ka përfunduar projektin, pasi pritet që ai të saktësohet edhe pas konturimit të qeverisë së re të demokratëve, pasi edhe ndarja në departamente e PS-së do të bëhet në bazë të ndarjes së funksioneve të dikastereve të Këshillit të ri të Ministrave. Riorganizimi i PS-së pritet të fillojë pas analizës që forumet kanë deklaruar se do të bëjnë menjëherë pas mbledhjes së Parlamentit të ri. Tashmë drejtuesit socialistë pritet që të hedhin ide të reja për riorganizimin e partisë, e cila përveçse pësoi para një viti ndarjen e një pjese të saj, pikërisht sivjet u rrëzua edhe nga pushteti, të cilin e mbajti për 8 vjet me radhë.
Kjo dmth se ideja per Qeverin nen hije te PDK-se paska qen e Fatos Nanos ;)