Rezolutë e re e KS – shlyhet sovraniteti i RSFJ-së, Kuvendi i Kosovës shpall pavarësi

[Dilaver]

Rezolutë e re e KS – shlyhet sovraniteti i RSFJ-së, Kuvendi i Kosovës shpall pavarësinë, pason njohja e saj.

Mediat e Beogradit thonë se është duke u përgatitur Rezoluta e re e Këshillit të Sigurimit me të cilën "shlyhet" sovraniteti i RFJ'së. Po ashtu, pohohet se Kuvendi do të shpallë pavarësinë e Kosovës.

E përjavshmja e Beogradit Nedeljni Telegraf, në numrin e saj të fundit, në një artikull kushtuar
Kosovës, ka shkruar se lobi shqiptar në SHBA tashmë është duke paralajmëruar një përfundim më të shpejtë rreth statusit të Kosovës, ndonëse ishte paraparë që negociatat të zgjasin më së paku deri në fillim të nëntorit.
Gazeta ka theksuar se përderisa Martti Ahtisari në Mitrovicën Veriore ka falënderuar palën serbe për bashkëpunim, Kryeministri Agim Çeku ka paralajmëruar se Kosova së shpejti do ta fitojë pavarësinë.
NT ka shkruar se porosia e Agim Çekut ka qenë e qartë për opinionin ndërkombëtar: deputetët e Kuvendit të Kosovës, në seancën e radhës, do ta shpallin pavarësinë.
E përjavshmja beogradase potencon se për një hap të tillë shqiptarët e Kosovës tashmë kanë siguruar një përkrahje të fuqishme diplomatike.
Po ashtu thuhet se në seancën e radhës në Kombet e Bashkuara, vendeve që janë në anëtare të përhershme të Këshillit të Sigurimit, do t'u prezantohet një Rezolutë e re për Kosovën, e cila nuk do të dallojë shumë në aspektin formal nga Rezoluta ekzistuese 1244, por në esencë dhe në aspektin juridik ajo do të mundësojë pavarësinë e Kosovës.
Nedeljni Telegraf, e cila përmend burime të saj, ka pohuar se sipas draftit të kësaj rezolute të re, nga aneksi i parë do të hiqet formulimi për sovranitetin e RFJ, me arsyetimin se ajo më nuk ekziston në një formë të tillë.
Për një lëvizje të tillë të përgatitur, janë pritur rezultatet e referendumit në Mal të Zi dhe njohja
zyrtare e pavarësisë.
Burime të kësaj gazete kanë theksuar se skenari i mëtutjeshëm do të rrjedhë ashtu siç ka paralajmëruar edhe Kryeministri i Kosovës, Agim Çeku.
Në Kuvendin e Kosovës shpallet pavarësia e Kosovës dhe ndaras pason njohja e saj e shpejtë si shtet i pavarur.
Gazeta më pas shkruan se pavarësinë e Kosovës së pari do ta njohin disa ish republika të ish RSFJ, por edhe vende të Azisë Juglindore, e më pas debate do të zhvendoset përsëri në Kombet e Bashkuara, ndërsa nga vetoja e Rusisë dhe Kinës varet se a do të pavarësohet Kosova gjatë verës.
Më 1999, kur ishte miratuar Rezoluta 1244, Kina kishte abstenuar përderisa Rusia, diplomatët e së cilës kishin marrë aktivisht pjesë në arritjen e Marrëveshjes së Kumanovës, ka pranuar të gjitha pikat e saj.
NT ka cituar edhe një intervistë që Ambasadori Rus në Beograd i kishte dhënë kësaj të përjavshmeje, ku ka theksuar se Rusia nuk do të lejojë fragmentimin e mëtutjeshëm të Ballkanit dhe se në këtë fazë të negociatave Rusia nuk është duke menduar për veton eventuale në KS të OKB.


Express