Gjakova me objekt të ri të Bibliotekës Rajonale ...

[Jana]

Në kremtën e saj në dhjetëvjetorin e çlirimit, Gjakova është bërë me objekt të ri të Bibliotekës Rajonale të emërtuar me emrin e personalitetit historik, letrar dhe kombëtar, dr.Ibrahim Rugova. Presidenti i Kosovës,dr.Fatmir Sejdiu,në inaugurimin e bibliotekës më të re në Kosovë ka thënë se “tashmë Kosova ka hy në epokë të re të zhvillimeve të saja dhe që mban emrin e krijuesit dhe presidentit të Kosovës, dr.Ibrahim Rugova, i cili bashkë me Adem Jasharin ishin në simbiozën më të fuqishme të rezistencës”.Presidenti Sejdiu ka shtuar se “sot nuk e kemi të lehtë pasi duam dhe duhet të integrohemi në BE dhe NATO si dhe sipas amanetit të jemi në miqësi të përhershme me SHBA-të, e për këtë integrim duhet shumë mund.Këto biblioteka shërbejnë për të krijuar intelektual në Gjakovë dhe Kosovë”.Para se të dhuronte bibliotekës kompletin e veprave të dr.Ibrahim Rugovës, presidenti Sejdiu ka dhënë mesazhi që biblioteka të funksionojë maksimalisht.Pal Lekaj, kryetar komune inaugurimin e bibliotekës e ka ndërlidhur në kuadër të shënimit të decenies së parë në liri të cilën Gjakova e kremton të dielën.”Kremtën po e nisim me përurimin e këtij tempulli të dijes që forcon qëllimin e madh për organizimin më ndryshe të shoqërisë sonë” ka thënë Lekaj që më pas ka folur për investimet që po bëhen në komunë, me theks të posaçëm për bibliotekën rajonale “Ibrahim Rugova”duke thënë se “këtij qyteti, i cili po ndryshon për çdo ditë në strukturë dhe infrastrukturë, sa bukur do ti rrijë edhe ky objekt edukimi pasi, ky qytet, duke pasur bibliotekën,do ta ruajë kujtesën kombëtare sepse ta zësh modernitetin e kohës si aktualitet është proces i zhvillimit”.Engjëll I.Berisha, drejtor i bibliotekës rajonale “Ibrahim Rugova”, ka bërë të ditur se biblioteka ka 1.600 metra katrorë, me kapacitet prej 360 ulëseve për lexues brenda ditës dhe për më shumë se 600 shërbimevë të ofruara dhe disponon me një fond library prej 28.000 ekzemplarëve.”Biblioteka ka tri etazha, me një zgjidhje arkitektonike duke paraqitur autoktoninë e vendit me gurë që rriten në Erenikun tonë të lashtë dhe me pamje druri që paraqtet ngrohtësi për sy dhe ngjyrën e librit.Poashtu ka një zgjidhje profesionale sipas standardeve të larta të vendeve në zhvillim” ka thënë drejtori Berisha i cili ka përfunduar se meritorë për përfundimin e punimeve është kryetari i komunës, Pal Lekaj,si dhe Drejtoria për Arsim dhe Kulturë si dhe ka falënderuar donatorë të shumtë me libra dhe ndihma tjera që i kanë ofruar shtëpisë së librit.Ministri Valton Beqiri ka lexuar vendimin e Ministrisë së Kulturës për emërtimin e bibliotekës “Ibrahim Rugova” që bazohet në kushtetutën e Kosoëvs ndërsa Sali Bashota, drejtor i Bibliotekës Kombëtare të Kosovës ka treguar për funksionalitetin e bibliotekës kombëtare dhe të bibliotekave të Kosovës me të gjitha kapacitetet që kanë.