Deputetët gjermanë akuzojnë Qeverinë e Kosovës për krim dhe korrupsion

[GjIlAnAsI_cSi]

Parlamenti i Republikës Federale të Gjermanisë ka vazhduar edhe për 12 muaj mandatin e trupave gjermane të KFOR-it në Kosovë. Gjatë debatit parlamentarët gjermanë kanë kritikuar me tone të ashpra korrupsionin dhe për këtë e kanë bërë përgjegjëse Qeverinë e kryeministrit Hashim Thaçi. Deputeti kristiandemokrat Florian Hahn deklaroi se si politikan nuk është i gatshëm që të vë në dispozion para të qytetarëve gjermanë, me të cilat politikanët e Kosovës blejnë vila

Koha Ditore, nga Enver ROBELLI

Pas një debati intensiv parlamenti i Gjermanisë ka miratuar të enjtën vazhdimin e mandatit të KFOR-it gjerman në Kosovë edhe për një vit. Për vazhdimin e angazhimit ushtarak në Kosovë kanë votuar partitë në pushtet (kristiandemokratët dhe liberalët), por edhe opozita socialdemokrate dhe shumica e deputetëve të Partisë së Gjelbër. Kundër mandatit ka votuar partia majtiste DIE LINKE. Njëkohësisht Bundestagu në Berlin ka kërkuar reduktimin e trupave gjermane në Kosovë. Aktualisht në Republikën e Kosovës janë të stacionuar 1500 ushtarë gjermanë. Pritet që deri në fund të vitit ky numër të reduktohet në 800 pjesëtarë. Përveç garantimit të sigurisë ushtarët gjermanë janë të angazhuar edhe në trajnimin e Forcës së Sigurisë së Kosovës (FSK).

Në fjalimet e tyre në Bundestag shumica e parlamentarëve gjermanë kanë mbëshetur vazhdimin e mandatit të KFOR-it, por, njëkohësisht, ata kanë kritikuar si asnjëherë më parë Qeverinë e Kosovës të kryesuar nga kryeministri Hashim Thaçi. Qeveria është fajësuar për involvim në korrupsion dhe krim të organizuar si dhe për mungesë gatishmërie për të luftuar keqpërdorimet.

Deputeti i Partisë Liberaldemokrate (FDP) Rainer Stinner tha se dikur, kur vinte në Prishtinë dhe takohej nga kryetarin e Kosovës Ibrahim Rugova, nga zyra e tij merrte një dhuratë dhe një porosi: një gur të çmuar si simbol të pasurive të Kosovës dhe premtimin e njëmijëfishtë se pavarësia do t’i zgjidhë të gjitha problemet. Sipas Stinner dy vjet pas pavarësisë pasuritë nëntokësore të Kosovës ende janë nën tokë dhe vendi ballafaqohet me papunësi, mungesë të administratës, me korrupsion, me kriminalitet dhe me një miks të pranisë ndërkombëtare. Stinner ka thënë se 10 vjet adminsitrim nga UNMIK-u nuk kanë qenë të sukseshme. Ai deklaroi para deputetëve se me „tronditje“ e ka lexuar raportin e fundit të Grupit Ndërkombëtar të Krizave (ICG), në të cilin thuhet se në Kosovë nuk funksionin shteti ligjor. Sipas tij investimet në Kosovë nuk po vijnë për shkak të kriminalitetit.

Edhe më i ashpër ka qenë deputeti i fraksionit kristiandemokrat (CDU/CSU) Florian Hahn. Pasi përkujtoi se Gjermania në vitin 1999 ka ndërhyrë në Kosovë kundër gjenocidit dhe përndjekjes së popullsisë dhe që nga atëherë në Kosovë ka pasur zhvillime të mira sa i përket sigurisë, Hahn tha se sot populli i Kosovës e ka humbur besimin në Qeverinë e tij. „Popullsia nuk beson se Qeveria do ta luftojë korrupsionin gjithëpërfshirës. Korrupsioni ka krijuar zemërim dhe zhgënjim në mesin e popullit. Humbja e besimit ndaj politikanëve pastaj reflektohet edhe në humbje të besimit ndaj përfaqësueve ndërkombëtarë. Kam përshtypjen se populli në Kosovë është i frusturar“, tha deputeti Hahn.

Ai apeloi te Qeveria e kancelares Angela Merkel që gjatë dhënies së mjeteve financiare për Kosovën të jetë e kujdesshme, në mënyrë që paratë të mos keqpërdoren. „Evitimi i korrupsionit duhet të jetë prioritet“, tha ai. Duke folur për njoftimet se disa ministra të Qeverisë së Kosovës janë pjesë e „qarqeve korruptive“ Hahn u shpreh i bindur se „peshkut i vjen era duhmë nga koka“. Me këto fjalë Hahn aludoi drejtpërdrejtë në shefin e Qeverisë së Kosovës Hashim Thaçi. Deputeti i CDU/CSU tha se kundër anëtarëve dhe këshilltarëve të Qeverisë së Kosovës po zhvillohen hetime për shpëlarje parash, krim të organizuar dhe keqpërdorim posti. „Nëse këto akuza dëshmohen, atëherë unë pres konsekuenca“, tha Hahn. Ai pastaj shtoi: „Unë nuk jam i gatshëm që paratë e qytetarëve tanë të investohen në vila private kosovare. Kërkoj nga Qeveria e Kosovës që të angazhohet brenda rrethit të saj. Ne duam ta ndërtojmë vendin, por jo korrupsionin në Kosovë“.

Marieluise Beck nga Partia e të Gjelbërve u shpreh e zhgënjyer me refuzimin e pesë vendeve të BE-së që të njohin Kosovën. Ajo tha se është absurde që – për shembull – Spanja të mendojë se një ditë do të ketë një Qeveri sikur ajo e Slobodan Milosheviqit, e cila do t’i përndiqte pakicat në Spanjë dhe pastaj ato do të shkëputeshin. Duke iu drejtuar vendeve të BE-së që nuk e njohin Kosovën ajo tha: „Besoni në aftësinë tuaj demokratike dhe pranone Kosovën në mënyrë që të marrë fund kaosi i pranisë ndërkombëtare“. Edhe zonja Beck nënvizoi se pas lehtësimit të madh të shqiptarëve pas shpalljes së pavarësisë tani popullsia në Kosovë është e frustruar. Beck kritikoi Qeverinë gjermane se nuk është angazhuar sa duhet në misionin e BE-së EULEX. Ajo ka dënuar edhe rolin destruktiv të Serbisë sidomos në veri të Kosovës. „Për Serbinë duhet të jetë e qartë se dyert e BE-së janë të hapura për Kosovën e pavarur dhe për Serbinë e lirë“, nënvizoi Beck.