Raportet: Kosovë BE

**Zero Cool** · 15-09-11, 08:32

Lajme që kanë të bëjnë me raportet mes BE dhe Kosovës

Hungaria e gatshme të ndihmojë Kosovën për në BE

8:47 / 15.09.2011

Presidentja e Republikës së Kosovës, Atifete Jahjaga gjatë vizitës shtetërore në Hungari, është takuar edhe me kryetarin e Parlamentit të Hungarisë, Laslo Kover. Ky i fundit shprehu gatishmërinë e vendit të tij për të ndihmuar Kosovën në marrjen e udhërrëfyesit për liberalizim të vizave dhe u angazhua për ndihmë Kosovës në proceset integruese.

Kryetari i Parlamentit hungarez vlerësoi marrëdhëniet e ngushta mes dy vendeve dhe në veçanti bashkëpunimin mes Parlamentit të Hungarisë dhe Kosovës, ndërkaq theksoi se vendi i tij është i gatshëm që ta ndihmojë Kosovën në fushën e legjislativit, posaçërisht në procesin e përgatitjes dhe miratimit të ligjeve në përputhje me standardet evropiane.

Kover tha se Hungaria gjatë rrugës së saj të integrimit në BE ka pasur një model tjetër, ndërkaq Kosova mund të marrë shembullin dhe përvojën e Hungarisë në rrugën e integrimit në BE.

Kryetari i Parlamentit të Hungarisë theksoi se marrëdhëniet fqinjësore janë të rëndësishme në rrugën e integrimeve dhe tha se Kosova dhe Serbia duhet të zgjidhin çështjet e hapura mes tyre gjë që do të ndihmonte në përafrimin e të dyja vendeve me BE-në.

Ndërkaq, presidentja e Republikës së Kosovës, Atifete Jahjaga, duke e falënderuar kryetarin e Parlamentit hungarez për mikpritjen, vlerësoi marrëdhëniet miqësore me Hungarinë dhe tha se bashkëpunimi ndërparlamentar është i rëndësishëm.

Jahjaga tha se Kosova në rrugën drejt integrimeve evropiane është e obliguar që të miratojë një varg ligjesh, të cilën gjë po e bën dhe e cila po monitorohet nga Komisioni Evropian, në raportin e progresit për Kosovën

Ajo tha se Kosova është shtet i ndërtuar në parimin qytetar dhe ka demokraci parlamentare.

Presidentja e vendit po ashtu duke folur rreth dialogut me Serbinë tha se dialogu është rruga më e mirë për zgjidhjen e çështjeve të hapura ndërmjet dy shteteve por tha se zgjidhjet duhet të jenë evropiane. Ajo theksoi se e ardhmja e Kosovës dhe e Serbisë është në BE, si dy shtete të pavarura dhe në këtë rrugë duhet ta ndihmojnë njëra-tjetrën.

**Zero Cool** · 15-09-11, 20:50

Kosova larg liberalizimit të vizave

Nga Express më 15 shtator 2011 në ora 21:38
Kosovës do t’i duhet edhe një kohë për t’i përmbushur kriteret e vëna nga Bashkimi Evropian për liberalizimin e vizave me vendet anëtare të këtij mekanizmi, thonë ekspertët për integrime evropiane.

Ata konsiderojnë se Kosova, ka mbetur prapa në përmbushjen e kritereve, siç janë siguria e dokumenteve të udhëtimit, çështjet e migracionit, ku përfshihet procesi i riatdhesimit dhe sundimi i ligjit.

Bardhyl Hasanpapaj, ligjërues për integrime evropiane në Universitetin e Prishtinës thotë se institucionet e Kosovës deri tash nuk kanë treguar argumentet të fuqishme për t’i venë në lëvizje mekanizmat e BE-së në drejtim të liberalizimit të vizave.

“Ne nuk kemi parë asnjë hap konkret si nga Bashkimi Evropian ashtu edhe nga Kosova, ndonjë marrëveshje, ndonjë takim, ku kemi pasur ndonjë qëndrim zyrtar si të institucioneve të Kosovës, ashtu edhe të BE-së për një kohë të saktë dhe një platformë të saktë se kur do të ndodhë liberalizimi i vizave. Pra kjo tregon që faji qëndron në anën tonë, meqë Bashkimi Evropian shumë qartë e ka thënë disa herë se Kosova duhet t’i plotësojë edhe disa kritere”, deklaron Hasanpapaj.

Por, analisti Shenoll Muharremi, mendon ndryshe.

Ai thotë Kosova ka ndërmarrë disa veprime të një anshme për përmbushjen e kritereve.

Sipas Muharremit, në Bashkimin Evropian, janë duke ndodhur disa vonesa të pa arsyeshme në ketë drejtim.

“Unë mendoj që Bashkimi Evropian është vonuar paarsyeshëm për shkak se në dialog do të përfitonin të gjitha palët. Andaj edhe nga ana e Brukselit ka pasur zvarritje të panevojshme për arsye se nuk po bëhet fjala për përfundim të procesit por për fillim të procesit. Nga fillimi i dialogimit për liberalizim të vizave do të përfitonin të gjitha palët për shkak që autoritetet kosovare që të përfitojnë nga këshillat e Komisionit Evropian dhe shteteve anëtare”, shprehet Muharremi.

Ndër çështjet kryesore që Kosova duhet t’i përmbushë për liberalizim vizash janë: menaxhimi i integruar i kufijve, pasaportat biometrike, riatdhesimi, zbatimi i strategjisë për migracion etj.

Çështja e liberalizimit të vizave për Kosovën duhet të shndërrohet në prioritet kryesor për institucionet e vendi, thotë eksperti Hasanpapaj.

“Unë do të kisha thënë që fajin kryesisht e ka Qeveria e Kosovës që ka disa mangësi në përmbushjen e këtyre kritereve teknike, që nuk është vetëm lëshimi i një pasaporte biometrike por, sidomos regjistri i këtyre të dhënave si dhe kontrolli i integruar i kufijve. Në kuadër të kësaj hynë edhe lufta kundër korrupsionit, krimit të organizuar. Pra pa u arritur këto nuk besoj që Bashkimi Evropian do të ofrojë një liberalizim të vizave edhe për një kohë”, thekson Hasanpapaj.

Qeveria e Kosovës me herët ka adaptuar një udhërrëfyes, duke u bazuar në udhërrëfyes që Komisioni Evropian u ka dhënë vendeve të rajonit, për përmbushjen e kritereve për liberalizimin e vizave.

Autoritetet e Kosovës kanë thënë se Kosova ka arritur të realizojë të gjitha kushtet dhe kërkesat të cilat dalin nga Komisioni Evropian.

Eksperti Muharremi i vlerëson pozitive veprimet e njëanshme të qeverisë në drejtim të përmbushjes se kushteve për liberalizim të vizave. (REL)

**Zero Cool** · 18-09-11, 18:21

Çitaku në Bruksel kërkon udhërrëfyesin

Nga Express më 18 shtator 2011 në ora 18:30
Ministrja e Integrimit Evropian, Vlora Çitaku do të realizoj një vizitë zyrtare në Bruksel, me ç’rast do të takohet me zyrtarë të lartë të Bashkimit Evropian për të diskutuar rreth agjendës evropiane.

Zyra për informim e Ministrisë së Integrimit Evropian bëri të ditur se Çitaku gjatë qëndrimit në Bruksel do të diskutoj edhe për Raportin e Progresit, mandej edhe për mundësinë e marrjes së udhërrëfyesit për liberalizmin e vizave për Kosovën.

Ministrja Vlora Çitaku pritet të takohet me komisionerin për Zgjerim dhe Politikë të Fqinjësisë, Stefan Fule, drejtorin e përgjithshëm për Zgjerim, Pierre Mirel, mandej ambasadorin Theodoros N. Sotiropoulos, i cilië shtë përfaqësues i përhershëm i Greqisë pranë Bashkimit Evropian dhe zyrtarë ë tjerë.

**Zero Cool** · 20-09-11, 10:34

Çitaku kërkon marrëdhënie kontraktuale me BE-në

Nga Express më 20 shtator 2011 në ora 10:09
Ministrja e integrimeve evropiane, Vlora Çitaku, ka përsëritur kërkesën e Prishtinës zyrtare për themelimin e marrëdhënieve kontraktuale me Bashkimin Evropian, njoftoi ministria për integrime.

Gjatë vizitës së saj në Bruksel, Çitaku thuhet të jetë takuar me Komisionarin për Zgjerim të BE-së, Shtefan Fule dhe Drejtorin për Ballkanin Perëndimor në Drejtorinë e Përgjithshme të Komisionit Evropian për Zgjerimin, Pier Mirel.

Temat qendrore të takimeve thuhet të kenë qenë çështja e liberalizimit të vizave për Kosovën, progresi dhe sfidat në kuadër të Raportit të Progresit për vitin 2011 dhe zgjatja e masave autonome tregtare për bizneset kosovare.

“Ne gjithashtu diskutuam nevojën për qasje më të mirë në tregjet evropiane për bizneset kosovare përmes zgjatjes së masave autonome tregtare. Unë po ashtu përsërita kërkesën tonë për marrëdhënie kontraktuale me BE-në datën më të hershme të mundshme", citohet të ketë thënë Çitaku pas takimeve me zyrtarët evropianë.

Ndërkohë, një mision i ekspertëve evropianë që po qëndronte, deri në javën e kaluar, në Kosovë për të parë për së afërmi zbatimin e procesit të riatdhesimit dhe ri-integrimit të personave të riatdhesuar-kritere kyçe për marrjen e udhërrëfyesit për liberalizim vizash, mësohet ta ketë përfunduar tashmë vizitën në vend. (REL)