Fatos Nano, 140 ditët pas dorëheqjes

Dilaver · 19-01-06, 16:48

Si e kalon kohën ish-kryeministri që nga 1 shtatori i vitit të kaluar

Jeta e re e Fatos Nanos, 140 ditët pas dorëheqjes

Roland QAFOKU

Ka ndërruar numrin e celularit. Edhe aparati mobil tani është një “Nokia” 2005. Duart s’i heq nga timoni dhe fuoristrada “Tuareg Wolkswagen” me targë TR 2442 K, është “lodra” dhe hobi i tij i ditës. Për opinionin ai ka humbur fare. Nuk e shikon kurrkund. Në parti jo e jo. Në Parlament ka shkuar vetëm një seancë. Në zonë as që bëhet fjalë. Kamerat dhe blicet e aparateve fotografikë s’kanë mundur të fiksojnë ndonjë “public” të tij. Ca thonë kinse është tërhequr, pra ikën e vjen. Një pjesë betohet se do e bëjë si me katarsisin. Ca të tjerë thonë se është zhdukur përgjithmonë nga politika. Po a mund të zhduket Fatos Nano? Besohet se më afër sinoptikës politike jemi atëherë kur mendojmë se një ditë ai do të shpërthejë. Do ia nisë me një tur në bazë, apo me uragan kritikash në televizione? Për këtë askush nuk mund të vërë bast. Por një gjë është e sigurt, që Fatos Nano, në 140 ditë që nga dorëheqja, jo vetëm ka pushuar, jo vetëm ka reflektuar, studiuar e medituar e jo vetëm ka bërë plane. Gazeta “Tirana Observer” disponon axhendën e plotë, të gjitha takimet dhe lëvizjet e tij në katër muaj që nga 1 shtatori 2005, kur nga poltroni i Kryeministrisë publikoi dorëheqjen. Por edhe për atë që do të realizojë në të ardhmen.

“Gëzuar Vitin e Ri” në San Francisko
E ku ka më mirë se ndërrimin e viteve ta kalosh në San Francisko. Nano ka pasur luksin që nën shoqërinë e bashkëshortes Xhoana dhe të birit të saj, Klajdi, të kalojë një natë të paharruar. Miqtë e tij të afërm tregojnë për “Tirana Observer” që në një nga restorantet e hotelit me pesë yje “Hyatt”, Nano dhe 18 miqtë e tij kanë kaluar orë të tëra të këtij gëzimi të veçantë. Një verë italiane për merak për ish-kryeministrin, ishte pija e asaj nate, ndërkohë që një meny po alla italiane ishte garnitura e një mbrëmjeje të veçantë. E shoqëruar me batuta në breshëri, Nano në një moment ka hequr edhe kravatën, si për të kujtuar se nuk është më kryeministër dhe se tani në kohë pushimesh i “falen” edhe veshje sportive. Momenti më kulmor, ndezja tipike amerikane e fishekzjarrëve. Nano, së bashku me miqtë, ka shëtitur më pas rrugët e San Franciskos, duke shijuar edhe bukuritë e këtij qyteti, që shquhet më shumë edhe për urat e tij të famshme.

Një ditë e ish-kryeministrit
Një ditë e ish-kryeministrit Nano nis dhe përfundon shumë thjesht. Shtëpia, dy apartamente në katet 11 dhe 12 të një pallati të ri te Shallvaret, gëlon nga punët. Një zgjim me nge në një orë pa merak dhe pa një pa dy nisja e leximit të gazetave. Miq të tij na tregojnë se Nano nuk e ka hequr dhe zor se mund të zhdukë ndonjëherë nga “veset” e tij leximin e të gjithë titujve. E nis me “Shekullin”, me “Korrierin”, me “Tirana Observer” e “Panoramën”, për të vijuar më pas me të gjitha. Mësojmë se lexon edhe detajet më të vogla, edhe ato që edhe një lexues rrace nuk do t’ia hidhte sytë. Por Nano duket se aty gjen atë pjesë të jetës profesionale, që nuk mund ta marrë në vend tjetër. Më tej hap internetin, e zhytet aty në një oqean informacioni. Del me makinën e tij “Touareg”, me të cilën duket sikur i bën karshillëk atij “Land Roveri” që fle në garazh, një makinë të dhënë nga Kryeministria si ish-kryeministër. Më tej pret miq, takon të njohur, pa harruar ata që ka më të dashur në Tiranë, të atin e të birin. I kushton një pjesë edhe shëndetit. Miqtë thonë se është shumë mirë, falë edhe ca fitnes në një ditë pushimi. Drekat dhe darkat në Durrës, më saktë në Golem dhe te Shkëmbi i Kavajës, janë një tjetër preferencë. Për ta mbyllur ditën pastaj me lexime librash pa fund.

Besnikët e Nanos
Dikush tani mund të thotë se janë të paktë. Në fakt, ata që rrinë shumë me të, janë jo më shumë se gishtat e njërës dorë. Por ama janë më besnikët. I pari është deputeti Taulant Balla, një djalë i ri, i arsimuar në Perëndim, që vrullin e moshës e shpreh shpesh, por që vlerëson shumë filozofinë e ish-kryetarit. Më pas është po një deputet tjetër. Edhe Shpëtim Idrizi duhet të ketë shumë besim te filozofia e Nanos, që përherë vlerëson dhe përkrah të rinjtë. Për miqtë e tjerë? Ca janë sezonalë, ca momentalë. Por më të shumtit janë ata që nuk shprehen. Ndoshta fjalën e tyre do ta thonë kur Nano të nisë jetën aktive.

Berisha, Rama, Majko, Meta?
Miqtë e tij përbetohen se nuk zë asnjë politikan në gojë. Pak e besueshme kjo, por ndoshta edhe një taktikë. Natyra e Nanos nuk mund të shkëputet kurrë nga personazhet kundërshtarë. Fundja, një pjesë të tyre i ka pasur miq të mirë. Por stuhitë në oqeanin e politikës i degdisën simpatitë e tyre në anë të ndryshme. Ca prej tyre në dy brigje të largëta dhe një Zot e di nëse mund të afrohen. Megjithatë, askush nuk mund të parashikojë një diçka të vërtetë. Ajo do të shihet atëherë kur Nano të nisë betejën publike.

“Rikthim në Iden”
Eshtë një film i vjetër me titullin “Rikthim në Iden”. Një vajzë që kthehet pikërisht atje ku mendonin se ishte zhdukur. Pas disa vjetësh ajo shfaqet sërish, me një sharm e me një vetësiguri dhe me një famë të re. Kur mbërrin në Iden dhe mësojnë për të vërtetën, habiten dhe tmerrohen të gjithë. Ndoshta është pak e ekzagjeruar analogjia me Nanon, por rregulli i tij i deritanishëm me humbjet dhe rikthimet i përngjasin filmit. Zërat pranë tij të paktën kështu e thonë. Ai një ditë do të rikthehet. Si do ta bëjë këtë? Të dhënat flasin se dalja e parë publike do të jetë pjesëmarrja në një seancë në Parlament. Kjo mendohet të jetë në fillim të shkurtit, si dita kur ai mund ta shpëtojë veten nga heqja e mandatit. Rregulli e do që një deputet nuk mund të mungojë më shumë se gjashtë muaj rresht në Parlament. Dhe kështu me një të dalë bën dy punë.

The Twin Towers office
Janë nja dy zyra për së mbari në katin e gjashtë të Twein Towers-it. I ka prenotuar ish-kryeministri Nano. Ca punëtorë që po djersijnë këto ditë tregon se dita kur ai do të vërë këmbët aty do jetë e shpejtë. Miqtë e tij tregojnë se tani e tutje Nano do të ketë një zyrë për të qenë aktiv në politikë. Aty do të punojë, do të presë e përcjellë njerëz. Pse jo, nuk është e tepërt të themi se që prej aty ai do të lëshojë ato silurat e tij. Kë do të zënë? Miqtë për këtë ngurojnë të flasin. Qeverinë apo kreun e PS-së? Këtë e di vetëm Nano. Të presim se ç’lloj armësh politike do të përdorë edhe njëherë për situatën, një nga personazhet më të spikatura të politikës postkomuniste.

Vizitat tek i ati
Thanas Nano është babai I Fatosit. Një plak I moçëm që në 23 mars mbush plot 90 vjeç. Duket se ish-kryeministri këto ditë po I shfrytëzon mirë që të rrijë ca me të atin. Të afërm thonë se ai është sëmurë dhe prania e Fatosit ia ka lehtësuar pak pleqërinë. Dhe plaku që edhe në momentet më të vështira e ka mbështetur të birin, I ka respektuar familjen e tij, kënaqet dhe me vizitat. Dhe Fatosi, shtëpinë e tij në katin e gjashtë në një pallat pranë parlamentit e ka vizituar shpesh këto ditë. Nuk ka harruar që në çdo vajtje me vehte të ketë edhe bashkëshoreten Xhoanën.

JETESHKRIMI

EMRI: Fatos
ATESIA: Thanas
MBIEMRI: Nano
DITELINDJA: 16.09.1952
VENDLINDJA: Tiranë
ARSIMI: Fakulteti i Ekonomisë, specializuar për Ekonomi Politike në Universitetin e Tiranës
GRADA SHKENCORE: Profesor, doktor
GJUHET E HUAJA: Anglisht, frëngjisht, italisht, rusisht,
serbokroatisht
GJENDJA FAMILJARE: I martuar me dy fëmijë
EKSPERIENCA PUNE:
1975-1978, Kombinati Metalurgjik Elbasan
1978-1981, studiues i ekonomisë botërore në Institutin e Studimeve Marksiste-Leniniste
1981-1984, ekonomist në Priskë të Tiranës
1984-1990, studiues i ekonomisë së Lindjes, pedagog në UT
PROBLEME ME DREJTESINE:
30 korrik 1993, pas heqjes së imunitetit arrestohet me akuzën e vjedhjes në favor të të tretëve. Dënohet me 12 vjet burg. Lirohet në 14 mars, pas amnistisë së presidentit Berisha. Bën 1560 ditë burg.
AKTIVITETI POLITIK:
1990, sekretar i përgjithshëm i KM
1991, zv/kryeministër
1991, kryeministër
1991, kryeministër për një mandat të dytë
1991, kryetar i Partisë Socialiste
1997, kryeministër
11 tetor 1999, kryetar i Partisë Socialiste
2002, kryeministër
Deputet në legjislaturat 1991-1992, 1992-1996, 1997-2001, 2005

4 DOREHEQJET E MEDHA

22 MARS 1992
Jep dorëjeqjen nga kryeministër pas fitores së Partisë Demokratike në zgjedhjet parlamentare.

28 SHTATOR 1998
Jep dorëheqjen si kryeministër pas trazirave të 12-13-14 shtatorit në Tiranë.

20 NENTOR 1999
Jep dorëheqjen nga kryetar i Partisë Socialiste me të njëjtën arsye si dy mauj më parë.

1 SHTATOR 2005
Jep dorëheqjen si kryeministër dhe si kryetar I Partisë Socialiste pas humbjes së zgjedhjeve

AXHENDA NANO NË 140 DITE

1 SHTATOR 2005
Kryeministri dhe kryetari i Partisë Socialsite Fatos Nano jep dorëheqjen nga të dyja funksionet. Në një konferencë për shtyp ai deklaroi se humbja në zgjedhjet e 3 korrikut pavarësisht se ato ishin të pa rregullta e detyruan të merrte këtë vendim.

3 SHTATOR 2005
Ish-kryeministri dhe deputeti i Sarandës Fatos Nano merr pjesë në seancën e parë të sesionit të parë të parlamentit. Gjatë seancës ai nuk ka bërë asnjë deklaratë, nuk e ka marrë asnjëherë fjalën, madje nuk ka shkëmbyer biseda me asnjë nga kolegët deputetë.

7 Tetor 2005
Një ditë pas zgjedhjeve për kryetar në kongresin e Partisë Socialiste, Fatos Nano jep një interviostë në televizionet Top Channel, Vizion Plus dhe News 24. Nano shprehet me ashpërsi ndaj ndërprerjes së mandateve të delegatëve në kongres.

12 TETOR 2005
Fatos Nano merr pjesë si tifoz i skuadrës kombëtare gjatë ndeshjes që u luajt në stadiumin “Qemal Stafa”, me Turqinë. Ra në sy ecja në këmbë e tij nga bulevardi deri në stadium i shoqëruar nga deputeti Shpëtim Idrizi dhe Andis Harasani.

Tetor 2005
Fatos Nano merr një tur vizitash në Itali. I shoqëruar nga disa deputetë dhe miq të tij, ai viziton disa shqiptarë që jetojnë atje. Një bisedë interesante telefonike ai ka bërë edhe me kryeministrin Berluskoni ku kanë shkëmbyer urime të ndërsjellta.

15 Nëntor 2005
Ish-kryeministri Fatos Nano ndërmerr një turn të rëndësishëm në Maqedoni. I shoqëruar nga disa miq të tij ai viziton Shkupin dhe Tetovën ku takon krerët e partive shqiptare Ali Ahmetin dhe Arbër Xhaferrin. Mësohet se tema e bisedimeve kanë qënë rajoni.

Nëntor 2005
Disa fundjava, ish-kryeministrit Nano i ka kaluar në Athinë. Sëbashku me bashkëshorten e tij, Xhoana dhe të birin e saj klajdi ata kanë qendruar në disa hotele të kryeqytetuit grek,, por njëkohësisht kanë realizuar edhe disa takime me miq dhe të afërm.

19 dhjetor 2005-11 janar 2006
Fatos Nano nis një tur privat në SHBA. Ai shkon në San Francisko, Nju Jork, Nju Xhersi dhe Los Anxhelos. I shoqëruar nga deputetët Shpëtim Idrizi dhe Taulant Balla, Nano feston edhe vitin e ri në San Francisko në një restorant të hotelit me pesë yje Hyatt.

PESE HOBET

LIBRI
Eshtë shndërruar shumë shpejt në një lexues marramendës I librave. Përpos titujve të shumtë dhe të rinjë në shqip, një vend të posaçëm në menunë e tij zënë edhe librat e huaj. Biblioteka me rreth 10 mijë libra këto kohë është pasuruar shumë.

GAZETAT
Nuk ka hequr dorë nga ushqimi: gazetat e ditës. Si një herë e një kohë kur ishte kryeministër, Nano lexon me po aq kujdes e me po aq kërshëri çdo mënjgez të gjithë tituj e gazetave. Por, nuk lë pas edhe gazetat e huaja që I ndjek ne internet,.

INTERNETI
Fatos Nano e përdor si një djalosh teknologjinë e fundit të komunikimit internetin. Çdo ditë ish-kryeministri klikon sitet më të rëndësishme dhe marrja e informacioneve të gazetave të huaja e bën pikërisht nga tre dubëlvëtë e famshme.

MAKINA
Hobin e tij të vjetër-të ri e dinë të gjithë. Eshtë makina. Pothuajse çdo lëvizje e bën me Touaregun e tij. Një makinë super që Nano ia di hajrin mirë. Ndërsa në të njëjtin garazh ka edhe një makinë Land Rover që ia ka dhënë qeveria, por që rezulton e prishur.

PARLAMENTI
E ka braktisur që pas asaj pjesmarrje në seancën e parë. Që nga ajo ditë, ish-kryeministri nuk është parë më në sallë. Por duket se do ti shpëtojë rregullit sipas të cilit ai deputet që nuk merr pjesë 6 muaj rresht i hiqet mandati. Pritet që në shkurt të jetë pjesmarrës.