Martti Ahtisaari, fillon misionin në Kosovë

[beku]

Martti Ahtisaari, fillon misionin në Kosovë


Shekulli

Martti Ahtisaari, i dërguari special i OKB-së për bisedimet mbi statusin e Kosovës, ka mbërritur pasditen e djeshme në Prishtinë. Me të arritur në aeroportin e Prishtinës, Ahtisari u shprehu i kënaqur që po e fillon misionin e tij. ”Jam shume i kënaqur që erdha shumë shpejt pas emërimit tim, që të drejtoj diskutimet dhe negociatat për statusin e ardhshëm të Kosovës”, - tha Ahtisari. Ahtisari e ka nisur detyrën e tij në selinë e UNMIK-ut, ku ka zhvilluar një takim të mbyllur me kryeadministratorin Jesen Petersen dhe stafin e misionit të UNMIK-ut. Vetëm pak çaste para se Ahtisari të mbërrinte në ndërtesën e UNMIK-ut, një grup i vogël i aktivistëve të lëvizjes “Vetëvendosje”, kanë shkruar me shkronja të mëdha nëpër rrethojat e ndërtesës, parullën tashmë të njohur “JO NEGOCIATA, VETËVENDOSJE”. Në një komunikatë për shtyp të lëshuar nga lëvizja “Vetëvendosje”, thuhet se gjatë aksionit janë arrestuar dy aktivistë të saj, të cilët janë liruar pas disa minutash. Nesër Ahtisaari pritet të zhvillojë një takim të veçantë me presidentin Rugova, ndërsa gjatë ditës së sotme ai do të takohet edhe me anëtarët e tjerë të Ekipit Negociator. Gjatë këtij takimi pritet që Ahtisarit t’i dorëzohet në formë të shkruar dokumenti mbi pozicionin e Kosovës për statusin e vendit, dokument ky i miratuar nga Ekipi Negociator në mbledhjen e sotme. Para se të largohet nga Kosova është paralajmëruar se krynegociatori i statusit, Mrti Ahtisari, do të mbajë një konferencë shtypi, ku do të paraqesë pikëpamjet e tij për fillimin e këtij procesi. Pas Kosovës, Ahtisari do të vazhdojë turneun e tij diplomatik edhe ne vende të tjera të rajonit, përfshirë këtu Serbinë e Malin e Zi, Shqipërinë dhe Maqedoninë.