Kosova pranon te zhvendosurit e luftes.

[Kalt]

Qeveria e Kosovës dhe qeveria e Serbisë, nënshkruan në Prishtinë një marrëveshje e cila garanton kthimin e të gjithë të zhvendosurve nga Kosova. Mbi 90 mijë qytetar serbë janë të zhvendosur nga Kosova, ndërsa afro 14 mijë janë kthyer në Kosovë.
Pas 12 muajsh bisedimesh intensive ndërmjet Prishtinës dhe Beogradit, më në fund u arrit që të nënshkruhet marrëveshja ndërmjet dy qeverive për kthimin e të gjithë të zhvendosurve nga Kosova. Protokolli i kthimit parasheh kthimin vullnetar të të gjithë qytetarëve të Kosovës të larguar nga vendbanimet e tyre, ndërsa qytetarët kanë të drejtë të zgjedhin se ku do të jetojnë. Shefi i UNMIK-ut, Soren Jessen-Petersen, e mirëpriti nënshkrimin e këtij protokolli, ndërsa, tha se institucionet e Kosovës duhet të garantojnë që qytetarët e kthyer në këtë rast serbët e Kosovës të jetojnë të lirë dhe të punojnë për të ardhmen e tyre.
"Ne po punojmë shumë afër edhe me përfaqësuesit e serbëve të Kosovës dhe sigurojmë ata për një jetë të sigurt, të dinjitetshme dhe qasje në të gjitha shërbimet. Pra në po punojmë që të krjijojmë kushtet për kthimin e të zhvendosurve, ndërsa të gjitha deklarimet që mundohen të pengojnë këtë kthim dëmtojnë vetë serbët e Kosovës," tha Soren Jesen Petersen.
Në emër të qeverisë së Serbisë, nënshkrues i protokolit për kthim ishte Milorad Todoroviq, anëtar i grupit negociator serb në bisedimet për statusin e Kosovës. Milorad Todoroviq, përfaqësues i qeverisë së Sërbisë, tha se dokumenti I nënshkruar ka për qëllim krijimin e të gjitha shanseve për kthim dhe krijimin e një klime të mirë mirëbesimi ndërqytetar që do të mundësojë një kthim të qëndrueshëm të serbëve në Kosovë.
Përfaqësuesi i qeverisë së Kosovës Dardan Gashi, nënshkrues i protokollit për kthim thotë se qeveria e Kosovës si subjekt i ardhshëm ndërkombëtar merr obligim për kthimin e të zhvendosurve dhe në këtë mënyrë përmbush një nga standardet prioritare i përcaktuar nga komuniteti ndërkombëtar.
Protokolli për kthimin e të zhvendosurve në Kosovë, i cili u nënshkrua ndërmjet qeverisë së Kosovës dhe asaj të Serbisë, parasheh kthimin e të gjithë qytetarëve të Kosovës pa dallim përkatësie etnike të larguar nga vendbanimet e tyre. Këtë kthim do të financojë qeveria e Kosovës dhe administrate ndërkombëtare, mirëpo jo edhe levizjet e brendshme të qytetarëve të kthyer që mund të ndodhin në të ardhmën. Në bazë të statistikave të UNHCR-së, thuhet se mbi 90 mijë qytetar serb janë të zhvendosur nga Kosova, ndërsa, nga ky numër afro 14 mijë tashmë janë kthyer në Kosovë.

Bekim Shehu
Deutsche Welle
06 Qershor 2006