Shqiptari arratiset me helikopter nga burgu grek

[Dilaver]

Shqiptari arratiset me helikopter nga burgu grek

</SPAN>

A. Metaj


ATHINË- Shqiptari i dënuar për vrasje arrin që të arratiset në mënyrë spektakolare nga burgu më i madh i Greqisë. Duke përdorur një helikopter që ngjante si i policisë greke, Alket Rizaj, i dënuar për vrasje dhe greku Vasilis Paliokostas kanë mundur që të largohen nga burgu. Vetëm pak orë më pas policia greke ka mundur që të arrestojë pilotin e helikopterit por dy të arratisurit janë zhdukur pa lënë gjurmë. Burimet zyrtare të policisë së Athinës shpjeguan dje se burgu nga ku janë arratisur pasditen e djeshme dy personat është më i madhi dhe më i sigurti i Greqisë. Burgu Korithalo ndodhet në periferi të Athinës dhe në të qendrojnë të dënuarit më të rrezikshëm të shtetit grek. Pasditen e djeshme, dy shtetas grekë kanë marrë me qera një helikopter ngjyrë blu. Ata i kanë thënë pilotit se duhet të nisej në drejtim të ishullit Nikolos, i cili ndodhet pranë Athinës. Teksa kanë qenë në udhëtim e sipër këta persona i kanë kërkuar pilotit që të ndryshojë drejtim dhe të kthehet nga burgu Korithalo. Kjo gjë nuk është pranuar nga piloti por ata e kanë kërcënuar se do ta vrasin dhe për këtë gjë kanë nxjerrë edhe armë. Nën kërcënimin e armëve helikopteri është drejtuar për nga burgu Korithalo. Rreth orës 18.10 helikopteri me ngjyrë blu është parë që të vërtitet rreth burgut në një kohë që në oborrin e tij ndodheshin të burgosurit që kishin dalë për shëtitjen e mbrëmjes. Në një moment helikopteri është ulur në oborrin e burgut dhe nga aty janë hedhur disa granata tymuese, të cilat kanë mjegulluar të gjithë zonën. Duke përfituar nga mjegulla në helikopter janë ngjitur të dënuarit Alket Rizaj dhe Vasilis Paliokostas. Policia e burgut është gjetur e papërgatitur nga kjo situatë dhe pak orë më vonë është shpjeguar se helikopteri ngjyrë blu i është dukur si i policisë. Menjëherë pas ngjarjes policia greke ka filluar që të ndjekë me radarë helikopterin, i cili është ulur disa kilometra më larg. Menjëherë sapo kanë dalë nga helikopteri katër personat janë pritur nga disa kotorra dhe janë larguar me shpejtësi. Në vendin e uljes së helikopterit policia ka gjetur vetëm pilotin, i cili është shoqëruar në komisariat për tu marrë në pyetje. Kjo është arratisja e parë e këtij lloji që nuk ka ndodhur ndonjëherë në shtetin grek. Dyshimet e para të policisë janë se organizatori është vëllai i të dënuarit Vasilis Paliokostas, Kosta, i cili prej 30 vjetësh është në kërkim për grabitje bankash.

05/06/2006

Shekulli